Dayang Racha

Nyadi sekali kelia dunya tu udah rata ampuh bah besai bendar. Semua tuchung bukit ke tinggi ampuh magang laban bah tu, nya ngasuh semua jelu enggau mensia dataika burung abis parai, abis nadai, lesi dibai hari, danjan dibai bulan.

Nyadi bisi indu siku ke benama Dayang Racha enda parai. Iya tepanggai ba atas tuchung bukit siti ke tinggi. Nyau kepuas iya natka diri diau dia, perut iya pan nyau lapar bendar. Nya ngasuh iya nyau keberuran. Semua utai ke tau diempa ti bisi ditemu iya dia baka kulat enggau kantuk-kantuk kayu udah abis magang diempa iya.

Nyadi hari siti, laban enda nemu chara ngaga api, nya alai iya lalau ngusuk rias kayu menua. Nyau kepuas iya udah ngusuk nya, dia dih rampang kusuk iya bisi memurun pansut asap. Meda baka nya, lalu pajakka iya kusuk iya baru. Lebuh iya ngusuk tu, engketik rias kusuk iya lalu kena pukak tudah tuai, api pan lalu menyadi.

Udah iya tau ngaga api, nya baru ati Dayang Racha lantang. Iya nemu diri tentu idup laban ngena api ulih ari ngusuk, iya tau nunu enggau neglulun utai ke pemakai. Nya alai kenyau ari nya Iban lalu nemu menyadika api laban ari penemu Dayang Racha ke ngusuk kelia. Nyentukka kemaya hari tu enti Iban bisi tesat tauka bemalam dalam kampung, lebuh sida nadai machi dia sida ngaga api ari ngusuk nunda asal ti datai ari Dayang Racha.

Tang nyau kelama udah nya, Dayang Racha alit bendar ati ke diri empu laban perut iya mansang besai sebesai. Nyau deka ngelui sembilan bulan perut iya udah kembu, nya baru iya beranakka anank lelaki siku. Nyadi anak iya tu tak timpang, nadai kaki sepiak, nadai lengan sepiak, pichak mata sepiak lalu nadai pending sepiak. Meda anak iya ada timpang, Dayang Racha lalu nempa nama anak iya Simpang Impang.