Igat Meli Ketam

Apin lama suba bisi siku orang ke benama Igat deka makai lauk ketam. Pagi nya iya ke pasar borong lalu nuju ke sebuah kedai ke diempu Tauke Ah Bu. Kedai iya bisi nyual ketam.

‘Apek! Aku tu ke meli ketam? Pia ku tanya Igat.

Beguai Tauke Ah Bu nyaut. ‘Bisi aa.Nuan ka ketam bansa nama? Ketam Iban tauka ketam China?’

Igat nyau tekenyit ninga tauke nya bisi ketam bansa nya. ‘Aie! Ketam pan bisi iban enggau china pia apek? Uji nuan nunjuk ngagai aku ni bagi ketam Iban, ni ketam china?

Ah Bu lalu nunjuk ke Igat bansa ketam dua iti nya. ‘ Iya ke dalam kutak ti ditutup nya ketam china. Iya ke nyin dalam kutak ke enda tutup nya ketam Iban la.

‘Lapa mih ketam china ditutupka apek, ketam Iban enda apek nutup?’ pia ku Igat nyau munyi polis ke deka nasat utai.

‘Ukai pia. Enti ketam china nya pansut siku, iya ke bukai nya lalu meda lalu belajarka chara sida ulih keluar ari kutak nya. Lagi nyau kelama-lama semua ketam nya nyau nemu keluar ari kutak. Nyau semua mih keluar,’ pia ku tauke nya nerang ngagai Igat.

‘Bah nama ketam Iban enda baka nya pia?’ ku tanya Igat baru.

‘Ketam Iban tu bisi lain mimit. Enti siku udah ka keluar, iya ke bukai alu narit kaki iya enda ngasuh iya keluar. Tang iya ke udah ka keluar nya pan alu numpu tauka ngetis kaki ketam ke narit iya tadi. Iya ka iya siku aja niki keluar. Pama iya udah keluar nyampau mih iya ka ngajar sida ke dalam kutak, alu lari tabun-tabun,’ ku tauke nya madah sambil tuchum mandangka ngeli ke rabang.

Nyau tegenung baka empelukung mabuh ambuh, ngetu baka puyu mabuh keruh mih tudah Igat. Nyawa nyau rangap-rangap baka ke nganti lalat tama.

Meda Igat lalu bedau milih ketam ke deka dibeli iya, tauke Ah Bu lalu nanya baru. ‘Ni ka nuan dih, Igat?’

Lama ga Igat enda nyaut seleka mukut, enda malas seleka beras. Puas ke tegenung udah nya berunding enda lama iya lalu nyaut.

‘ Enti baka nya ambi ketam China nya mih. Ka nyepi enggi China engka nyamai agi kini, he...he...,’ pia saut Igat sambil ketawa baka ke bisi mai reti bukai jaku iya nya.

‘Barang ku nuan mih Igat. Duit nuan empu, ketam aku empu,’ pia ku tauke nya.

Sehari nya Igat mulai ke diri ke rumah enggau siti teori ke ba runding iya din nyangka bisi pengamat ba pengidup enggau budaya orang Iban. ‘Enti baka tu bisi endar idea dikena aku bejaku enggau bala serumah sereta enggau bala Iban ke sama gawa. China endang lama udah dulu tamadun aruh runding sereta penemu sida enda sebaka enggau enggi kitai Iban. Sida balat agi serakup, sedada sama seati. Enti enda pia nyampau sida ulih mujur minta utai ari perintah sereta teulihka juluk ati bansa,’ pia ku runding ati iya din. Lemai nya tuchum kediri tudah Igat lebuh makai belauk ketam enggau sida sebilik.