Apai Saloi Moden nepan bilun

Nyadi jerita tu nyadi ba sebuah genturung pendiau jauh ba menua pesisir di Ulu Batang Sadong. Apai Saloi ke diau dia bisi kena tiket bilun free ke diberi Kompeni Penerebai Bilun Bintang Airways. Iya ke bendar nyadi pengabang ngagai tuai pemesai kompeni bilun nya. Taja pan semina kelas ekonomi, nya kiraka nadai ngawa ba Apai Saloi. Bulih tiket free nya udah chukup ngelantangka ati iya.

Dipandakka cherita, datai mih ba hari ke disemaya, Apai Saloi endang lama udah nganti. Agi bebelam udah nurun ke Kuching lalu bemalam ba rumah kaban iya, Apai Seumang-umang. Hari siti agi dini hari mih iya nurun ke padang bilun antarabansa Kuching.

Lama tudah tuai nganti, laban ke tumu nurun ari rumah. Gagit amai deka nepan bilun. Nyau begeriuk munyi perut laban enda sempat ngirup pagi nya. Nyau bangai tudah tuai nganti. Udah kepuas nganti baru nama Apai Saloi dikangau. 

Nyau enda ingatka jam maya iya patut tama ke bilun. Ninga nama iya dikangau meniga kali nengah lubang ribut, iya pan lalu ngereduas angkat nuju pintu penama ngagai bilun nya.

Bejalai mih tudah tuai gupai-gupai nuju bilun nya. Datai iya tama Apai Saloi lalu terus nudukka diri.

Sebedau bilun bekejang dia penempara bilun lalu berengkah meresa semua penumpang nentuka sida semua duduk ba tempat ke udah diungkupka sida. Sekali penempara nya tepedaka Apai Saloi benung ngeringakka diri duduk ba kelas bisnes. Ke ditemu iya, sehari nya nadai penumpang ba kelas bisnes. Enggau penuh basa penempara nya lalu bejaku enggau Apai Saloi.

"Aya, aya enda ulih duduk ditu. Ulih enda aya pindah duduk ke belakang?"

"Eh.. badas amai orang bilun tu(penempara). Enda ngawa nya endun, aya ngasaika nyamai agi duduk ditu."

Badu enda mih laban ke ba kelas bisnes. Mati akal penempara nya. Udah nya nyau semua penempara enda milih iya ke indu tauka lelaki datai ngagai Apai Saloi ngumbuk iya pindah. Pedis pala bala sida ketegal iya. Sesentimeter pan enggai mih iya mindah.

Pilot ke lama udah nganti deka bekejang, alit ati meda lalu bedau bisi kelai jaku okay ari tuai penempara.

Iya pan lalu pansut meda deka nyidi utai ke nyadi. Siku ari penempara nya lalu nusi utai ke nyadi. Pilot nya pan lalu ngerapat Apai Saloi.

"Aya.. ulih meda tiket nuan?"

Apai Saloi lalu mantaika tiket nya ngagai pilot nya.

"Oo... aya deka ke KL pia?"

"Ya mih anak... "

"Tang aya.. kerusi tu ke Juror aya.  Kerusi belakang nyin  baru ke KL!"

"Au pia iya anak?  Nasit nuan madah anak."