Mami Mesti Pulai, Sulu

Ari balkoni rumah, aku engkadah meda langit ti petang kesipat sereta ngeretum chelum tang bisi disempulang enggau kerembai bintang begenara kelap-kelap, terang bebendang, begenyiling sereta chiru. Nadai penusah ulih aku timpai din. Semua dipeda kudus sereta tuchi mancharka penampak iya ngagai bumi. Dunya udah tentu semampai beputar nitihka atur Petara, nitihka adap pusin rampa dunya kenu ku sida ke anda dalam pampang sains. Bumi enda landai, enda rata baka ke dipeda mensia selama ngelama tu. Bumi ti terekun enda berasai tak bekalih besereta enggau utai ke diasaika tungkul ati aku. Jaku Flona, bini aku maya iya bekejang ke hospital tempat iya gawa nyadi doktor penyakit dalam, balat bendar ngasuh aku ngelegesi sereta ati aku asai ke disayat semilu.

 “Mami pulai sulu, anang irau,” ku iya madah ngagai  anak bungsu kami duai ke benama Ranggau. Iya baru berumur enam taun. Ranggau  nyabak rauh-rauh munyi ke dipalu sambil megai ujung baju indai iya seraya ke nyebut, “Anang nurun mami. Anang nurun. Lagi  mami kena pilus kochina!” pia ku iya nyebut nama virus corona nitihka sebut sereta sada nyawa sida anak mit.

Tang nama mih daya, Flona enda ulih enda nurun. Kepala Doktor ba Hospital Lubok Kelebuwai baru udah nelefon iya. Udah dua iku pesakit ditemu postif Covid-19 lalu demalam seduai iya bela mutuska seput, mati dibai hari, danjan dibai bulan. Sehari tu, Doktor Yupie bakih rapit bini aku ga tama ruang isolasyen. Asil peresa pengerai  nandaka iya mega udah nyadi suspek sereta positif corona. Aku ngelepikka tunjuk kemari. Sebedau Flona ke hospital ketegal gawa, iya sempat nusui cherita pasal Doktor Yupie ke baru ngerami hari pengada iya ke empat puluh.  Bini aku enggau bala doktor ke bukai bela dijamu makai sama-sama enggau iya ba sebuah kafe  ti agi bekunsi  siti kompleks enggau hospital sida dia.

Pengerawan ati aku nyau majak nancham tungkul atau sereta nekung kandang ati aku. Malam nya, aku engkadah ke langit enggau ai mata leledung, melema ba kulit mata. Takut udu aku lebuh aku ngenangka utai ti nyadi. Ya ketegal aku ke mensia selama bedagin mensia. Singin ga asai ati tu deka nyumpah nyeranah, nyerauh, manjung enggau chukup penginggar, tang nuju sapa? Nuju sapa? Nuju antu? Antu jai ti enda ulih dipeda, ke belalai ba belakang ribut, ke lekat ba genap iti batang besi, lekat jampat baka kilat ngelambai petang engkabit ba batuk enggau riak sereta engkasi ti ngenyit pansut sereta enda ulih ditan nya? Aku muras. Pikir enggau runding aku nyau betambah-tambah paranoid  ngasuh  tubuh aku gegitik. Tisau gerindam humaniti aku balat bendar beperang ngelaban mayuh leman cherita imajinatif ti ngiring ngembing tubuh tu, lalu roh aku nyau berasai nyelai ari selama. Flona, sulu ati perembam dalam aku, balat bendar aku ngarapka virus ti busung nya enda rinduka tubuh nuan. Pia ku ati aku bejaku kediri, berandau nenggali. Biar mih nuan tetap diempu aku, biar mih nuan tetap diempu bala anak aku, diempu indai enggau aba nuan, diempu pesakit ti begunaka tulung bantu nuan. Nya mih pengadang sembari ke ngelabuhka  tubuh aku ba kerusi balkon. Dada ati aku nyau majak keketap maya Hp aku tak ngenyit memunyi. Ton bunyi lagu Hotel California nya ukai lagu ke ngenusahka ati ngelama tu tang sekali tu ton bunyi nya udah berubah ari selama. Udah enda sebaka. Kachut ati aku ninga. Kada enda bisi mai berita sinu.

“Papa sayau, ni baka bala anak tua? Bisi nuan meri sida vitamin C enggau B Kompleks udah sida tembu makai? Tulung peresa PR sida mega. Nama berita aba, indai enggau bapa? Ingat nih, anang sekali-kali pansut ari rumah. Imu, ama kitai nya anang guai ngasuh tama dulu, au. Pemakai udah bisi aku simpan dalam peti ais. Aku udah ngaturka engkayu nya  disumai tiap hari. Anang irau. Semua nya chukup ke penabat datai ke dua minggu.  Indai pan udah mih aku padah. Anang nangi Papa sayau aku, tu WA kepenudi ari aku. Udah tu aku mesti ngerasuk kelambi ayak astronaut nya dikena nyeliahka diri ari diserang Covid 19. Enggai enda madah ngagai nuan, sehari tu siku indu ke berumur enam puluh taun udah nadai ketegal virus nya. Post mortem iya pan udah keluar. Anang irau nuan Papa, kami bala doktor ngena pekayan seraris astronaut, kelambi anti virus. Besampi aja ya Papa, besampika Mama awakka tetap gerai nyamai. Dah dah Papa sayau, muacccchhhh love you...”

WhatsApp nya baka ke nyadi pengingat kelabur ti ngasuh aku balat agi takut sereta mawa. Aku sempama beperang enggau munsuh ti ayas nadai dipeda kelemayang. Diatu udah ampir tiga hari iya enda pulai. Ati sapa enda irau. Ati sapa enda nangi. Ati sapa enda takut.  Bini aku nya. Sulu peraja mata aku. Berunggu hari aku duduk nunga TV meda ripot dikenataika Direktor Opis Menteri Pengerai. Berita senentang dua pesakit ti positif covid-19 ke baru udah ninggal balat agi ngasuh dada ati aku runtuh baka pengeruntuh kedai ba Pasar Paya Rebuh. Berita seduai dikubur enggau endur gawa  pan dipelalaika. Tu mih ngasuh ati aku balat sinu. Katika enda dih? Bini aku ga di hospital din, ba tengah-tengah bala pesakit ke benung nganti diperubatka. Bini aku ga din di tengah-tengah sida ke betapi enggau virus Covid nya. Bini aku nyau baka manuk puda ti nganti deka dipanggang ba atas api ti angat amat. Enda Flona, enda, nuan mesti pulai! Baka ni kati pan nuan mesti pulai!

Niat ati aku tegut baka penegut kayu selangan batu. Aku mutus ati deka ngambi bini aku, Flona ari hospital nya. Tu ukai kes nama. Iya sigi diempu aku, empu bala anak aku lalu empu kedua-dua apai indai iya, ukai utai penggi virus antu kepapas, antu jelu, antu entibu ke barang maya nganti ke deka nerekam sereta majuh mensia.

“Patutka nuan kin?” tanya entua aku ke indu. “Enti nuan mai iya pulai, iya deka mai virus nya ke rumah tu . Embih bala anak nuan ila, enggau nuan-nuan empu nya mih, aba enggau indai lagi dirampit iya. Kitai semua tu ila embih parai,” pia ku iya baru.

“Reti nya, indai, kitai tu nyau ngenjuk iya nyadika piring ketegal pengawa iya laban ke udah besumpah nyadi doktor suba, pia?  Tu enda patut indai. Enda rentang. Flona nya endang enggi aku. Mati idup iya sigi ungkup aku. Tuhan nempa iya endang ungkup aku, ungkup bala anak aku. Indai... aku nadai terundingka jalai bukai. Aku mesti mai iya pulai sebedau iya empu kena rampit...”

“Nuan enda ulih egois baka nya, Nak. Nuan bulih iya pan sepengudah iya nyadi lutur. Iya diempu orang banyak, ukai semina nuan enggau bala anak nuan, ukai semina diempu apai tau indai ke ngadaka iya. Nak, besampi mih nuan awakka iya selamat sereta likun ba hospital din. Pemati nya semina garis imajinatif ti baka ayas utai ke enda ulih dipeda enda ulih ditela kitai mensia. Barang maya kitai  semua tau mati, nemu nya diatu tauka enda, enda mih kitai nemu. Besampi. Semina nya aja ulih dikerejaka kitai.” Pia ku jaku lalau mentua indu aku. Panjai amai licha iya munyi licha bala pengajar sekula.

Ati aku redak, amai-amai redak, ukai tak bula-bula redak. Aku baka ke enda agi betemu enggau Flona. Berita tentang hospital nya ti enda chukup mask, kurang pekayan balit igi penyakit enggau sanitiser dikena meresi genap ruang sereta berita sekeda pekereja dia ke luput lalu disempulang berita dua iku doktor dia ke udah mati balat bendar ngasuh ai mata aku enda badu labuh naya, enda badu-badu beledung ba kuyu aku. Nyabak tuai mih tudah aku. Sabak tuai aku ukai agi cheremin tisi baka chunging ke alai aku tekubur dalam penusah enda bedaya mutar. Tang lebih ari nya. Pemesai kuasa virus  Covid-19 ukai semina ngematika sistem imun ba genap sel mensia, tang  mega nerenak penakut psikologis. Tu mih tau ngasuh mensia ulih diserang skizofrenia tauka sakit untak kenu ku orang menua ketegal ke meruan depresyen. Ditambah enggau berita ti entah HOAX tauka ukai senentang mensia ti majak nambah  betegaring lalu ngujungka sida ruruh asam, danjan dibai bulan sepengudah utai idup ti enda ulih dipeda nya ngelumbang lalu ngempa semua keresa dalam tubuh mensia. Nya mih ti ngasuh aku baka gamal paranoid ke diau ba dunya Alien.

Tu udah masuk hari ketujuh tang tetap nadai didinga berita. WA pan mati. Berita pemansang senentang virus ti ganas nya ngasuh tensi darah aku beserunyut niki. Aku ituk bendar nelefon hospital tang saut ba ujung telefon nya selalu sama. “Bini nuan agi ba ruang isolasyen, ngubat bala pesakit. Iya bedau ulih berandau enggau nuan diatu.” Jelaka! Tempelak aku dalam ati. Mata linsau bala anak aku,  mentua aku, tak dipeda merening aku baka perening ti ngedum nadai bepengadang. Anak pengkuan aku udah mupuk nyabak lalu nanyaka penunga indai iya. Lelaki  cheredit ke agi besekula ba kindergarten, udah dua hari enggai makai. Tubuh iya pan bisi berasai angat mimit. Aku lalu ngengkahka kereban temperatur ba kechiak iya, 37 degrees celcius. Apu! Surak aku. Arapka pengangat iya enda majak niki. Irau aku. Oh Flona, ni baka pendiau nuan diatu? Dini enda nuan diatu? Dada aku pulai ketap-ketap, kachut. Berita bakih aku ke mati kemari lalu terus dibai pulai ngagai sida sebilik, dikubur kemaya nya mega balat ngasuh pala patung ngagu sereta berasai lemi...

Enggau gaya utai ke nyadi, jaku jai pan nyau belumba-lumba disempulang enggau berita ari media dot com ti ngayanka mayuh leman sadang penemu, enda nemu nya amat tauka enda nyau sama ganas baka virus Covid 19 nya empu. Lockdown  bedau ulih dipejalaika enggau terit agi. Mensia mayuh agi ngumbai penyakit nya hal mit, pekara kelikit. Pemerintah mega dituduh enda bebendar mutarka penanggul virus enggau serius. Mayuh macham penemu bechampur gaul enggau imajinasyen bala mensia ke beambi ulih ari penatai penyakit  virus tu. Enti situasyen nya majak balat kada enda bisi charut menua. Tu ukai agi mimpi jai, tang realiti ti ngerawanka kitai mayuh. Raban politikus lalu mupuk beambi ulih ari penusah rayat belalai atas nama mantu mensia. Utai tu ulih nguyum baka pisa pansut nanah tang ulih bekamuflaj dalam punggung virus covid-19.  Aktiviti main dadu lalu berengkah. Nyau baka orang ke main chess. Skak bala pemesai dipejalaika bala pegadai nengah strategi ti nemban seraya ke belalai ba bidak munsang ti bebulu domba.  Nya mih sadang penemu ti bepelam ba pemanggal tulang keruntuk bala penusun skenario ti besengkabung, ganas sida iya sebaka enggau virus, munsuh ti nadai dipeda kelemayang.

Flona! Nama itu aku sebut betandu-tandu. Indu kih ti balat dikerinduka aku, ke milih nyadi doktor alai iya ngulunka diri enggau nadai reserve nya. Flona seruran ngasuh aku kelam kabut sereta irau enda tentu tuju. Balat ngasuh ati aku enda lantang. 

“Iya tekena rampit TBC akut Pa, aku mesti nulung iya,” ku iya lebuh kami suba agi diau ba entigis menua ke benama Long Nawang. Maya nya iya gawa nyadi doktor ba klinik desa dia.  Bisi ga sekali, kala ga iya bejaku munyi tu, “Kasih nembiak indu nya, aku mesti mantu iya, tu tikas kepenudi penyakit riman ti tau nabanka nyawa iya.” Bisi ga maya bukai iya bejaku munyi tu, “Pa, enti endemik rengga burung tu ngenyit nyerang aku mega, nuan anang sekali-kali nyabak enti aku udah nadai. Pengidup aku endang diguna kena mela mensia. Jaga mih anak tua sampai sida besai nyadi mensia ke beguna ungkup bansa enggau menua.”

Gila! Aku jadi enggau indu spartan ke mai misyen humaniti nya endang amai-amai gila kenu ku ai aku din. Flona, digaga ari nama kini ati nuan dataika nuan nyadi mensia ti tegap ati baka nya? Aku mupuk mulai kediri nimpai bintang-bintang ba langit. Bulan mupuk kelam, mua hari mupuk beserunyut nutup penampak iya. Enti nunda panchar enggau pemaik ti dienjukka langit ngagai bumi patut ulih ngasuh ati aku ke mawa nya berasai lantang. Pengerindu aku ke Flona nya enda ulih ditiap baka ke niap singkap engkerawai midang. Aku patut ngadang sereta nemu lalu ngembuan ati ti tebuka. Aku enda patut bendar nanggam pengidup iya sampai iya berasai pedis deka  enseput. Petara mih ke bekuasa agi atas mensia sereta mega bumi. Pia mega nunda ku jaku filsuf Aljazair tampun puji aku, Albert Camus nyebut munyi tu ‘Pengidup tu absurd, ukai ungkup diterangka tang ungkup dipereti.”

Maya aku benung kisuk mela runding aku enda mukai-mukai anak pengkuan aku nyabak baru sereta nanyaka kebuah Mama iya bedau ga pulai. Ba belakang tirai ai mata ti mupuk rangkai, aku nguji merindang ati iya sambil murus pala iya, “Mami mesti pulai igat... Anang nuan irau Igat Anggau.”

Jerita Pemati Jesus

Udah Jesus nyebut sampi nya, iya bejalai enggau sida murid iya lalu ngelayang ke seberai Sungai Kidron. Ba endur nya bisi sebuah kebun. Jesus enggau sida murid iya lalu tama ke dalam kebun nya.

Judas nemu endur kebun nya, laban Jesus suah udah betemu enggau anak murid iya be endur nya. Nya alai, Judas mansang ngagai endur nya mai bala soldadu enggau sida ti nyaga Rumah Sembiang. Sida tu diasuh tuai imam enggau orang Parisi. Sida mai senyata enggau lampu dikena sida betenggau.

Jesus nemu genap bengkah utai ti deka nyadi ba iya; nya alai iya mansang ke mua lebuh meda sida nya datai lalu bejaku enggau sida. “Sapa orang ti digiga kita?”

“Jesus ari Nazaret,” ku sida nyaut.

“Aku tu mih iya,” pia ku iya nyaut.

Judas ti deka nyual Jesus bediri dia enggau sida. Lebuh Jesus bejaku enggau sida, “Aku tu mih iya,” sida lalu surut sereta rebah ke tanah.  Jesus nanya sida baru, “Sapa orang ti digiga kita?”

 “Jesus ari Nazaret,” ku sida.

“Aku udah madah ngagai kita, aku tu mih ya,” ku Jesus. “Enti kita amat ngiga aku, awakka sida bukai ti enggau aku tu pulai.” Iya nyebut munyi nya dikena ngamatka jaku. “Apai, aku nadai ngelenyauka siku ari sida ti udah diberi nuan ngagai aku.”

Nyadi siku ari anak murid iya, Simon Peter bisi mai pedang. Iya lalu nyintak pedang nya lalu mantap siku ulun Imam Besai, lalu nyayat pending iya muak ari kanan. Nama ulun nya Malkus.

“Selitka pedang nuan ngagai sarung baru!” Kati dalam runding nuan aku enda ngirup mangkuk pemerinsa ti udah diberi Apai aku ngagai aku?”

Raban soldadu enggau pemesai sida sereta enggau jejaga orang Judah lalu nangkap Jesus sereta masung iya. Sida lalu mai iya dulu ngagai Anas. Anas tu mentua lelaki Kaipas, ti nyadi Imam Besai dalam taun nya. Kaipas nya orang ti ngajar orang Judah ke madah munyi tu, manah agi enti orang siku mati ketegal orang bukai.

Maya Jesus dibai bala soldadu, Simon Peter enggau siku murid bukai nitihka Jesus. Nyadi murid ti siku nya dikelala Imam Besai, nya alai iya enggau Jesus tama ke dalam tengah laman rumah Imam Besai. Nyadi Peter nganti di luar. Murid ti dikelala Imam Besai nya pansut ke luar baru, bejaku enggau indu ti ba mua pintu sereta mai Peter tama ke dalam.

Indu ti ba pintu nya lalu bejaku enggau Peter. “Kati nuan tu ukai siku ari sida murid orang nya?”

“Ukai, aku tu ukai,” pia ku Peter.

Lebuh hari nyau balat chelap, sida ulun enggau jejaga ngidupka api arang lalu bediri ngelingi nya, bekindu ngangatka isi diri. Peter mansang kia lalu sama bekindu enggau sida.

Lekaka dulu sesempa leka pinang cherita tudah Peter nya. Nyadi Imam Besai nanya Jesus pasal sida murid iya enggau pasal ajar iya.

Disaut Jesus, “Aku selalu bejaku enggau nyata di mua mensia; semua ajar aku dipansutka aku dalam Balai Gempuru enggau Rumah Sembiang, endur orang Judah datai begempuru. Aku nadai kala udah bejakuka utai belalai. Nama kebuah nuan nanya aku? Tanya sida ti udah mendingka ajar aku. Tanya ari sida utai ti ditusui aku ngagai sida. Sida nemu utai ti udah dipadah aku.”

Lebuh Jesus nyebut nya, siku ari sida jejaga ti dia nampar iya lalu bejaku, “Dini nuan tau bejaku munyi nya ngagai Imam Besai.”

“Enti aku bisi nyebut utai ti salah, padah ngagai semua   orang ti bisi ditu, nama utai nya. Tang enti utai ti disebut aku nya amat, nama kebuah nuan nampar aku?”

Nya alai, Anas ngasuh iya dibai ngagai Kaipas ti nyadi Imam Besai. Maya ke dibai nya iya mengkang dipasung.

Nyadi Peter tu  mengkang bekindu dia ngangatka isi diri. Ku sida bukai bejaku enggau iya, “Kati nuan tu ukai siku ari murid orang nya?”

Tang Peter besangkalka jaku orang nya. Ku iya, “Ukai aku, ukai.”

Siku ari ulun Imam Besai, kaban iya ti udah putus pending dipantap Peter lalu bejaku. “Ukai nuan ti dipeda aku begulai enggau iya dalam kebun?” ku iya nanya Peter.

“Ukai.” Kemaya nya mega manuk engkukuk.

Tumu-tumu pagi nya sida mai Jesus ari rumah Kaipas ngagai Istana Gabenor. Nyadi orang Judah enda tama ke dalam istana laban sida deka nuchi diri ari penyalah awakka tau enggau makai pemakai Gawai Paska. Nya alai Pilate pansut ke luar ngagai sida lalu nanya. “Nama penyalah orang tu ku kita?”

Disaut sida, “Kami tentu enda mai iya ngagai nuan enti iya nadai ngereja penyalah.”

Ku Pilate bejaku baru, “Kita empu mai iya lalu ngukum iya nundaka adat kita.”

Disaut orang Judah, “Kami enda tau ngasuh sebarang orang kena ukum bunuh.” Utai nya nyadi dikena ngamatka jaku Jesus lebuh iya madahka gaya pemati ti deka diasaika iya.

Pilate pulai ke dalam istana lalu ngangauka Jesus. Ku iya, “Kati nuan amat rajah orang Judah?”

“Kati tanya ti datai ari nuan empu tauka orang bukai udah bisi nusui ngagai nuan pasal aku?”

Ku saut Pilate, “Kati dalam runding nuan, aku orang bansa Judah? Bansa nuan empu enggau tuai imam sida ti udah nyerahka nuan ngagai aku. Nama pengawa ti udah digaga nuan?”

Ku Jesus, “Perintah aku ukai di dunya tu; enti perintah aku di dunya tu, sida nembiak aku tentu bebunuh ngelaban orang ti nyerahka aku ngagai orang bansa Judah. Ukai, perintah aku ukai di dunya tu!”

Nya alai Pilate lalu nanya baru, “Kati nuan tu rajah?”

“Nuan empu udah madahka aku tu rajah. Aku ada lalu datai ke dunya tu ketegal siti tu bejakuka pemendar. Barang sapa ti enggi pemendar deka mendingka jaku aku.”

“Lalu nama pemendar dih?” ku Pilate nanya.

Udah nya Pilate pansut ke luar baru ngagai sida orang Judah. Iya lalu bejaku, “Aku nadai nemu penyalah kebuah orang tu patut diukum. Tang nitihka adat kita, aku selalu ngelepaska siku orang tutup lebuh maya Gawai Paska. Kati kita deka ngasuh aku ngelepaska rajah orang Judah tu ke kita?”

Sida lalu nyaut enggau nyawa ti inggar. “Anang ngelepaska iya! Kami dekaka Barabas! Nyadi Barabas tu orang penyamun.

Udah nya Pilate ngambi Jesus lalu nyipat iya. Sida soldadu nganyam duri digaga nyadi makota lalu ditangkupka ba pala iya. Sida lalu ngerasukka baju panjai ti ungu ba iya sereta bejaku, “Gayu Rajah orang Judah!” Sida angkat lalu nampar iya.

Pilate pansut ke luar sekali agi lalu bejaku ngagai orang mayuh. “Peda, aku mai iya pansut ngagai kita ngambika kita nemu aku amat nadai nemu penyalah ti udah dikereja iya.” Nya alai, Jesus pansut ke luar ngena makota duri enggau baju panjai ungu. “Peda! Tu orang ti ku kita!”

Lebuh sida tuai imam enggau sida jejaga meda iya, sida lalu bejaku enggau nyawa ti inggar. “Regang iya! Regang iya!”

Ku Pilate bejaku enggau sida, “Enti pia, bai iya ulih kita lalu regang. Aku nadai tetemuka penyalah iya.”

Disaut orang Judah, “Kami bisi adat madahka iya patut kena bunuh laban iya ngumbai diri anak Allah Taala.”

Lebuh Pilate ninga sida bejaku munyi nya, ati iya balat agi takut. Iya pulai ke istana baru lalu nanya Jesus. “Ari ni penatai nuan?” Tang Jesus lalu enda nyaut. Pilate bejaku baru enggau iya, “Kati nuan enggai bejaku enggau aku? Kingat nuan, aku bisi kuasa kena ngelepaska nuan enggau kuasa ngasuh nuan kena regang.”

Disaut Jesus. “Nuan bisi kuasa atas aku laban kuasa nya diberi Allah Taala ngagai nuan. Nya alai iya ti nyerahka aku ngagai nuan balat agi bedosa.”

Lebuh Pilate ninga jaku nya, iya nguji ngiga jalai dikena ngelepaska Jesus tang orang Judah bejaku meradakka nyawa. Ku sida, “Enti nuan ngelepaska iya, reti nya nuan ukai pangan Rajah Besai! Barang orang ti ngumbai diri rajah, nya munsuh Rajah Besai!”

Ninga munyi nya, Pilate lalu mai Jesus pansut lalu duduk ba penuduk balai pechara ba endur ti dikumbai Gabata. Hari maya nya nyau deka tengah hari, iya nya hari sebedau Gawai Paska. Pilate lalu bejaku ngagai orang Judah, “Tu iya rajah kita.”

Sida nyaut iya enggau inggar. “Bunuh iya! Bunuh iya! Regang iya!”

Pilate nanya sida, “Kati kita ngasuh aku ngeregang rajah kita?”

Disaut sida tuai imam, “Kami nadai rajah bukai semina siku Rajah Besai aja!”

Udah nya, Pilate nyerahka Jesus ngagai sida awakka iya diregang.

Sida lalu mai Jesus. Iya pansut ke luar nyan regang diri lalu datai ba siti endur ti dikumbai Golgata. Dia sida lalu ngeregang iya; sida mega ngeregang dua iku orang bukai, siku muak ari sepiak lalu siku ari sepiak, nyadi Jesus di tengah-tengah. Pilate nulis pelekat siti lalu dilekatka iya ba regang nya. Jaku nya munyi tu: “Jesus orang Nasaret, Rajah orang Judah.” Mayuh sida orang Judah macha pelekat nya laban endur sida ti ngeregang Jesus nya enda jauh ari nengeri. Pelekat nya ditulis dalam jaku Hebrew, jaku Latin enggau jaku Gerika.

Tuai imam orang Judah bejaku enggau Pilate, “Anang nulis leka jaku ‘Rajah orang Judah’ tang manah agi nyebut, ‘Orang tu bejaku, aku tu Rajah orang Judah.’

Disaut Pilate, “ Utai ti udah ditulis aku mengkang ditulis.”

Udah nya, sida soldadu ngeregang Jesus. Sida ngambi gari iya lalu magi iya empat, sebagi ungkup siku soldadu.  Sida mega ngambi baju panjai iya ti ditenun nyadi selambar, nadai betulang.  Ku sida soldadu bejaku enggau pangan diri, “Kitai anang nyarikka tu. Manah agi kitai chabut undi sapa ti empu iya.” Utai nya nyadi dikena ngamatka jaku dalam Bup Kudus ti munyi tu, “Sida bedua gari aku enggau pangan diri, lalu bechabut undika baju panjai aku.” Nya kebuah sida soldadu ngereja utai nya.

Bediri ngimbai regang Jesus nya indai iya enggau menyadi indu indai iya, Maria bini Klopas enggau Maria Magdalin. Jesus meda indai iya enggau murid ti dikerindu iya bediri dia; nya alai ku iya bejaku enggau indai iya, “Indu, tu anak nuan.” Udah nya iya bejaku enggau murid nya, “Tu indai nuan.” Kenyau ari nya murid nya mai indu nya diau ba rumah iya.

Jesus nemu lebuh maya nya semua udah tembu magang; nya alai ngambika jaku dalam Bup Kudus nyadi amat iya lalu nyebut, “Aku aus.” Ba endur nya bisi siti bisin penuh ai anggur ti kurang berega. Sida ngerendam bungai karang ba ai anggur nya, disepit sida ngena pating isup lalu dituatka sida ke atas ngagai mulut iya.

Jesus ngirup ai anggur nya lalu bejaku, “Udah tembu!” Udah nya iya nensamka pala lalu mutuska seput.

Bekau udah nya, sida orang Judah minta pemendar ari Pilate matahka kaki sida ti udah kena ukum bunuh lalu ngambi sida ari regang. Sida ngereja nya laban maya nya Hari Lima lalu sida enggai nejuka bangkai nya mengkang di regang lebuh Hari Sabat laban Hari Sabat ti deka datai nya hari ti kudus. Sida soldadu lalu mansang kin sereta matahka kaki iya ti terubah enggau iya ti bukai ti udah kena ukum bunuh sama enggau Jesus. Tang lebuh sida datai ba Jesus, sida meda iya udah mati. Nya kebuah sida enda matahka kaki iya. Tang taja pia siku ari sida soldadu nya lalu ngachuk rusuk Jesus ngena sangkuh. Kemaya nya mega darah enggau ai pansut. Iya ti meda nya lalu nusui awakka kitai tau arap. Utai ti ditusui iya nya amat lalu iya mega nemu diri nusui utai ti bendar. Utai nya digaga awakka jaku dalam Bup Kudus tau nyadi amat, “Siti pan nadai mih tulang iya deka patah.”

Udah nya, Josep ari nengeri Arimatia minta pemendar ari Pilate ngambi bangkai Jesus. Josep tu endang murid Jesus tang iya belalai laban takutka sida orang Judah ti megai kuasa. Pilate ngasuh iya ngambi bangkai nya. Nikodemus, iya ti udah mansang ngagai Jesus lebuh malam hari sama enggau Josep. Iya mai kira 35 kilogram rempah ti champur mor enggau garu. Seduai ngambi bangkai Jesus lalu mungkus iya ngena kain linin lalu dalam nyin diengkah seduai rempah. Nya mih chara orang Judah ngintu bangkai ti deka dikubur. Ba endur nya bisi sebidang kebun ti endur Jesus dibunuh. Ba endur nya mega bisi siti kubur baru ti apin dikena orang. Laban maya nya sehari sebedau Hari Sabat orang Judah, nya alai seduai ngengkahka Jesus ba endur nya.

  

Sitan Nguji Jop

Dulu menya bisi orang siku benama Jop. Iya diau di menua Us, Iya tu orang ke badas sereta lurus, nangika Allah Taala sereta enggai ngereja penyai. Iya bisi tujuh iku anak lelaki, enggau tiga iku anak indu. Iya bisi tujuh ribu iku jelu bedus, tiga ribu iku unta, seribu iku sapi, enggau lima ratus iku keledai. Orang gaji iya mega mayuh, lalu iya orang ke pemadu kaya di Timur.

Bala anak lelaki Jop selalu begintir-gintir nyendiaka pengerami makai besai, lalu semua sida menyadi ti lelaki datai magang. Sida selalu mai menyadi indu sida ngagai pengerami nya. Lebuh pengerami makai besai nya udah tembu, Jop mesanka sida lalu nuchi sida. 

Iya angkat tumu pagi lalu ngenjuk piring tunu ke genap iku bala anak iya, laban ku iya berunding, “Nyangka anak aku bisi udah bedosa lalu nyumpah Allah Taala dalam ati sida.’’ Nya meh utai ti selalu dikereja Jop.

Nyadi sekali lebuh bala orang serega datai ngadap TUHAN, Sitan bisi mega datai enggau sida.

TUHAN lalu nanya Sitan, “Datai ari ni nuan?’’ 

Sitan lalu nyaut, “Aku udah bejalai kia-kia, segau-segau nengah dunya tu.’’

TUHAN lalu nanya Sitan, “Kati nuan bisi udah berundingka nembiak Aku Jop? Nadai orang di dunya ke badas sereta lurus baka iya, ke nangika Allah Taala sereta nyeliahka penyai.’’

Sitan lalu nyaut, “Kati Jop deka nyembah Nuan enti iya nadai bulih utai ari nya? Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu. Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!’’

“Barang ku jaku,’’ ku TUHAN bejaku enggau Sitan.

“Semua utai ti dikemisi iya sigi ba jari nuan magang, tang nuan enda tau ngemediska Jop.’’ Sitan lalu mupuk.

Nyadi sekali, lebuh bala anak Jop benung ngintu pengerami makai besai ba rumah aka tuai sida, siku seruan datai belanda ngagai Jop. Ku iya, “Kami benung ngeradu tanah ngena sapi, lalu raban keledai meruan ba padang rumput semak endur nya. Orang Sabean lalu ngenyit nyerang kami lalu ngerampas semua jelu nya. Sida munuh semua bala orang gaji nuan. Semina aku aja ulih ngerarika diri lalu madahka tu ngagai nuan.’’

Lebuh orang gaji nya agi benung bejaku, siku agi orang gaji datai, lalu bejaku, “Jelu bedus enggau bala pengibun bedus udah dipangkaka ngitar, lalu semua sida mati magang. Semina aku aja agi idup lalu madahka utai tu ngagai nuan.’’

Lebuh orang gaji nya agi benung bejaku, siku agi orang gaji datai lalu bejaku, “Tiga bengkah raban soldadu penyelawai orang Kaldea udah nyerang kami, ngerampas jelu unta, lalu munuh semua bala orang gaji nuan. Kengka semina aku aja ulih ngerarika diri lalu madahka utai tu ngagai nuan.’’

Lebuh orang gaji nya agi benung bejaku, siku agi orang gaji datai, lalu bejaku, “Lebuh bala anak lelaki enggau anak indu nuan agi benung ngintu pengerami makai besai ba rumah anak tuai nuan, kabut ti besai datai lalu ngenyit mangka ari menua puang, numbangka rumah. Semua sida mati magang ditinggang rumah nya. Ka semina aku aja agi idup lalu madahka utai tu ngagai nuan.’’

Jop lalu angkat, nyarikka gari diri, ngukur pala iya, lalu nyungkurka diri ke tanah nyembah Allah Taala. Ku iya bejaku, “Aku ada telanjai, lalu aku deka mati telanjai. TUHAN udah meri, lalu TUHAN udah ngambi. Pujika nama TUHAN!’’ Dalam semua utai nya, Jop enda bedosa, laban iya enda besalah Allah Taala.