Jerita tu nyadi dulu kelia. Maya nya kenu ku jerita bisi sigi buah ti nyelai amat. Pun kayu iya tumbuh ba tengah-tengah tasik ledung lelinang . Sapa-sapa ke teulihka buah nya dikearapka ulih mai tuah ngagai orang empu.
Ketegal nya bepun mih cherita pasal siku bujang ke benama Lenggai . Iya tu berasal ari Kalimantan Barat. Taja pan Lenggai orang ke suah belelang sereta berani , tang iya selalu ditinggang penusah.
Bisi sekali Lenggai berunding deka ngiga buah ajih nya. Iya lalu ngaga sebuah kapal layar lalu belayar nyemerai tasik besai. Pejalai iya nujah tasik besai naka pemedis tang Lengai tetap mutus ati. Taja pan udah lama belayar iya lalu nadai tetemuka pun buah ajih. Ujung-ujung nyau deka tiga bulan ke belayar , dia kapal Lenggai enda mukai-mukai lalu masuk ke dalam ulak ai ke chukup kuat . Kapal iya nyau bepusin-pusin enggau linuk amat.
Lenggai naka ulih nguji nyelamatka kapal iya ari penusah nya. Lenggai empu nyau deka lemas . Enda-enda mukai ari perchik ulak ai iya lalu tepedaka sepun kayu tinggi jejentam. Mata iya nyau tegepang lebuh tepeda pun kayu nya. Pun kayu nya baka ke baru ayan ari pusat ulak ai nya. Ba runding iya nya pun kayu ajih ke digiga iya ngelama tu.
Kapal Lenggai nyau mimit da deka ditelan ulak ai nya. Maya ke ngenggam semengat nya mih Lenggai lalu engkechit terejun ke dalam ai lalu berenang enggau penapat-inat nuju pun kayu nya. Datai iya dia iya lalu niki ngagai sebatang dan ke selamat ari ulak ai nya lalu ngetu ngalap enda lama. Udah teulihka pengering dia Lenggai lalu malik kiba malik kanan. Dia iya tepedaka siku burung ti besai amai nepan ba siti dan ke tinggi. Peda iya genggam kukut burung nya besai amat baka ke ulih genggam siku anak menusia .
" Enti aku ulih megai kaki burung nya lagi , tentu aku ulih pulai ke tanah , " telai ati Lenggai .
Dia iya pan lalu berengkah betikika kayu ari dan siti ngagai dan siti sampaika iya nyau semak endur burung ke inggap nya. Dia iya lalu baka kilat nyambar buku ali kaki burung nya lalu begayut dia enggau entap. Burung besai nya mimt pan nadai nyangka utai baka nya nyadi ba iya empu.
Enda lama udah nya burung nya pan terebai mai Lenggai ke bepaut ba kaki iya . Burung nya terebai lalu terus terebai meraka tasik enggau tanah besai, dataika Lenggai nyau berasai ikak sereta nadai daya agi . Kepuas ke terebai, dia burung nya tepedaka sekeda sapi. Burung nya tadi lalu melayang nurun sereta sepantas kilat iya nyambar siku sapi.
Lebuh maya nya mih Lenggai ngelengkaka pegai iya lalu labuh ke tanah enggau likun. Lenggai meratika endur nya dia. Iya balat alit ati meda rampa menua nya. Lenggai bedau kala meda tempat ke manah amai baka nya, pun kayu nyau gadung sereta bebuah lebat. Bunga-bungai nyau cheli-cheli. Lenggai lalu neruska pejalai. Nyau kepuas ke bejalai iya lalu datai ba jalai mit siti ke tumbuh mayuh macham bungai ti mayuh sereta bemacham chura. Iya lalu bejalai nengah jalai nya lalu tetemuka sebuah rumah ke manah . Lenggai terus masuk ke dalam rumah nya lalu tepedaka siku indu dara ke benung ngenahka pemakai.
"Oh!" Tekanyat indu dara nya tadi lebuh iya tepedaka Lenggai bisi ba dalam rumah iya.
"Anang takut , aku enda ngachau nuan. Aku tu enda nemu dini endur aku ke bendar diatu. Aku begunaka pemakai enggau tempat alai tinduk malam tu , " ku terang Lenggai .
Indu nya lalu ngasuh Lenggai duduk sereta meri Lenggai pemakai mimit. Lebuh Lenggai benung makai , indu dara nya tadi lalu madahka diri nya menyadi bunsu tujuh diri menyadi ke diau dalam rumah nya . Enam iku menyadi iya ke bukai udah turun ke umai .
Lenggai pan nusi utai ke nyadi ba iya empu. Nyau jauh lemai dia keenam-enam iku menyadi iya pan pulai . Sida semua gaga amai ati nerima penatai Lenggai sereta ngintu iya enggau manah.
Kenyau ari sehari nya Lenggai pan lalu diau begulai enggau sida tujuh indu dara bungas diri menyadi nya. Ninting hari lebuh keenam-enam iku indu dara nya turun ke umai, Lenggai diau di rumah nyaga adi sida ke bunsu nya. Nyau kepuas indu dara bunsu lalu bisi pengerindu ke Lenggai. Nyadi bisi sekali iya madahka asai ati iya ngagai bala menyadi iya. Sida semua bela besetuju menyadi bunsu sida jadi enggau Lenggai. Lenggai pan besetuju enggau penemu nya.
"Nuan tu deka nyadi sebagi ari kami sebilik," pia ku terang menyadi indu ke tuai. "Tu mih maya iya nuan patut nemu sapa kami tujuh tu. Nyadi kami tujuh tu Bintang Tujuh. Menyadi bunsu kami tu benama Bintang Banyak. Aku enda ulih madah ke nuan lebih ari tu. Beri penyayau nuan ngagai menyadi bunsu kami tu laban iya endang kami sayau amai."
Seminggu udah nya, sida lalu ngintu pengerami melah pinang Lenggai enggau Bunsu Bintang Banyak. Mayuh amai bala pengabang ari rumah-rumah panjai ke semakai enggau sida dikangau ngabang. Beberapa taun udah nya Lenggai enggau Bunsu Bintang Banyak lalu bisi siku anak lelaki ke diberi seduai nama Selamuda. Lenggai ngibun anak iya enggau penuh pengasih sereta penyayau. Bini iya enggau bala ipar nya turun ke umai.
Nyadi Lenggai ke diau ba rumah endang lama udah ditangkan enda muka penutup tajau ti diengkah ba keduk rumah nya.
"Wai laki, besemaya mih enggau aku nuan anang sekali-kali muka penutup tajau tu," pia ku pesan Bunsu Bintang Banyak. "Enti nuan muka tajau nya, utai jai ka nyadi."
Lenggai nurutka jaku pesan bini iya. Taja pia ketegal ke suah ditangkan belama dia Lenggai tak berasai bisi utai nyelai dalam tajau nya.
Asai ati deka nemu utai dalam tajau nya nyau enda ulih diseliahka iya agi.
Bisi sekali semina Lenggai enggau anak iya aja diau ba rumah. Lama Lenggai meratika tajau nya beberapa kali. Asai ati deka nemu utai dalam tajau nya nyau majak ngujung Lenggai enda liat ati. Enggau naka penyimat iya lalu muka penutup tajau nya. Ada tekanyat mih tudah tuai! Nengah mua tajau nya ita tepedaka beribu-ribu iku anak menusia benung kiruh nambak padi. Utai ke ngalitka ati iya nya sida nya dipeda jauh amai ba baruh. Baru Lenggai nemu iya nya ke bendar diau ba endur ke tinggi amai, baka ba sebuah negeri di atas langit. Lenggai irau amai ati lebuh meda utai ke nyadi nya. Iya nemu sapa sida nya. Sida nya mih bala anak mensia ke diau ba bumi lalu semua sida nya benung bendar bekereja.
Lemai nya, lebuh bini enggau keenam iku menyadi iya pulai ari umai, Lenggai nadai madah ngagai sida senentang utai ti udah digaga iya sehari nya. Lebuh maya makai lemai, Lenggai balat amai tusah ati. Enda tentu masuk iya makai lemai nya. Bunsu Bintang Banyak melabaka bisi utai enda manah udah nyadi. Iya lalu begaut nanya Lenggai:
"Wai laki, bisi nuan muka tajau nya tadi?"
Lenggai semina diau diri. Nyau kepuas ke ditanya nya baru Lenggai ngaku bisi muka tajau nya lalu nyeritaka utai ti udah dipeda iya.
"Sulu utai ke dipeda aku nya chukup ngeruga runding aku," pia ke Lenggai madah ke bini iya.
"Oh laki aku, ukai enda aku bisi nangkan nuan enda ngasuh nuan muka penutup tajau nya? Nuan wai laki udah ngereja pengawa ke enda ulih diampun," ku Bunsu Bintang Banyak bejaku enggau sabak-sabak. "Dia nuan enda tau diau enggau kami agi." Bunsu Bintang Banyak duie-duie nyabak sambil nimang anak iya.
"Anakku, oh anakku, enda kala indai terundingka kitai deka beserara. Diatu mih maya iya. Oh! Berasai berat amai penusah aku tu," ke leka sabak Bunsu Bintang Banyak.
Hari siti bini Lenggai begulai enggau keenam iku bala menyadi iya besikap nyediaka perengka ke dibai Lenggai enggau anak iya pulai ke dunya nengah mua tajau nya. Sida semua samabela nyabak duie-duie.
Sebedau beserara akak Bunsu Bintang Banyak lalu nerang ngagai Lenggai:
"Lenggai, nyadi nuan udah nemu kami tu asal ari Bintang Tujuh. Kami meri lalau ngagai bala orang bumai ba dunya din. Giga mih kami lebuh maya malam sebedau tebererak tawas. Enti nuan tepedaka bala kami di langit, kita tau berengkah nanam padi."
Enti kami udah nadai agi dipeda di langit lebuh kita berengkah deka betanam, dia asil iya enda berapa, ukai semina nya nama-nama utai ditanamka kita endang nadai mansutka asil. Lebuh nuan ditu, nuan udah meda kami enda kala diau ba rumah semina Bunsu Bintang Banyak aja ke diau ba rumah.Bunsu Bintang Banyak udah mega nangkanka laki iya ngasuh iya nitihka jaku lalau akak iya nya lalu nusi mega ngagai anak iya pasal Bintang Tujuh ke lalu nyadika malin bala orang bumai ba dunya.
Sehari Lenggai lalu pulai ke dunya. Datai iya ba dunya, Lenggai lalu nusi peneleba iya ngagai sida serumah. Iya nyeritaka iya ari maya iya ngejangka menua laban ke deka ngiga buah ajih dataika lebuh maya iya jadi belaki bini enggau menyadi bunsu Bintang Tujuh. Kenyau ari nya mih kenu ku cherita padi berengkah ditambak enti Bintang Tujuh bisi ayan bekelip ba langit.
No comments:
Post a Comment