BELABAN ENGGAU ANTU

Sehari nya aku mutus deka bejalai ngulu ai Batang Panggau Libau. Bejalai mih aku sehari-hari nya ; malam hari bemalam ga aku. Lebuh tawas hari bejalai ga. Enda berasai aku pan nyau udah bejalai lapan hari lapan malam. Hari kelapan baru aku datai di entigis Ulu Panggau, ba bukit Gemong Lemungut, Tuchong Ubah Ribut.

Angkat ari nya, niki bukit nya sehari-hari nya mih. Iya mih hari nyau kira maya ngulihka manuk lemai, nya baru aku datai di tuchung. Udah nya aku lalu ngaga langkau hari pan nyau malam ga. Udah makai, udah apa indah, iya lalu tinduk. Kira maya tengah malam dinga tinchin aku bejaku : “Apai-apai ! Dani dek apai ! Antu, apai, antu ! Angkat dek apai !”

Aku lalu ngereduas angkat, lalu merejukka ke mua langkau. Peda aku Antu naka pemesai utai, Antu Galau Gerawan. Angka bulih enam depa peninggi antu nya, lalu pemesai iya bisi tiga pemerap.

Dinga Antu nya lalu belagu : “Hah ham ! Hah ham ! Legi ensepi asai dek Telajan, nyamai dipakai nyaman dipakan !”

“Apu, pama antu nya, tak ngelala aku. Nama aku disebut iya. Sepi asai dek lagi. Antu Galau Gerawan dek mungkal nanjal aku, mansang mih dek kitu. Enda aku rarika dek.”

Aku lalu angkat sambil nangkin nyabur chudur. Jengkau sangkuh lalu pegai aku terabai. Ada dianti aku dia mih antu nya. Datai antu nya enda chechamang lalu nyamah sereta nangkap aku. Tak lalu ditelan iya aku nya tadi enggau terabai-rabai enggau sangkuh-sangkuhi. Ensepi diri udah ditelan antu aku lalu mali diri nyadi tekang api ke menjadi mau. Pelaba aku antu ensepi perut diri asai ke ditunu lalu diluaka iya aku tadi.

Pansut mih tudah aku ari perut antu. Nadai muai awak aku lalu berimba nebang kaki antu. Pantap enda ulih, tumbuk enda ga telih. Ensepi baka nya, lalu lekaka aku sangkuh enggau nyabur. Tak dipegai aku kaki antu nya, lalu dibiau aku ke baruh, peda kayu abis tumbang, biau aku ke atas lalu tusur bukit abis ngeruang. Biau aku ke ai pechah batu galang. Dinga antu ada rauh-rauh dinsahka aku semalam-malam nya.

“Parai aku uchu Telajan ! Parai aku uchu Telajan ! Badu agi uchu ! Badu,badu. Saru aku uchu ! Isa aku meri dek pengaruh batu gamang pengerak bala. Udu kering mih dek tu uchu ila. Empai mih aku kala dinsah iban asai dek tu uchu,” ko iya.

Udah nya badu aku mangkaka antu nya. Peda tudah antu melulur dilah nyauka parai. Lalu ambi aku ai dipanjahka ba mua antu. Nya baru iya angkat. Udah nya lalu diulihka iya pengaruh batu gamang ari bungkus rajut, lalu disuaka iya ngagai aku.

“Tu uchu, enda mudah batu gamang tu enti dikirah dek, lalu simburka dek ai iya, lalu datai magang semua indu utai ke tau nyengat. Tu mih kena dek ngelaban munsuh. Nadai tan mih iban dilaban dek tu uchu. Tu aku udah alah laban dek.”

Udah nya pulai mega antu, hari pan nyau tawas. Udah tembu makai pagi, aku lalu ninjau ngagai menua iban ke deka dituju iya.

(Dibali ari Moses anak Beti, Telajan, BLB, 1963)