Jadam enggau Kechiau Ajih

Jadam tu siku nembiak ke merinsa. Iya diau enggau indai iya ba sebuah kebun mit ba menua ke dikumbai Nanga Kembayau. Seduai iya seruran nadai utai diempa tauka pemakai ti chukup. Nyau nyadi selama seduai ke begantung randuk.

Bisi sekali, seduai udah abis duit. Indai Jadam madahka ngagai anak iya, “Bai sapi nya ke pasar lalu jual iya enggau rega tinggi.”

Jadam berasai lembau amat tang laban ke udah dipejal indai sereta laban ke enggai enda nitihka jaku indai, iya lalu nurun bejalai gupai-gupai ngirit sapi nya. Lebuh iya udah datai di pasar iya lalu ngagai siti keduk besedia deka nyual sapi iya. Sehari enggai iya nganti dia tang tak nadai siku buntak orang deka meli sapi iya nya. Jadam lalu mutus ati deka mai sapi nya pulai.

‘Nadai guna tu. Manah aku pulai, pia nadai mih laku sapi tu.’

Pulai mih tudah Jadam ngirit sapi iya pulai. Benung iya bejalai pulai iya betemu enggau siku orang tuai ke deka meli sapi iya tang orang tuai nya nadai duit. “Aku bisi kechiau ajih ke ulih ngereja mayuh macham pengawa,” ku orang tuai nya. Ninga jaku nya, Jadam pan besetuju nukar sapi iya enggau seleka kechiau.

Datai iya di rumah, indai iya lalu nanya Jadam. “Berapa penyampau duit ulih nyual sapi nya tadi, Jadam?” tanya indai iya. Jadam lalu nyuaka leka kechiau nya ngagai indai iya. Iya lalu nyerita pasal lelaki tuai ke betemu enggau iya tengan jalai iya pulai ke rumah.

“Orang tuai nya udah ngakal nuan nya Jadam! Leka kechiau nya mimit pan nadai beguna ngagai tua. Kapa nuan leka kechiau nya?” ku indai iya. Indai Jadam ringat amat ketegal ulah Jadam nya tadi. Iya lalu ngambi leka kechiau nya lalu nibar leka kechiau nya ke luar penyenguk. Malam nya Jadam enggau indai tinduk mai perut ke lapar laban nadai pemakai. Perut seduai nyau asai dikeruk atau.

Pagi hari siti, Jadam enggau indai iya lebuh ke dani lalu tepedaka sebatang pun kechiau ke besai jentam-jentam tumbuh ba endur indai iya ke nibar leka kechiau nya kemari. Pun kechiau nya tinggi ngerayap dataika langit.

Jadam berasai andal amat ati iya pagi nya. Jadam lalu berunding deka niki pun kechiau nya. Iya pan lalu niki. Makin lama makin tinggi ga pun kechiau ditiki iya nya. Nyau kepuas ke niki iya pan lalu datai ba puchuk kechiau. Dia iya tepedaka sebuah astana ke bisi pintu besai. Jadam lalu masuk ke dalam.

Jadam meratika segenap endur bilik nya. Bilik nya besai amat nyau mesai sebuah balai. Duit mas nyau betemarung sebelah geladak nya. Iya berasai alit ati. Udah ke puas engkining iya pan lalu tepedaka sebuah mija enggau kerusi besai ke enda kala dipeda iya ngelama tu. Ba atas mija nya bisi pemakai ke sedap. Iya nyau berasai lapar lebuh ke meda pemakai nya.

Jadam lalu enda muai peluang. Iya lalu niki ke atas mija nya. Dia iya lalu ngambi sekerat manuk guring lalu deka makai. ‘Untung amat aku nemu beliung enda ngambuh, nemu peredah enda ningkuh,’ ku Jadam bejaku kediri berandau nengali.

Enda mukai-mukai iya pan lalu tedinga munyi ke kuat amat nyau munyi guntur mangka ruang rumah nya. Palik iya ke kiba peda siku antu gerasi benung tinduk ba sukut bilik nya.

Jadam nyau getar-getar asai ke dipandam dada. Iya lalu engkechit nurun ari mija nya. Jadam lalu beguai-guai ngambi beberapa kepin duit mas lalu belanda keluar enggau naka penyampat ari astana nya. Iya lalu berengkah nurun ari pun kechiau nya.

Datai di rumah, Jadam lalu meri semua duit mas nya ngagai indai iya. Enggau duit nya Jadam enggau indai iya lalu meli sapi baru. Lebuh Jadam ke meri duit nya ngagai indai iya, iya sempat nyerita pasal astana enggau antu gerasi nya. Hari siti, iya lalu niki pun kechiau nya baru. Sekali tu dalam astana nya iya tepedaka siku ansa mas ba sepiak antu gerasi nya.

‘Lagi asai ansa nya, aku taban pulai,’pia ku Jadam bejaku kediri, berandau nenggali.

Tang enda mukai-mukai, antu gerasi nya tedani lebuh Jadam deka nguji nangkap ansa nya tadi. Antu gerasi nya lalu ringat. Iya lalu ngagai Jadam. Jadam pan lalu rari belanda penapat-inat nadai beapai nadai beindai. Iya lalu terus nurun pun kechiau nya. Datai di baruh iya lalu begaut ngangau indai iya, “Indai! Jampat baika aku kapak!”

Lebuh indai Jadam tedingaka kangau Jadam nya, iya lalu beguai-guai ngambi kapak lalu belanda-landa nyua kapak nya ngagai Jadam. Jadam lalu ngambi kapak nya ari jari indai iya. Iya lalu terus nebang pun kechiau nya. Kira-kira sejam udah nya, pun kechiau pan tumbang rebah ke tanah. Antu gerasi ke ba pun kechiau nya pan lalu meredup labuh ke tanah. Mati mih tudah antu gerasi nya nyenggai hari, danjan dibai bulai. Kenyau ari sehari nya pengidup Jadam enggau indai iya nyau lantang senang baka orang bukai.