Nyadi bisi sekali, Pelanduk bejalai nebing sungai siti. Dia iya tepedaka bala jagu meradai. Jagu nya mayuh bendar. Nyau penuh sungai dia endur sida meradai. Nyadi Pelanduk tu bisi ati deka nyemerai ai nya tang iya enda beranika bala jagu. Iya lalu terundingka siti chara.
“Oh punggal!” ku Pelanduk. “Mayuh bendar bala kita tu peda aku. Tak nyau penuh tebing sungai endur kita. Enti kita deka ngalahka menua orang tentu kita menang.”
“Endang sigi mayuh bala kami tu,”ku Jagu. “Nya alai, nadai menua enda alah laban kami. Dih anak mensia pan takutka kami.”
“Amai pan jara,”ku Pelanduk. “Aku bisi ninga rita pemerani kita. Kita ukai semina mayuh tubuh, ukai semina berani tang kita bisi senyata ngeli enggau iku kena munuh orang.”
“Utai ti disebut dek nya endang amai magang,”pia ku Jagu. “Tang dek apin ninga rita sebengkah. Kami bisi senyata lebih agi ari ti disebut dek nya.”
“Semua nya amai magang,”pia ku Pelanduk nyaut Jagu. “Tang aku sehari tu diasuh perintah kitu. Sida nya deka nemu pemayuh tubuh kita. Nya alai, manah kita berintai ari tebing seberai tu ngagai seberai nyin,” pi ku iya madah ke bala Jagu.
Nama agi dih, berintai mih bala Jagu dia. Nyau baka akit tubuh sida berintai dalam ai. Udah nya baru Pelanduk terejun ngagai pala jagu siku. Iya lalu belabuh ngitung.
“Sa, dua, tiga,” ku iya dia. Lebuh iya niap iya lalu engkechit ga ngagai pala jagu siku-siku. Bendar mih tudah tuai ngitung pala jagu dia. Iya mih nyau datai ba seberai sungai, nyau abis mih pala jagu ditiap iya. Datai dia, iya lalu engkechit niki ke pantai. Iya lalu rakah-rakah ketawa ngenang diri ti udah bejambanka pala Jagu.
“Akai-rai! Nyamai bendar udah ngindik pala kita tadi,” ku Pelanduk nganu bala Jagu dia.
Pedis bendar mih ati bala Jagu dia ninga jaku iya munyi nya.
“Ila asai dek Pelanduk. Kami ipa dek ila. Di tebing kami ipa. Dalam ai kami ipa, dek ila,” ku Jagu.
“Adai pan aku takutka kita nya,” ku Pelanduk. “Amai kita kering beberita kering dalam ai. Uji niki ke tebing kitu. Meda pengering kita,” pia ku Pelanduk nyakap bala Jagu.
Udah bekau nya Pelanduk lalu takut nyangka Jagu tak amat deka bebalaska sida ti udah dikeduanka iya.
Note:
jamban - andau ti digaga ari batang kayu tauka buluh
No comments:
Post a Comment