Wat Jelapa

Ba sebuah menua ke benama Rantau Kemibit diau siku orang bujang ke patu benama Wat Jelapa. Iya diau kediri seiku-iku seorang-orang ba sebuah langkau apai indai iya. Langkau nya balat bendar udah jai. Dinding iya nyau singit lalu perabung rumah iya tiris lebuh ujan bangat. 

Taja pia semua nya enda dikeibuhka Wat Jelapa laban iya empu endang udu ngelusu ngaga kereja. Nya mih kebuah langkau pesaka ke diwariska iya ari apai indai iya lalu mengkang enda diseruri. Kereja iya besehari-sehari semina masang angan-angan aja. 

Nya mih ngasuh iya balat tebilang ba pelilih menua Rantau Kemibit ketegal ulah enggau perangai iya nyau nyadi ke buah mulut orang. Ke ulu ke ili orang ke bejaku pasal Wat Jelapa. Nadai enda nemu iya orang be menua nya. 

Taja pan baka nya enti maya Wat Jelapa berasai lapar, iya lalu ke kedai makai sereta duduk nganti ngichaka bisi orang ke manah ati deka melanja iya makai enggau ngirup. Nya alai enti bisi orang deka merindang ati, jampat-jampat sida nanya Wat Jelapa senentang angan-angan iya ke baru. Wat Jelapa pan beguai nyeritaka angan-angan iya kelebih agi enti orang nya nanya iya nama-nama pemakai ke dikedekaka iya. 

Wat Jelapa lalu becherita sehari enggai. Lebuh kerebau udah pulai ke kandang, manuk enggau itit udah tama ke dalam kerungan, api udah dipasang, baru iya mulai kediri ngagai langkau iya laban deka nindukka diri. Angin ribut ke bepuput ngelegua mangka langkau arau iya pan enda mih dikeirauka iya. Enti maya langkau buruk iya begegar dipangka ribut nya iya semina narit kain pua ngebabka tubuh iya sambil berangan-angan.

Ku runding iya enti sema langkau iya rubuh tentu orang ke berimbai pendiau enggau dia deka mantu iya ngaga rumah baru. Nadai mih iya kiruh agi deka nyeruri langkau arau iya ke buruk nya. Baka nya mih pengawa tudah Wat Jelapa besehari-sehari. 

Enti nyau nadai orang bisi deka melanja iya makai nya baru iya ngiga kereja. Tang iya tu chukup milih lebuh ngiga kereja. Iya enggai enggau orang turun ke umai laban angat tauka berikan laban takut mabuk ku iya. Nya alai pengawa ke sanggup digaga Wat Jelapa semina niki pun inyak, laban ku iya gawa ba endur nya nyamai, enda angat sereta berangin. Nya pan Wat Jelapa semina ngambi upah niki pun inyak enti sema iya begunaka duit belanja.

Nyadi bisi sekali nasit Wat Jelapa enda tentu manah laban nadai siku orang deka melanja iya makai enggau ngirup. Nadai chara bukai iya nyau dipejal begigaka orang ke deka ngupah iya niki pun inyak. Tang nasit iya sehari nya jai amat laban nadai siku orang begunaka buah inyak. Nya mih tudah tuai bejalai segau-segau sebelah menua nya mai perut iya ke lapar. Lebuh iya ke benung duduk bepikir kediri iya lalu tepedaka siku ini tuai benung nengkadah ke atas meratika buah inyak.

"Ini, kua ka buah niuh? Aku ulih nulung niki," pia ku Wat Jelapa. Ini tuai nya lalu malik ngagai Wat Jelapa.

"Sigi ini ngiga buah niuh uchu, dikena aku nyumai. Ka nyumai kari aku tu lagi uchu. Ulih kua uchu nulung ngulihka aku?"

"No problem nya ini, ulih aja, tang nama utai ulih ini mehi ke uchu kua tu enti uchu nulung ngambi buah niuh nya dah ini?" ku tanya Wat Jelapa.

Ini tuai nya lalu nyaut iya, "Ini adai si mayuh heta ke ulih ini behi. Tang enti uchu sanggup ngambika aku buah niuh nya, ulih mih kua uchu makai sekali enggau ini. Agipan ini ulih mehi kua sekeda telu manuk chu."

"Kapa aku telu manuk nya," ku Wat Jelapa.

"Telu manuk enti diperam kua uchu tau netas. Ulih ga uchu nginang manuk,"pia ku saut ini nya. Puas ga Wat Jelapa duduk berunding dalam ati iya. Kati enti telu nya netas tentu aku ulih nginang manuk ke jual aku.

" Au mih ini. Badas penemu kua nya. Sanggup mih aku niki niuh tu ke ini." Udah iya ke bejaku Wat Jelapa pan lalu berengkah niki pun inyak nya. Lebuh ke niki nya iya endang nadai runding bukai semina bepikirka jaku ini tuai nya tadi. Nya mih ngasuh ati iya balat gidan.

"Enti aku meramka telu nya tentu telu nya netas. Ulih mih aku ngelakka raban manuk nya ngeranjai sebelah laman langkau aku sampai sida besai. Enti udah besai bisi mih ke empa aku." 

Puas ke berunding dalam ati iya pan lalu malik ngagai ini lalu bejaku, "Enti telu manuk nya netas ulih mih aku makai manuk nya ney, ini?" 

Ini tuai nya alit ati tang iya lalu terus nyaut. "Betul chu. Nama mula," 

Sambil Wat Jelapa berangan-angan, iya majak niki pun inyak nya. Makin lama makin tinggi. "Tang enti aku ngelakka manuk nya betelu tentu majak mayuh manuk aku netas. Enti pia tentu aku ulih mayuh dagin enggau telu ke empa aku.Tang enti nyau kelalu mayuh tentu tusah ga aku nyaga iya. Manah agi aku nganti manuk nya enggau kambin tentu mayuh agi untung. Ulih ga aku ngelakka bala kambin nya ngiga pemakai ngelingi langkau aku dia. Enda mih aku kiruh niki pun niuh agi. Aku pan enda kiruh nyaga manuk ke mayuh nya." ku pikir iya baru. 

Udah ke bepikir baka nya iya pan lalu malik baru ngagai ini nya lalu bejaku "Enti manuk nya aku jual ulih ga aku meli kambin, amai enda ini?" 

Ini tuai berasai deka ketawa ninga jaku Wat Jelapa nya tang taja pia iya terus nyaut "Amai nya chu. Nama mula." 

Makin lama makin tinggi ga Wat Jelapa niki. Makin tinggi makin balat agi ga iya berangan-angan,"Enti aku udah mayuh kambin, aku ka nganti iya enggau sapi. Agipan sapi gemu agi sereta mayuh agi dagin iya. Tentu aku betambah kaya sereta dipebebasaka orang." 

Sekali agi iya malik ke baruh meda ini nya, "Kati enti aku nganti kambin nya enggau sapi tentu badas agi , ya ni?" ku iya nyerauh ke baruh. 

Ini nya terus nyaut "Betul nya chu. Nama mula," ku saut ini tuai nya sambil tuchum lelegup, nyau dipeda gusi iya ke nadai agi ngeli nya. 

Nasit bendar Wat Jelapa udah jauh ba atas pun inyak, nadai mih iya meda ini nya ke ketawa ke iya. Nyau balat agi Wat Jelapa berangan-angan, "Enti sema aku udah ulih nupi sapi, tentu aku ulih ngupah orang nyaga sapi aku nya dataika iya beranak. Nyadi enti aku teulihka mayuh sapi tentu aku deka nyadi kaya. Enda ibuh mih aku kiruh bekereja agi . Udah nya ulih mih aku nupi kerebau ila." Sekali agi iya nyerauh ke baruh, "Oh ini! Enti aku udah mayuh sapi ulih aku nganti enggau kerebau ga ye, ini. Kaya mih aku maya nya." 

Sekali agi ini nya nyaut, "Betul nya chu. Nama mula." "Enti uchu udah kaya tau uchu bebini." tandu iya baru. 

Wat Jelapa nagunka pala iya, "Bebini!" Iya lalu terus niki tinggi agi ninggalka ini iya ba baruh.

Ya!Ya! Enti ngelama tu nadai indu dara ke bisi ati ke iya laban ke merinsa mensena. Udah tu ila tentu berebut-rebut mih bala indu dara gilaka iya enti iya udah kaya ila. Maya nya ila tentu iya nyau nadai hari bepangan enggau bala indu laban iya udah kaya lalu tentu iya ulih milih sapa ke tau nyadi bini iya ila. 

Ya! Ya! Udah tentu iya enda milih indu sengapa nyadika bini iya. Tentu iya milih anak raja. "Ini! Enti aku kawin enggau anak raja." ku iya nyerauh ke baruh. Saut ini nya nyau rampas didinga laban iya udah jauh tinggi di atas pun inyak. "Tentu aku deka mayuh anak." ku runding iya baru tuchum-tuchum. "Sida ila tentu nyau belanda kin kitu, inggar baka burung makai buah kara. Bini aku tentu bisi ati dekaka emas lalu minta ari aku tang aku enggai meri. Enti iya mut-mut iya aku tampar baka tu." 

Seraya iya ke nyebut nya Wat Jelapa lalu ngelepaska berap iya lalu nampar pelepah inyak nya sambil merak "Anang nuan sepeneka ati minta barang emas ari aku," lalu kemaya nya nyau ngereduas tudah tupai siku ke benung belalai ba selepak pelepah inyak nya. Nyau tekenyit Wat Jelapa ketegal tupai nya. Wat Jelapa lalu tebelengka pegai iya ari pun inyak nya. Enda mukai-mukai lalu labuh mih iya ari pun inyak nya datai ke baruh, meredup baka buah inyak tuai munyi tudah Wat Jelapa. 

Tekenyit ini tuai nya meda Wat Jelapa labuh. Iya lalu beguai-guai belanda nuju Wat Jelapa lalu deka nulung tudah tuai. Tang nadai nasit laban Wat Jelapa udah lesi dibai hari, danjan dibai bulan. Tak mati dia mih tudah tuai. 

Nama mih penyadi tudah Wat Jelapa ke gila berangan. Pengujung iya pulai mih tudah tuai ke Serawai Mandai Betangga Tunggang betemu enggau sida aki Ajan Panjai Lengan.