Sambe Kena Akal Joy

Udah sebulan nandan di langit,udah sebulan nampun di bukit dia Pelanduk pan lalu gerai. Laban ke udah gerai iya lalu mai Tekura bejalai. Bejalai mih seduai sehari-hari nya. Bukit turun bukit tiki nengah menasan jalai jelu. Hari pan nyau ngalih, pejalai Tekura makin lubah ke lubah. Nyau kelama iya madahka diri enda dapat bejalai agi. Ninga munyi nya, Pelanduk lalu belabuh tusah ati.

“Tusah endar tua tu Joy. Udah aku, nuan ga sakit,” ku Pelanduk.

Tekura lalu ngalika diri ba teluk bandir. Sereta iya gali lalu dut-dut madahka nyawa diri parai. Sinu meda iya sakit, dia Pelanduk lalu nanyaka utai dikedekaka nyawa iya.

“Nama utai deka diempa nuan deh Joy ?” ku Pelanduk nanya Tekura. Nyau kesal bendar mua Pelanduk. “Anang enggai madah Joy. Enti tetengukka daun riang, lagi aku ngiga. Barang utai masuk ba nyawa, anang enggai madah. Nuan ga udah ngidupka aku. Tu aku ga ngidupka nuan,” ku Pelanduk.

“Nyelai endar utai ke tengukka nyawa aku tu Sambe,” ku Tekura.

“Nama utai nya dih Joy ? Padahka mih,” ku Pelanduk.

“Tak tetengukka atau gayau nyawa aku tu Sambe,” ku Tekura.

Lama Pelanduk enda engkeretik, enda nemu jalai ngulihka atau gayau. Gamal Tekura pan mansang lembut-salembut. Mata bekalih, dilah nyelar.

“Tusah endar laban Joy tu. Nama penyadi aku tu lagi enti iya tak parai,” ku ati Pelanduk. Iya pan lalu engkelak munyi ke masak chagak bedil temaga, manjung munyi ke masak kelutung besi kemuja. “Nuan nganti ditu, Joy. Aku ngigaka nuan atau gayau,” ku iya nganu Tekura.

“Pia mih,” ku tudah Tekura.

Pelanduk pan engkechit lalu bejalai sehari-hari nya neresap nengah kampung jerung. Nyau ke lama iya pan rembus ba tebing sungai. “Nama menua tu kini ?” ku ati iya. Iya lalu nudukka diri. Dia iya malik ke kiba, malik ke kanan lalu tepedaka tupai baru deka niki batang nyiur.

“Nuan nya Po ! Nama pengawa nuan dia ?” ku Pelanduk nanya Tupai.

Malik Tupai meda Pelanduk duduk enda jauh ari pun nyiur nya. “Eh, ka niki buah inyak. Tetenguk meda buah iya nyin,” ku Tupai.

“Pama enti nuan deka muaika aku sigi, Po. Aus endar nyawa tu,” ku Pelanduk.

“Nama nyalah nya dih, ukai pedis ningkil sigi ke dek,” ku Tupai.

“Tang enti nuan muaika aku lagi, ai iya buai dulu Po. Mina isi iya deka diempa aku. Tebuk nuan ari burit. Udah ai iya abis, nuan lalu tama dalam nyin. Ari dalam buah nyiur, nya baru nuan ngetas tampuk iya,” ku Pelanduk ngajar Tupai.

“Pia mih Po,” ku tudah Tupai.

Tupai lalu niki ke puchuk nyiur. Datai di puchuk lalu nebuk sigi. Sereta ai nyiur nya udah abis, iya lalu tama ke dalam buah nyiur nya. Ari dalam buah nyin, nya baru iya ngetas tampuk buah nya nitihka ajar Pelanduk. Sereta tampuk nya putus, buah nya pan labuh nabanka Tupai lalu betul-betul ninggang tengah-tengah sungai. Sereta buah nyiur nya terengkah ba sungai nya lalu disambar gayau, lalu ditelan iya enggau Tupai-tupai dalam nyin.

Terubah Tupai masuk dalam perut gayau nya, iya apin nemu diri, laban endang agi kesal ditabanka buah nyiur nya ke labuh. Udah iya dua tiga kali nyintak seput diri, ensepi tak sendat asai, nya baru iya nemu diri dalam perut utai. Tang enda nemu orang ke empu perut alai iya tama. Iya lalu ngerit-ngerit perut gayau nya ari dalam nyin. Nyau ke lama iya ke ngerit nya, perut gayau nya pan kebus. Iya lalu mansutka diri muyur-uyur laban darah gayau. Gayau nya semina sempat ngelanggarka diri ke tebing lalu mati.

Tupai lalu manjung. “Idup nyawa !” ku iya malik ngagai Pelanduk ke dugau-dugau ba tisi tebing nganti iya ke pansut ari dalam perut gayau nya tadi.

Meda gayau nya mati, Pelanduk lalu rakah-rakah ketawa. Iya lalu beguai-guai muntas perut gayau nya ngulihka atau iya. Sereta tembu ngulihka atau nya, iya lalu beguai-guai nabanka nya pulai ngagai Tekura. Udah jauh, nya baru iya malikka belakang ngangauka Tupai.

“Jimat-jimatka nuan enti sema agi niki Po. Enggaika labuh,” ku iya. Iya lalu belanda nabanka atau gayau nya.

Pedis endar ati Tupai diakal iya. “Bangkal dek nya Pelanduk, pechah perut dek. Ila asai dek,” pia ku Tupai mutap kediri.

Nyau lemai hari, nya baru iya datai ba Tekura ke nganti iya ba teluk bandir. Agi jauh, Pelanduk lalu ngangau.

“Oi Joy, agi idup nuan ?” ku iya.

Tekura enda nyaut. “Parai Joy tu,” ku ati iya. Datai dia, meda Tekura ranggak-ranggak, pala melulur, nyawa bepupu.

“Nadai mih Joy tu,” ku iya gut-gut. “Enti Joy tak mati, aku ga nengali atau gayau tu,” ku iya bejaku kediri. Ninga Pelanduk deka nengali atau gayau nya kediri, nya baru Tekura lalu matak rekung diri begadai-gadai. Nya baru Pelanduk nemu iya agi idup meda iya tau engkebut.

“Joy, agi ngelala nuan aku ?” ku iya. Saru tudah tuai, laban ati udah kelalu kesal.

“Akai-rai Sambe. Kada aku tu idup. Tak tepenat asai isi tu,” ku Tekura.

“Tu atau gayau Joy. Uji perangapka nyawa nuan. Aku nyapi nuan,” ku Pelanduk.

Tekura lalu nukangka nyawa diri naka-naka iya deka besai. Pelanduk lalu majakka atau gayau nya ngagai nyawa iya. Tiga kali Pelanduk majakka atau gayau ke dalam nyawa iya, iya pan lalu manjung madahka diri enda kala mati.

“Inggar endar nyawa nuan Joy aa. Meda tadi tak suma didinga,” ku Pelanduk.

“Sigi baka Bujang Lembau,” ku Tekura. Lese-lese mua Pelanduk dikeduan iya. “Sama mih pemintar tua Sambe. Nuan nemu ga ngakal aku, aku ulih ga nipu nuan.”

“Semina mimit aja nuan alah laban aku, laban nuan enda tegar belanda,” ku Pelanduk nganu Tekura.

“Apin temu mih, utai apin diuji kah...kah...kah,” ku Tekura. Seduai lalu sama ketawa.