Dua Kaban Ti Rapit Enggau Pangan Diri

Nadai enda orang ke tuai ke nemu cherita pasal Apai Saloi enggau Apai Seumang-umang. Endang dipelabaka seduai tu mega berimbai pendiau lalu kaul seduai enggau pangan diri endang baka asam gulai garam. Taja pan seduai manah begulai enggau pangan diri tang seduai mega suah ngakal pangan diri enggau nadai tentu pasal.

Nyadi bisi sekali, Apai Saloi madahka Apai Seumang-umang, “Apo! Unggal! Di seberai tepian ai kitai dedin bisi lubang burung tekalau.”

“Endai, unggal! Uji padah mih dia ngagai aku tapak alai lubang burung nya diau,” ku saut Apai Seumang-umang.

“Au, unggal au,” pia ku timbal Apai Saloi. Iya lalu madahka tempat senentang burung nya diau. Iya mega ransing ngajar Apai Seumang-umang. “Nyadi baka tu nya unggal, nuan anang bangat tumu ngagai nyin laban burung nya agi ngiga utai dipakai iya. Tambah mega, enti nuan tumu ngeruga iya, iya deka jera lalu enggai datai ke alai nya agi.”

“Pia... .” ku saut Apai Seumang-umang pandak.

Matahari pan nya deka pengumbas iya, dia Apai Salo dulu madah ngagai Apai Seumang-umang pekara ke patut disediaka iya sereta dibai iya ngagai lubang burung nya.

“Lagi nuan unggal, lebuh nuan kin ka, nuan anang enda ingat mai abuk, keladi, jabang ti udah disumai. Telu mansau ti udah dikupak enggau buah pisang ti udah mansau mega. Ingat bai semua utai nya lagi.”

Sereta jam udah nyau chukup, Apai Seumang-umang enggau ati gaga ngema utai nya tadi ngagai tempat ti alai lubang burung nya. Datai iya dia, iya lalu nyuaka utai nya sigi-sigi sekali ngagai lubang burung dataika semua buah nyau udah abis. Udah nya iya nempap bandir ti endur burung nya diau. Tekala nya iya lalu tedingaka nyawa munyi tu, “Tekalau! Tekalau!” sereta ditangkan enggau sayap iya ti tekebap-kebap.

“Ha..ha! Ketawa Apai Seumang-umang kediri ninga munyi sereta meda ulah burung nya. “Nya iya dia. Ila agi aku deka datai kitu baru.” Udah nya iya lalu pulai ke rumah. Datai di rumah iya lalu nusika pekara nya ngagai bini iya.

“He...he..he! ku bini iya ketawa ke Apai Seumang-umang. “Ukai Apai Saloi nya kini? Kada enda udah mih nuan tu kena akal iya.”

Ninga baka nya, naka mih pemalu tudah Apai Seumang-umang dikeduanka Apai Saloi baka nya. Nya alai, iya lalu berundingka chara ke tau dikena iya malas Apai Saloi.

Nyadi iya pan udah makai lemai hari siti dia iya lalu ngusung Apai Saloi. Seduai lalu duduk berandau di ruai. Tumbuh enda kakang, Apai Seumang-umang lalu madahka Apai Saloi. “Akai dai unggal! Din bisi burung tekalau belubang senentang tepian ai kitai tapak ti ku nuan madah ngagai aku dulu kemari. Ila nuan unggal, anang enda ngambika tua. Ukai nama, aku nangika iya misah ke tempat bukai.”

“Au mih unggal,” ku saut Apai Saloi. Iya baka nemu diri deka dibalas Apai Seumang-umang enggau akal sebengkah laban dulu ari tu iya empu udah bisi akal baka nya.

Apai Seumang-umang lalu nampung jaku iya baru. “Enti pia, lebuh nuan bejalai kin ila, nuan mesti mai abuk, jabang, asi, keladi enggau telu mega nyadika umpan nuan.”

“Au unggal,” pia ku saut Apai Saloi.

Iya pan hari nyau siang, Apai Seumang-umang tumu bejalai ngagai endur ke udah dipadah iya ngagai Apai Saloi. Apai Saloi bisi dudi mimit nurun. Gaga bendar ati Apai Seumang-umang meda pangan iya nitihka iya baka nya. Iya lalu ngelalaika diri. Iya tama ke dalam lubang kayu nya.

Lebuh Apai Saloi nyau datai dia, iya dulu nanggar ai dalam periuk sigi ti besai. Ai angat nya nyau dataika dua tiga kali engkurak. Udah ai nyau lama engkurak, ai nya tadi lalu dibai iya ngagai lubang ti disangka iya endur burung nya diau. Datai dia, iya lalu yiuh ai ke dalam lubang nya. Sereta ai nya tama ke lubang, dinga tak nyerauh munyi nyawa orang ari dalam lubang nya. “Akai indai! Akai apai! Parai mih aku tu lagi!”

“Apo! Nuan nya unggal?” ku tanya Apai Saloi. Tekanyat Apai Saloi. “Nuan nya tadi pia? Nadai mih aku nemu. Dua kali ku jaku nuan tadi madahka burung bisi ngani lubang tu. Nya mih kebuah aku ngaga utai baka tu.”

Udah nya Apai Seumang-umang lalu minta kasih Apai Saloi ngambi iya pansut ari lubang nya. Kebuah pia, laban iya empu nyau enda dapat ngemansutka diri agi laban tubuh iya nyau abis betu kena panjah Apai Saloi enggau ai angat. Apai Saloi lal megai lengan iya lalu narit iya pansut ari lubang nya. Udah nya iya lalu ngema Apai Seumang-umang nya pulai ke rumah.

Rajah Midas

Kelia bisi siku raja ke benama Midas. Rajah Midas seruran bepikir. Nyadi sekali ku pikir raja nya, nadai utai bukai ti beguna enggau berega agi ngelui ari mas. Rajah Midas gaga amat ati  laban iya duduk dalam bilik ti dikelilingi kambut ti penuh enggau wang mas. Semua pinggai enggau mangkuk nyengkaum ngepan enggau semua keresa dalam rumah istana iya digaga ari mas memagang.

Nyadi sekali bisi siku temuai datai ngagai rumah iya. Temuai nya siku orang tuai ti kuat ngirup sereta seruran mabuk. Enti nitihka atur iya tentu kena buru pansut ari rumah raja tekala nya laban Rajah Midas ngelala iya. Nyadi orang tuai pemabuk tu bakih rapit Bakus, iya nya siku petara ti bisi kuasa pasal ai anggur enggau semua ai bisa. Meda orang tu ke bakih petara Bakus dia Rajah Midas bisi terunding munyi tu, “Enti aku bebasaka orang tu lalu ngintu iya enggau manah, tentu Bakus lebuh ninga berita pasal nya deka malas budi aku ti nelap.”

Keba nya orang tuai nya enda kena buru tang iya diau dia datai ngagai empat lima hari, makai begulai enggau Rajah Midas. Nyadi Bakus mega rindu benda ke Midas laban iya kasihka pangan iya baka nya. Iya lalu besemaya deka nulung iya.

“Uji padah ngagai aku nama utai ti bangat deka guna nuan, lalu aku deka meri ngagai nuan utai nya,” pia ku jaku iya enggau Midas.

Lalu saut raja nya, “Aku minta ari nuan kuasa sebengkah aja. Kuasa nya ke ku aku nya sebarang utai ti kena tegu aku tau nyadi mas memagang.”

“Au mih, enti nya peminta nuan,” ku Bakus, “utai dipinta nuan aku beri ke nuan.”

Nyadi sereta tebererak tawas pagi siti, Midas lalu bejalai ngagai kebun iya. Iya lalu nyapai raras sepun. Sereta kena pegai jari iya, utai nya lalu nyadi mas tekala nya. Gaga amai Midas meda diri empu bulih kuasa nya ti udah dipinta iya ari Bakus. Udah nya, iya lalu melungguhka diri ngambi batu sigi. Batu nya lalu nyadi tekang mas laban kena tegu jari iya. Baka nya mega semua utai ti ditegu iya nyadi mas memagang, dataika rumput, bungai kayu, ai enggau tanah.

Nyau datai maya deka makai, Rajah Midas lalu duduk nunga mija makai. Enda mukai-mukai, mija enggau kerusi iya lalu bebali nyadi mas tekala nya. Baka nya mega pinggai, asi, lauk enggau engkayu semua bebali nyadi mas magang-magang lebuh kena tegu jari Rajah Midas. Semua utai nya enda ulih dipakai.

Meda baka nya, Midas lalu ngangauka Bakas. Ku iya, “Ambi kuasa tu ti udah diberi nuan ngagai aku, laban utai tu nadai tau ngidupka aku. Iya sigi munuh aku.”

Ketegal nya, Bakus lalu ngasuh Midas mandi ngagai sungai. Iya ngasuh Midas nyepuhka diri dalam ai. Bakus mega ngelalau Midas enda ngembuan ati amu agu sereta nadai agi rinduka mas.

Nya mih kebuah, datai ngagai sehari tu semua keresik ti ba sungai ke alai Midas mandi kelia kening baka mas magang.

Dua iku tuai ke bebegahka diri

Menua Engkeranji Kumpang diatu udah jauh amat berubah enti dibanding enggau dulu menya. Ukai semina lubang idung sida begembar dua tang gerija, balai gempuru enggau tuai-tuai menua sida mega nyau begembar. Semua nya bisi dua memagang. Nya mih pengelebih sida menua nya taja pan genturung menua sida enda tentu besai.

Nangkan nya mega peranak menua nya udah enda tentu bejaku enggau pangan diri. Kaul entara pangan diri udah meranggang. Sida nyau udah beseni enggau pangan diri lalu nadai agi bejaku enggau pangan diri lebuh ke bepansa. Geregayak sida udah jauh amat bebida enti dibanding sepuluh taun ti udah. Buk sida amat mih chelum tang ngeli sida enda sebaka. Mayuh agi ke kuning ari ke burak ngelebus. Tu bedau agi ngira sida ke jungang, rungak enggau binsang. Semina siti utai ke sama ba sida tu iya nya sida semua nadai empedu malu laban maya ketawa sigi ayan ngeli.

Semua utai tu nyadi lebuh Aya Jugau tak enda mukai-mukai lalu numbuhka  pampang Parti Pupu Bansa (PPB) ba menua Engkeranji Kumpang nya ke dipeda sida nyau majak enda likun sereta lantang. Maya nya mega Aya Jugau empu nyadi Mandal Tuai Menua sida dia, pengawa ke endang dipegai iya ti enda nengah proses interview.

Pengawa Aya Jugau nya mih ke ngasuh Aya Kudus ringat. Aya Kudus tu tuai sida ba genturung pendiau Engkeranji Kumpang dia. Enti jaku kemaya hari tu kiraka dikumbai tuai kampung. Muras amat Aya Kudus ketegal ulah Aya Jugau. Pending iya nyau mirah baka undang ke udah mansau dipanduk. Ngeli iya kuning baka orang ke udah betaun-taun nginsap ruku cherut. Nya ke ngasuh kitai pedis amat deka mida entara tai ugi enggau kerak semakau. Pengeringat iya maya nya endang enda ulih digambarka ditu. Sigi chukup ringat amat.

Enggau pengeringat iya nya dia Aya Kudus lalu manggil Aya Jugau ngasuh datai betemu enggau iya. Aya Jugau pan baka utai sigi datai laban ke senurutka perintah. Seduai duduk betunga mua, mata betunga mata, sama-sama ngenyitka mata. Sama-sama melutka leka mata lebuh bepereningka pangan diri. Aya Kudus maya nya mega baru ngenyinakka diri enggau bala tuai Parti BAKA ( Parti Bala Kitai Aja) ke bekubu ba indu nenggeri, Kuching. Enggau nyawa ke inggar Aya Kudus nyau kerik-kerik  ngelicha Aya Jugau. Aya Jugau ngasaika diri ditanggi Aya Kudus nya belaya. Ku ati iya tu sigi enda patut. Dini bisi demokrasi enti baka tu. Kerusi iya aja ke dikemeratka iya. Enda rentang amat! Amat enda rentang! Ujung-ujung seduai iya betalat, betengkar enggau pangan diri. Perang mulut entara seduai udah berengkah baka orang ke berebutka lampang.

Kenyau hari nya, kini-kini ke tunga pejalai, Aya Kudus endang semampai ngutuk Aya Jugau ke sebedau tu dipuji, diangkatka iya tinggi-tinggi sereta dianggap iya bakih ke pengabis manah lebuh bejalaika pengawa minaka menua sida Engkeranji Kumpang. Ulah ke mejah Aya Jugau nya nyau datai ngagai hal dalam kain enggau dalam kelambi.

Aya Jugau enda memunyi. Iya diau diri. Cheria sereta ngena gasa tat aja. Adat orang pandai sereta berani, endang enda mudah ngalahka diri, enda surut ngapa taja pan setempap.

“Enti dalih iya deka ngasuh aku nginsil Parti tu ketegal PPB tu bisi ngaga sempekat enggau orang luar, tau enda ibuh. Manah iya ngelarika diri. Main jauh-jauh. Ngelama tu iya ke lebih-lebih, genih-genih ari kitai. Dandang sawit enggau umai iya pan orang luar diasuh iya ngereja. Iya semina makai duit siwa. Nya ... lada enggau kebun nya kinika iya deka nyual? Enda patut ngagai sedagar Malaya?” pia ku Aya Jugau bejaku enggau penuh perangsang ati maya ke ngirup kupi enggau bala bakih iya ba kedai Khu Lin Tang, ke digelar sida Apek Lintang laban ke bebasaka iya ke nemu bejaku China.

Sida semenua nya lalu majak beperang enggau pangan diri. Runding sereta pengawa kedua-dua tuai nya nyau ngujungka peranak menua Engkeranji Kumpang nya bebelah bagi. Ujung-ujung sida lalu bepechah dua. Sepiak nanahka Aya Jugau lalu sepiak agi nitih Aya Kudus. Aya Kudus ke endang nyadi tuai genturung sida udah enda ulih agi ngempung perabung ngempung temetung.

Maya agi keterubah iya suba kaul sida serumah kira agi manah. Kedua-dua raban tu semampai mantu pangan diri lebuh bisi pengerami tauka maya ditinggang penusah. Maya bisi pengerami tauka makai beserumpu sida sama-sama bela datai mantu pengawa sereta nulung makai taja pan enda rapit baka dulu menya. Maya sida Aya Jugau mantaika bungah, sida Aya Kudus ngaga diri enda ninga. Sekeda nya lalu ngayanka mua masam baka chuka. Baka nya mega enti maya sida Aya Kudus nguti sida Aya Jugau.

Hari beganti hari. Minggu beganti bulan hal sida nya nyau baka orang ke sakit nyau majak balat. Hal tu nyadi lebuh siku pemesai Parti BAKA ari luar bisi datai ngabang gawai ba rumah Aya Kudus. Maya nya bisi sekeda bala Aya Jugau nyadi pechilin mendingka randau sida. Keterubah nya sida nyau begau-imbau lebuh tepedaka bala ke ngabang nya chukup mayuh ari beluh di Letung Kumpang; banyak ari lemetak di Tinting Kadang. Enti baka tu ku sida segi tungkup parti kitai PPB meda pemayuh bala ke datai nyukung Parti BAKA. Tang ujung-ujung nyau baka sempama dibungkus abus tekebu mih abu; dipelam rian temu mih bau. Resia mensia ke mayuh nya pan ditemu Aya Jugau. Nemu nya bala ke datai ningaka licha nya penyukung ke diimport ari menua luar dibai bala sida Parti BAKA, enda nemu ari ni tunga penatai dikena sida ngeramika pengawa sida sereta ngemayuhka pengabang.

Ukai main agi licha tuai pemesai nya nyau bebunyi kerik-kerik mikrofon lebuh iya ke ngenataika jaku ba mua mayuh. Maya nya mega bisi sekeda bala Aya Jugau nyau kembai jari laban puas ke ngentakka jari sida ba tanah ketegal ke geram ninga pemesai nya bejaika PPB. Bisi ga sida ke tumu datai udah mupuk pulai, kedua nya nyau leju lalu sekeda nya pulai tumu laban ke sayau ke malam enggai enda enggau bala bini sida.

Bala sida Aya Kudus chukup puas ati enggau pengawa licha sida malam nya. Sida nyau chapuh beketekauka pangan diri munyi ke ngalahka tampun ngayanka semangat diri. Hari siti mayuh ari bala sida nyau munyi nyawa itit serati, parau ketegal udah bendar bekerauh malam sebedau nya. Taja pia sida terus bepekat enggau pangan diri deka cheria bekereja kenyau ari pagi nyentuk ngagai lima hari nangkanka nya. Udah bendar gawa lalu nyadi mih sebuah gerija enggau sebuah balai gempuru ba kandang rumah Aya Kudus.  Kenyau ari nya sida Aya Kudus sembiang sereta baum enggau bala diri empu sida aja. Sida udah enda sembiang ba gerija lama sereta baum ba balai gempuru ke ngelama tu.

“Kami enggai bedosa ngena chukai ke dikumpul ari aktiviti enda beradat nya dikena besembiang.” Pia ku jaku sumpah raban sida Aya Kudus lebuh ke ditanya pengarang berita ke ngari mayuh bengkah media massa.

Udah nya nyau bisi cherita madahka pemakai ke diidang sida Aya Jugau maya pengerami ngagai bala pengabang nya ari duit enda beradat tauka duit haram ku jaku kemaya hari tu. Nya kebuah bala sida Aya Kudus udah enda datai ngabang pengerami makai beserumpu ke diatur raban bala Aya Jugau. Ku sida, jelu ke disembelih bala Aya Jugau kamah bisi penyakit. Agi mega sida ngidang ai arak maya bisi pengerami taja pan ngelama tu sida enda bekiraka hal nya. Baka nya mega pengerami ke diatur sida Aya Kudus pan nadai pengabang ari bala sida Aya Jugau. Ukai ketegal sida takut kelalu kenyang tauka diasuh sida Aya Kudus masu pinggai tang ke deka malas dendam.

Mayuh mega bala sida Aya Kudus nyadi pengantin baru laban sida dipejal nikah baru enggau bini diri empu ketegal tikah ke diatur ba gerija lama nya kira enda valid. Aya Kudus empu ke nyadi tukang tikah. Tikah ke dulu ari tu dikira enda valid laban tukang tikah nya bala sida Aya Jugau.

Pekara ke baka tu nyau majak nyadi-senyadi. Bala sida Aya Kudus nyau enggai badu-badu bejaika raban sida Aya Jugau. Baka nya mega bala sida Aya Jugau pama udah nadai mudal kena ngelaban dia sida lalu mangkit mayuh macham utai. Ku sida bala Aya Jugau, sida Aya Kudus nadai gasa nguna jalai raya laban jalai raya nya digaga perintah.

“Sida empu ke ngumbai perintah idup enggau duit chukai dikumpul ari pekara ke enda manah. Jalai raya ke digaga perintah nya sigi ke ngena duit nya sida perintah ngaga, ukai nya duit ari kulit kerang,” pia ku bala sida Aya Jugau.

Tang sida Aya Kudus landik nimbal sida Aya Jugau. Ku sida, “Sigi amat tang nya hal lain. Kami tu pan peranak menua tu. kami mega mayar chukai. Hal deka milih sereta masuk ni-ni parti nya gasa kami mih.”

Laya ke panjai tu ke nyadi betaun-taun ujung-ujung tak padam sedu, mati iya empu dua tiga bulan sebedau jerita tu ditulis.  Situasyen ke ranchak ba genturung menua Engkeranji Kumpang berubah lundai. Menua sida nya nyau baka nenggeri ke baru udah dilanggar bilun jit Garuda.  Puas ke betungkapka pekara tu baru kami nemu bini Aya Jugau nyau udah tekuing runding enggau Parti BAKA sepengudah iya mendingka pengelicha ari luar menua sida bejaku ba mua mayuh.

“Tang kenu ku berita iya semina nyukung belalai. Ujung-ujung munyi ku jaku tuai, pandak mulut engkerasak, panjai mulut kita; dia dih resia iya pechah. Aya Jugau nyau baka orang ke udah kena serang sakit uduk gila. Enda mih kitai nemu baka ni siti agi berita tau tak pantis. Nemu nya bini Aya Kudus nya penyukung ke taluk ngagai raban sida Aya Jugau. Nyau deka luput tudah Aya Kudus lebuh iya ninga resia berita nya,” ku jaku orang ke enda lumau dikarapka madah ngagai pengarang berita.

Nyau nyadika cherita, diatu didinga ngerimbas pending pasal Aya Jugau udah besilih bini. Iya jadi enggau janda Aya Kudus semuti sehari udah Aya Kudus jadi enggau janda Aya Jugau. Udah kes nya diatu seduai iya bela udah berubah perangai. Aya Kudus nyau baka orang imun. Diau diri lalu Aya Jugau nyadi orang ke malu. Taja pan baka nya didinga mega berita madahka bini baru Aya Kudus diatu udah betubuh bisi! Baka nya mega enggau bini baru Aya Jugau, ke malu tekuyung nya.    

Umpau

“Kapa duit nya?”

“Kena meli insap. Meli dadah!” 

“Dadah?” Umpau tegepang. Pengingat iya nyinuk bepusar pulai ngagai maya empat taun ke udah limpas suba. Maya nya, dadah endang nyadika asi iya. Hari-hari nginsap dadah. Hari-hari betuchuk ngena dadah.

Luli nyeritaka penanggul ke benung ditapi iya. Menyadi ambu iya baru berengkah deka teparit enggau pengawa ti enda bemoral nya, ku iya kenyau ari iya ke gawa nyadi penempara ba kedai ai arak di sebuah pub ba Pasar Maling. Dia iya bisi deka nyangka nya berita amat sepengudah bisi sekali maya malam indai ambu iya dijamah menyadi iya ketegal ke enggai meri iya duit. Iya nyerungkai beg indai iya sepeneka ati laban ti deka ngiga duit. Luli empu mega kala nyadi tagit alai menyadi iya bepintaka duit. 

“Kada enda aku pan deka dijamah iya ila. Ni nemu?” putap Luli enggau ati ti sinu mansutka serebana diri ngagai Umpau.

Enggau ati ti pengabis baruh, Umpau madahka diri udah besedia deka mantu Luli. Iya ngasaika diri bisi tanggung pengawa sosial ngambi semengat genap iku iban ke tesat ketegal gian dadah pulai baru ke pun jalai. Asil peneleba dalam petang ke ditapi iya ngelama tu iya ngasaika pekara baka nya endang nadai mai nama-nama penguntung. Ngemaluka diri empu enggau sida sebilik aja. Jeman pemetang suba iya kala nyamah ibu Lumbai ketegal minta duit dikena iya meli dadah. Iya kala enchuri duit ibu Lumbai. Ngeruntun beg orang ba jalai enda ngira siang tauka malam. Berumpak motosikal ba jalai dikena ngulihka duit. Kereja nyadung sereta nyual dadah. Nya mih kereja sitan ti kala digaga iya sebedau iya ditangkap polis. Umpau kena tangkap polis maya iya ke berumpak motosikal laban ke dituduh positif dadah. Dua taun iya ditan dalam rumah pasung. Enam bulan udah nya dianjung ke palan ngubat orang gian dadah . Asai ke diau di neraka sepi iya maya nya suba. Terima kasih mih, aku udah nesalka penyalah diri, pia ku runding iya. 

Udah ke betemu kali kedua nya, Umpau enggau Luli selalu begigaka awak alai seduai ulih betemu baru sereta bejuraika penanggul ti ditapi adik ambu Luli ke nyau majak tesat jalai pengidup. Luli balat ngarapka Umpau ulih mantu iya ngemetulka utai ke nyadi nya. Iya empu nyau udah temati kutu, ku iya. Udah mayuh macham chara dikena iya tang lalu nadai belinsur manah. Teruba suba kumbai sida sebilik kena utai orang. Berubat enggau dukun udah. Belian enggau manang udah. Berubat enggau lutur luar pan udah. Ngasuh balat agi ke bisi. 

“Aku deka betemu enggau madi dek, Luli. Ulih dek ngatur ka?” Umpau udah mutus ati. Iya nguji deka meri jaku ajar dulu bepelasarka utai ke kala ditapi Umpau empu ngelama tu. Ni nemu nyangka tau tak semitan.

“Bisi deka tusah mimit deka betemu enggau madi aku nya laban iya jarang bendar bisi ba rumah,” saut Luli.

“Enda milih endur betemu mih enti pia. Enda ngawa enti enda ulih di rumah.” Umpau tetap mutus ati deka betemu. Niat iya mesti dikamatka. Iya bisi tanggung pengawa sosial mantu orang bukai ke udah tepejuh jauh ketegal gian dadah.

“Au mih. Enti baka nya aku nguji mih.” 

Saut nya bisi meri pengadang ngagai Umpau dikena iya ngerakka menyadi ambu Luli ke udah lina ketegal dadah. Enda ulih dilakka pia aja. Lagi balat agi sinu meda enti iya ditangkap polis. Tepasung ba dalam rumah tutup. Pansut ari rumah pasung, nyadi kereban kelese mensia mayuh. Dipeda baka uras ke nadai beguna agi. Orang jil! Ama mensia! Pegian dadah! Penyeluk kerepai! Penchuri! Sereta mayuh macham gela nama bukai ke dikena mensia mayuh ngelaguka tudah Umpau. Dini ati iya enda sinu. Nya mih ti udu amat ngemediska ati. Iya nyau udah dipeda baka ukai mensia agi. Singin asai deka nejalka pending iya empu awak bengal. 

Bisi beberapa bulan Umpau nguji merambu deka betemu enggau menyadi ambu Luli. Lalu enda teulih-ulih. Luli lalu bedau ulih nentuka hari bulan betemu entara Umpau, bakih rapit iya enggau menyadi ambu iya. Luli agi kalat-kalat berunding ngiga maya  ti patut alai seduai iya betemu. Bangau udah tentu enggai betemu enggau Umpau semadi mih iya diakal tauka disuap ngena duit ringgit tauka ganja. Luli udah ngelumu semua akal runding iya dikena manjuk menyadi ambu iya ke nyau majak betanduk nya. Ngasi tauka enda, enda ngawa, belakang cherita. Diatu menyadi ambu iya mesti mendingka jaku lalau ari Umpau ke kala nyepi sejarah pemetang ketegal gian dadah lalu empas ari hal nya mengkang diasaika iya nyentuk ke sehari tu. Bedau temu ulih terang baka selama. Nya mih pengadang Luli. Iya udah enda tan agi enggau ulah Bangau. Bisi ati iya deka ngeripot ngagai polis. Tang iya agi enda kempang. Agi enda sanggup. Agi kasihka Bangau. Iya empu udah betaun-taun numpang diau sereta minta kasih sida Bangau sebilik nya. Iya ngasaika diri diatu berutang basa iya ba sida Bangau sebilik nya. Nya alai, nya mih aja chara dikena iya nguji ngemetulka utai ke nyadi sebedau utai nya majak balat sebalat.

“Malam tu, ba endur tua betemu kali keterubah suba, Mpau.” 

“Lapa dia dih?” tanya Umpau. 

Tempat nya endang ba tisi jalan raya tang bisi sunyi mimit sereta bisi babas repa ba tisi nya. Nya ke ulih ngelindung mensia ari dipeda orang bukai.

Luli baka ke enda ninga jaku tanya Umpau. Iya terus mindah lalu nadai nyaut seleka mukut mungkal enda malas seleka beras. Umpau tekanyat lalu agi nguji deka nyangka saut tanya nya tadi. Mata iya kelip-kelip baka ke baru tepedaka sumandak seksi nguyangka punggung ba mua terupung mata iya. Tusah bendar alai iya deka nyaut leka entelah nya. “Enda ngawa ga.” Menolog iya kediri; bejaku kediri berandau nenggali baka orang gila seraya ke ngangguk-angguk baka orang ke beli.

Lemai baru udah belabuh; baru terumjam mata panas. Gaya hari ke baru ngangkatka diri malam nya tak sunyi amat, sunyi baka tungguk malam ti terus nganti bulan pegari. Tang taja pia munyi buntak malam enda mukai-mukai didinga nyau besaut-saut bekumbaika pangan diri sambil ngidupka sunyi malam. Umpau udah besedia. Iya mega baru udah ngintu diri. Semua leka jaku ke deka dipansutka iya udah ditusun iya enggau manah-manah nitihka rurun ke patut, bepun enggau tabi basa lalu bepunutpka jaku besabi. Kiraka semua utai udah abis diperundingka iya udah nya iya lalu minta pemendar ibu Lumbai. Madahka diri deka bekejang dulu. Motosikal Yamaha Cdi 80 iya baruh rumah nya baka ke udah lama mega nganti. Umpau nepan motosikal iya lalu neresu malam ke tempat ti udah disemayaka Luli pagi tadi. Tempat ke ba penemu iya nya enda tentu engkeman endur betemu. Enti nunda endur betemu ke manah ba ati iya nya sigi baka ba bilik kaunseling tauka di gerija tauka di kedai kupi tauka di kulau makai pan tau. Tang kati ku enggau, menyadi ambu Luli udah netapka tempat nya. Agi mega iya empu udah mutus ati deka betemu enggau orang ke udah tesat nya ba dini-dini endur. Nya mih niat kudus Umpau.

Datai iya dia, iya lalu ngelekaka motosikal iya ba tisi jalai. Udah nya iya bejalai gana-gana neresa kampung ngerembang babas bebakihka lampu pichit ti nyau kuning  panchar nya ke nyadika penerang iya. Pejalai iya nuju adap ke Sungai Menyan. Iya udah teleba kia. Genap ujung minggu, iya datai kia nginti ikan tuman, keli enggau bakih iya Liman taja pan jarang bulih. Nya mih anak sungai ke bedau dibalut kamah ba menua sida dia. Ambun malam udah mantik masuk isi ngasuh iya berasai chelap ngagu. Bunyi utai ba kampung nyau betimbal-timbal. Peneras ai sungai udah mega bisi didinga. Jaku tabi bisi disebut iya tang lalu nadai disaut. Tempat ke udah disemaya nya tak puang nadai dipeda batang idung orang. Nadai siku buntak iban bisi dipeda iya dia. “Luli!” kangau iya. Nadai mega disaut. Engka bedau datai ku runding iya. Umpau bediri ngesai-ngesaika perecha iya dikena iya muru antu koklir ke pama maya malam udu amai deka ngisap darah mensia. Iya agi nganti dia enggau gata.

Enda mukai-mukai kiraka enda lama udah nya tak ayan beberapa iku kelemayang mensia datai nerekam lalu nangkap jari iya baka penyampat panchar kilat ngelambai petang, seretai enggau nya selambar perecha ditekup ba idung iya. Bau ti angat amai lalu neresap tama idung iya enggau jampat ngujungka nya ngematika semua urat tungkul atau iya. Utai ke dipeda iya pan nyau beraserapun. Tubuh iya nyau berasai lemi; tulang asai ke baka indu ti baru udah beranak. Iya nyau nadai daya agi deka nginsitka tubuh iya. Baka orang ke udah lemas ba lubuk Sungai Menyan. Kelemayang mensia ke enda sempat dikelala iya tadi lalu ngempaska tubuh iya ngujungka iya rebah ke tanah. Mua iya tesungkur lalu tesiumka dada tanah. Pasir, tanah nyau bekelekik ketawa meda iya baka nya. Tang Umpau mimit pan nadai berasai pedis semuti tak lemi tulang aja. Iya tetingkap ba atas dada tanah baka bangkai siku mensia. Sekali dua bisi mega pending iya ulih nangkap munyi ketawa mensia. Serak-serak munyi sereta penuh dosa. Engka sida nya ketawaka gaya iya ke baka nya. Iya..., endang amat ngelugika ati. “Munyi nyawa Luli? Lapa iya tak ngemaleka aku maya aku baka tu,” pia ku runding iya. Utai ke dipeda iya nyau majak beserapun lalu mata iya nyau majak rabun-serabun. Ba runding iya tentu tu mih pemarai ti udah datai. Iya pan nyau enda nemu diri agi! Nyangka udah parai!

Udah ke ngeleda ari ‘mati’, iya empu udah digelang sereta dipelulungka seraban polis. Tubuh iya nyau udah kelalu lemi. “Kada enda bemimpi aku tu?” pia ku iya nelai diri empu  dalam ati.

Peresa ai kemi Umpau pan lalu dipejalaika sida dia.

“Nama penyalah aku?” Umpau nanya sambil ngasaika tubuh diri lemi. 

“Nuan positif dadah,” ku siku ari raban polis nyaut iya.

“Ahhh …, Positif dadah? Enda patut!”