Bujang Embup

‘Adai ku tan, lelak amai gawa umai baka tu. Manah aku menaun ngagai menua bukai ngiga pengawa ke nyamai agi dikereja. Enda tan tulang tu dibai kereja umai,’ pia ku Bujang Embup. Bujang Embup tu mih siku bujang ke diau kediri-diri seiku-iku seorang-orang ba sebuah langkau sepintu selawang-lawang. Pengawa Bujang Embup baka orang bukai mega, bumai betaun. Datai hari nurun, nurun mega iya ke umai. Iya tu enda siku bujang ke bagas gawa, nya alai utai ditanam iya nyadi bendar.

Tang sehari nya iya udah mutus penemu diri deka ngiga pengawa ke menua bukai. Iya lalu betambit pintu bekaling alu. Mupuk mih tudah bujang tu tadi bejalai ke menua bukai. Empai lama iya udah ngejangka langkau iya alai iya besatup enggau Igat Embing.

‘Oi chak! Nama gaga dek dia?’ pia ku tanya Bujang Embup.

‘Eiee anang inggar dek aa, chak! Ngasu aku tu aa, ngipa jelu,’ ku saut Igat Embing.

‘Tau aku enggau dek, chak?’ ku Bujang nanya Igat.

‘Nama nyalah dih, chak, enti dek ka. Tang anang inggar, enggaika jelu lari ninga tua legi,’ ku Igat Embing.

Lama bendar seduai ngipa dia lalu nadai mega jelu ngampir. Nyau kelama dia Bujang Embup lalu bejaku kediri berandau nengali. ‘Ukai utai dikereja main ngasu baka tu. Masau hari muai awak ngapa, nadai ga utai ulih,’ ku iya bejaku kediri berandau nengali.

‘Tak nadai ngampir jelu tu, chak,’ ku Igat Embing.

‘Dek baka ke nemu utai ke dirunding aku. Enti jelu nadai ngampir, aku kiraka enda enggau dek ngipa ditu,’ ku Bujang Embup.

‘Ya lapa dih dek?’ ku Igat Embig. Bujang Embup ngenjing enda nyaut tak lalu mupuk kediri. Angkat iya ari nya, iya lalu betemu enggau Asu Rangka. Asu Rangka benung reredup ngelumparka kayu. 

‘Nama gaga dek chak?’ pia ku tanya Bujang Embup.

‘Eh, ngelumpar kayu tu, chak. Nadai repik kayu ba para dia,’ ku saut Asu Rangka.

‘Tau aku nyilih dek melah kayu, chak,’ ku Bujang Embup.

‘Tau chak, ah! Gaga endar aku enti dek deka nyilih enda lama,’ saut Asu Rangka.

Bujang Embup lalu belabuh melah kayu. Peda peluh iya ngenjing bepanchur nurun mua. Peluh dada tau alai gayau angkat engkasak. Peluh tubuh tau alai enseluai betanjak.

‘Ukai pengawa dikereja melah kayu tu. Tau patah tulang belakang dibai nukup kayu,’pia ku Bujang Embup bejaku kediri berandau nengali.

‘Endai, lelak dek chak?’ ku Asu Rangka.

‘Lelak, chak ah! Ikak tulang tu, deka ngiga pengawa ke nyamai agi aku tu,’ ku saut Bujang Embup.

‘Barang ku dek mih dia. Nadai nemu nagang dek,’ku timbal Asu Rangka.

Iya lalu ngelengkaka kapak. Udah nya iya lalu ngejangka Asu Rangka. Empai lama udah nya, iya lalu ninga utai serap-serap dalam babas. Peda iya Aya Makup ke serap-serap dalam babas.

‘Nama gaga dek dia aya?’ ke Bujang Embup merak Aya Makup. Endang udah nemu tudah aya tu orang ke enda tentu ninga.

‘Es ah! Sida ke indu enda mukai-mukai tak tetenggukka madu renyuan,’ku Aya Makup nyaut. ‘Nama utai ulih! Indu renyuan selabubu siang hari tu. Enda ulih alai muar idang,’ku Aya Makup.

‘Tau aku nyaup nuan aya?’ ku Bujang Embup.

‘Nama nyalah nya dih. Enti dek berani ke indu renyuan!’ ku Aya Makup.

Bujang Embup lalu berengkah muar idang renyuan. Peda selabubu indu renyuan begau lalu malut mua iya. 

‘Akai dai, parai aku tu. Ukai utai dikereja pengawa tu,’ ku Bujang Embup bejaku kediri berandau nengali. ‘Manah aku nikal baru lalu bumai betaun baka selama.

Bujang Embup lalu bejalai beguai angkat ngejangka endur nya. Datai iya di menua lama, iya lalu bumai betaun baka orang mayuh. Nya alai udah nya bulih mih iya padi laban nya ga endang batang pengawa ke dikemeranka iya selama umur kena ngidupka diri. Lantang mih iya diau enda segau-segau, iya ga bisi pemakai diempa. Ukai ke chukup agi, nyau bisi lebih. Iya ke lebih nya dijual iya ke pasar. Pama amat ga orang bujang tu bisi bendar ulih ari bumai.

(Diambi sereta dibali ari Nendak Lumur 5)