Empalawa Ridi

Ba dalam babas tuai bisi siku empelawa. Pukat iya besai agi ari pukat empelawa bukai. Dulu apai iya ke ngaga pukat nya. Tang udah nya iya nambah pemesai ngelingi pukat nya.

Empelawa nya belanda-landa enggau jampat ari tengah ke tebing pukat. Iya sikar amat nangkap pemakai. Indu utai ke ditangkap lalu diempa iya kemaya nya. Tubuh iya makin sehari makin besai. Perut iya nyau ridi-ridi. Iya endang kuat makai. Perut iya meruan berasai lapar.

Bisi sekali datai dua iku empelawa ke bukai. Siku ari adap timur lalu siku agi ari adap barat. Kedua-dua empelawa nya deka ngangau empelawa ke beperut besai nya makai selamat. Pengerami nya diatur maya ke sama. Iya nyadi sereba salah asai ke bediri tepantup pala duduk diachuk tuga. Iya lalu nanya sida ke berimbai pendiau enggau iya. Sida mega bisi kena kangau ngabang. Iya ke diau muak ke kiba ngagai pengerami ke ba adapka barat. Jiran iya di kanan ngagai pengerami ke ba adap timur. Empelawa beperut ridi-ridi nya lalu teulihka akal. Iya minta kerejasama sida ke berimbai pendiau enggau iya.

Iya meri tali ngagai bala sida nya. Sapa ke dulu makai dulu narit tali nya. Iya lalu kin dulu. Tali nya diikatka ba perut iya ngambika enda telepas.

Kedua-dua empelawa nya lalu nurun. Lebuh pemakai dinah, empelawa kanan pan narit tali ari adap timur. Maya ke sama mega empelawa kiba iya lalu narit ari adap barat. Empelawa ke ridi-ridi nya enda ulih nitih ke barat. Iya enda sempat muka tali ke ngikat perut iya.

Kedua-dua empelawa nya lalu terus narit tali diri empu. Perut empelawa ridi-ridi nya makin lama makin kena ikat tali nya tadi. Nyau kepuas ke enda mujur narit dia kedua-dua empelawa nya pan ngentu betarit. Seduai lalu bela makai pemakai ke dinah ngagai seduai. “Kuman ulai-ulai, udah makai baru seduai tau pulai,” ku orang ke empu pengerami nya madah. Udah makai seduai pan madahka diri pulai.

Lebuh datai di rumah seduai tepedaka pangan seduai iya empelawa ridi nya nyau luput. Seduai lalu nguji muka tali ke ngikat perut empelawa nya. Tang sayau amat laban seduai enda tebukaka tali nya.

Beberapa hari udah nya baru empelawa ridi nya ngeleda. Iya mujur muka tali ke ngikat perut iya. Kenyau ari sehari nya iya nadai irauka enda makai. Perut iya enda berasai lapar baka selama tu. Punggung iya pan lansau bekau kena ikat tali. Nya alai nyentukka sehari tu punggung empelawa dipeda kitai mit sereta lansau.