Dom Tanggang

Talang enggau Deruma bisi siku anak lelaki benama Dom Tanggang. Pengidup sida sebilik udu merisa. Nyadi Dom Tanggang suah amat bemimpi deka nyadi orang ke kaya sereta tebilang.

Bisi sekali, Dom Tanggang tepedaka sebuah kapal besai benung sangkai ba nanga sungai ke enda jauh ari rumah iya. Dom Tanggang lalu bejalai ngagai Jeragan kapal nya lalu minta gawa dia. Jeragan kapal nya terus besetuju nerima iya gawa dia laban ninga pengelandik Dom Tanggang merau sereta bekereja.

Taja pan apai iya Talang sereta indai iya Deruma enda tentu besetuju ngelepaska Dom Tanggang bekereja ke tasik nitihka kapal Jeragan nya tang seduai iya nadai kuasa ngetanka iya. Dom Tanggang besemaya deka pulai ke menua enti sema iya udah kaya jemah ila.

Dom Tanggang ngaga sereta nitihka semua pengawa ti diasuhka kereja Jerugan. Jeragan nya rindu amat meda ulah sereta pemagas iya gawa. Nya alai, Dom Tanggang pan diambu iya nyadika anak ambu.

Lebuh Jerugan nyau tuai sereta nyau enda bepengerai, dia Dom Tanggang lalu dipadu iya nyadi jeragan ke baru. Dia iya lalu digelar Jeragan Tanggang. Dom Tanggang landik sereta pandai bedagang. Nama iya lalu pegari tampak rita. Ketegal nya iya lalu dikangau nemuai ngagai Sultan ke istana.

Enda lama udah nya, Dom Tanggang pan bebini enggau anak Sultan. Dom Tanggang lalu mai bini iya belayar ngagai mayuh endur ba serata negeri nya.

Bisi sekali, kapal Dom Tanggang sangkai ba nanga sungai menua asal iya. Orang menua iya nemu jeragan kapal ke sangkai nya Dom Tanggang. Sida pan lalu madah ngagai apai indai iya.

“ Anak tua udah pulai. Aram tua meda iya” ku Talang.

“ Ya, aku lelengau amat ke Dom Tanggang. Aku ninga iya diatu udah kaya, “ pia ku timbal Deruma enggau ati ti gaga.

Seduai iya pan lalu ngayuhka perau seduai nuju kapal Jeragan Tanggang. Maya nya mega Deruma bisi mai lauk ke dikereinduka Dom Tanggang, iya nya pisang salai. Lebuh datai ba kapal, dia bisi siku anak kapal ke gawa maya nya nagang seduai niki.

Enda lama udah nya lalu ayan mih Dom Tanggang enggau bini iya.

“ Sapa orang tuai dua iku tu?” tanya Dom Tanggang ngagai anak kapal iya.

“ Sida madahka diri apai indai nuan tuan,” saut anak kapal nya.

“ Amai kini seduai tu apai indai nuan sulu ?” tanya bini Dom Tanggang.

Dom Tanggang berasai malu deka ngaku orang tuai dua iku nya apai indai iya. Ketegal tusah enggau pemerinsa dia pendiau Talang enggau Deruma tampak bendar tuai sereta merinsa dipeda mata.

“ Apai indau aku? Oh, ukai! Sulu, aku udah nadai agi apai indai. Seduai tu ukai apai indai aku. Anang ngasuh seduai tu niki ke kapal !” ku perak Dom Tanggang ngagai bala anak kapal iya. Mua iya nyau mansau baka undang kena sumai laban malu sereta muras.

“ Oh, anakku, Dom Tanggang! Aku tu mih indai nuan. Aku bisi maika nuan pisang salai ke dikerinduka nuan, nak “ ku Deruma.

“ Nyau seduai ari tu!” ku perak Dom Tanggang. Iya lalu malu jari indai iya ke nguji empikil ba burit kapal. Tebelengka jari iya ari burit kapal nya. Salai pisang nya tadi lalu diambi indai iya lalu dibuai ke tasik. Talang enggau Deruma berasai sinu sereta ringat amat. Seduai nadai naga anak kesayau seduai selama jeman udah berubah. Nadai ku enggau pia ku ati apai iya. 'Kitai datai mai pengasih tang iya meri jaku jai,' ku apai iya bejaku dalam ati diri, berandau nenggali. Endang baka ke deka ngamatka jaku sempama tuai, kudi memuri hari enda ujan, ikak lelanggak ikan enda ngaban. Seduai iya pan lalu merau ke tebing.

Kiraka selumpung tenggau seduai melaki bini pan lalu datai ba tebing. Udah seduai datai ba tebing, Deruma lalu nengkadahka ke langit. Sambil ngangkat kedua-dua jari dia iya lalu besampi “ Oh, Petara! Tunjuk mih ngagai Dom Tanggang nya kami duai tu apai enggau indai iya.”

Enda mukai-mukai seraya nya ga guntur lalu memunyi, nitar lalu manchar. Ribut lalu bepuput enggau naka peneras, ngelegua mantai gelumbang. Kapal ke benung belabuh dia nyau gilik-gilik. Lebuh maya nya mih, Dom Tanggang berasai nesal. Nama mih penyadi asi udah nyadi bubur. Iya nyau nemu Petara udah nyaut sampi indai iya. Dia mih iya deka nerima balas ketegal jai enggau apai indai.

“ Oh, indai! Ampun mih Dom. Dom ngaku, Dom mih anak indai! Indai,oh indai!' rauh-rauh Dom Tanggang ari kapal sambil ai mata nerutu baka terutu leka ujan.

Tang Dom Tanggang udah laun. Dom Tulah. Ribut terus bepuput besereta enggau ujan. angin ngelegua mantaika gelumbang. Angin ribut besereta enggau gelumbang besaup mantaika pengeringat. Gelumbang ke kuat lalu mecahka kapal iya. Lebuh ribut badu bepuput, kapal Dom Tanggang udah nyadi batu. Semua anak kapal iya mega bebali nyadi batu. Dom Tanggang enggau bini iya mega nyadi batu.