Bisi Ditu Kita Baya?

Sehari bekau udah bejambaka bala Baya, dia Pelanduk berasai aus bendar. Giga iya sungai nadai ga tetemuka sungai. Bukit turun, bukit tiki nengah menasan jalai jani. Nyau kelama iya bejalai nya baru iya datai ba telaga. Telaga nya besai bendar. Ai iya chiru amat nyau baka chermin.

“Oh ai! Kati bisi Baya dia?” ku iya nanya ai. Enda ga ai engkeretik. Dini ai nemu nyaut iya. Kangauka iya baru tang nadai ga ai nyaut.

“Tentu bisi Baya dalam ai tu,” ku Pelanduk. “Ngelama tu enti nadai Baya tentu ai nyaut aku,” ku iya.

Ninga jaku Pelanduk munyi nya, dia Baya ke ngipa dalam ai lalu nyaut. “O-ot,” ku iya.

“Ah!” ku Pelanduk. “Endang amat bisi Baya dalam ai nya. Betul bendar sangka aku.” Iya lalu rari ari endur nya.

Pedis bendar mih ati Baya ensepi diri udah dikeduan Pelanduk baka nya. Baya nya tadi lalu mindah ari nya. Iya lalu ngipa Pelanduk ba madang buan. Pelanduk nyau lapar bendar. Iya mansang nuju madang buan ti endur Baya ngipa. Datai iya dia, iya lalu nanya madang buan.

“Oh Buan! Kati bisi Baya dia?” pia ku tanya Pelanduk. Madang buan enda nyaut iya.

Nyadi Baya ke ngipa endang seruran nganti Pelanduk nya semak. Kangauka Pelanduk baru nadai ga pun buan nyaut iya. Nyau kepuas iya ngangau dia iya lalu bejaku.

“Tentu bisi Baya dalam madang buan nya. Enti nadai Baya tentu pun buan nyaut aku,” pia ku Pelanduk.

Ninga munyi nya, Baya ke belalai nya arapka jaku Pelanduk. Iya lalu nyaut. “O-ot,” ku iya dia.

“Nyah. Bula jaku aku?” ku Pelanduk. “Endang sigi bisi Baya dia tadi. Iya lalu rari ari endur nya.

Pelanduk tu tadi nyau lapar selapar laban lama udah enda makai. Iya mega nyau aus laban enda ngirup. Mupuk mih iya bejalai ngiga pemakai. Nyau kelama nya baru iya datai ba madang bemban. Tang enda mukai-mukai sebedau Pelanduk nanya bemban dia, dia Baya lalu nangkap kaki iya.

“Oii nama utai ditangkap nuan nya aa?” ku Pelanduk. “Salah nya. Bemban ditangkap nuan nya. Kaki Pelanduk enda,”ku iya.

Ninga jaku Pelanduk munyi nya, lalu dilengkaka Baya kaki iya. Pelanduk lalu engkechit rari ari nya. Pedis bendar mih ati Baya ensepi diri udah dikeduan Pelanduk baka nya.

Pelanduk lalu bejaku baru. “Oh Bakih,” ku iya. “Enti kita nyengala deka munuh aku, badas kitai bepantap. 

Nuan nesau semua kaban nuan. Aku nesau kaban aku. Endur kitai bepantap ba rantau nyin,” pia ku iya.

“Au mih,” ku saut Baya.

Chukup hari nitihka semaya sida deka bamuk, Pelanduk tu tadi tumu-tumu nurun ngagai rantau nya. Datai iya dia, peda iya bala Baya apin datai. Dia iya lalu ngaga bekau kaki iya. Nyau lunyau rantau nya dia laban bekau kaki iya. Udah tanah lunyau iya lalu mulaika diri.

Enda lama udah nya, bala Baya pan datai. Nama agi pemayuh bala Baya. Datai sida dia, sida lalu tepedaka bekau kaki Pelanduk.

“Apu tu salah kitai,” ku Raja Baya. “Bala Pelanduk tu udah datai ditu. Nyadi kitai tu laun. Nya kebuah sida enda nganti kitai.”

Meda bala Pelanduk nadai dia, bala Baya pan mupuk pulai ke menua sida. Mimit enda mih sida nemu diri udah dikeduan pelanduk.