NGENGGAM SEMENGAT

Aku bemain di padang ke penuh enggau chapi. Puas ke bemain dia tak pansut siku chapi ti besai sereta chelum ngelintum, bedungguk belakang. Chapi nya tak enda chamang-chamang lalu ngagai aku. Meda baka nya aku lalu rari penapat-inat. Makin aku bebendar agi rari, semakin semak ga chapi nya deka nanduk burit aku. Aku nyau berasai lelak, seput nyau deram-deram. Deka nguji nebah nyawa enggai ga nyadi. Berasai dalam ati aku ngira diri tentu ulih ditanduk chapi nya lagi. Kati ku gaya aku udah nya.

Nasit bendar aku bisi tepedaka anak kayu sepun ti tumbuh ba tisau darung ke renjan endar. Aku lalu nguji empakap ba batang anak kayu nya ti kira mesai ujung lengan. Laban kayu nya ti enda besai, diau nyau lentur ditepan aku. Chapi nya agi mengkang majak deka nanduk aku. Iya ngerunta-runta belanda nanduk pun anak kayu nya. Suah bendar aku nyau deka kena laban tanduk iya lebuh anak kayu ti chundung, silai tunga ngagai iya. Deka aku nginsut niki tinggi agi enggai ga nyadi laban anak kayu nya mit lalu enda tan alai aku. Dia mih aku tayun-tayun, berua kin-kitu seruran deka ditandukka chapi nya.

Bisi ati aku deka terejun rari baru tang peda aku darung ti dipeda alai kayu ke ditepan aku nya udu penalam. Enti sema aku tak labuh ke dalam darung nyin kada enda mati aku ninggang gerugu batu galang. Nyau kebangai berua dia sekali tak patah batang anak kayu ti alai aku engkabit nya. Sepi aku nyau beribut pending aku empa peneras aku ti labuh.

“Apu ...! Mati mih aku tu,” kenu ku ati aku din.

Tak empai tentu berasai, sepi aku tak lalu meredup aku labuh ninggang gerugu batu. “Huuh ...! Parai aku!” pia ku aku manjung madahka diri ti udah labuh terengkah ninggang gerugu batu.

“Imbun, lapa nuan tu!” pia ku nyawa orang didinga aku. Enchelak aku peda aku tak indai aku. Nemu nya labuh ari katil dih aku nya tadi.

“Pulai niki ke katil baru nuan, Jimbun. Nya alai anang tak maringka diri tinduk,” pia ku indai nganu aku.

“ Adih, nasit endar nya tadi tak mimpi. Kuur ... semengat. Naka naka ti nya tadi tak ukai mimpi, kati ku penyadi aku,” ku runding aku. Lama aku enggai tinduk udah bekau nya. “Nadai guna bendar tinduk ba katil enti baka tu,” ku ati aku din. Aku pan lalu angkat kemi.