Batu Kudi Kuyat

Cherita tu bepun ari pemati raja Punan siku ti benama Uyong Kanggan. Nitihka adat Punan, raja sida ke mati bangkai sida nya enda ditumbak tang dulu disalai. Kira chukup dua-tiga bulan bangkai ke udah disimpan nya pan lalu ditulang. Tulang nya tadi lalu disimpan ke dalam tiang. Lebuh ke nulang nya sida nirika gawai besai dikumbai Gawai Nulang.

Lebuh Uyong Kanggan nya tadi mati, dia iya endang diintu ngena adat ke selama mega. Udah chukup ba maya ke nyalai enggau nulang sida pan nirika Gawai Nulang. Baka ba maya gawai bukai mega, orang rami amat makai, bebuti enggau ngirup.

Kira nyau udah tengan ngalih hari maya gawai nya ke nyadi, benung orang nyau richah rami, betundi bebuti enggau pangan diri dalam rumah nya alai datai kera dua iku ti disebut kuyat dalam jaku Punan. Kuyat nya tadi endang tak besirat baka bala pengabang bukai mega. Sereta datai, seduai endang tak enda chechamang lalu enggau orang mayuh ngirup enggau bepakaika utai dia. Seduai mega ngumbaka pemanchal seduai ti endang kena mega lalu engkechit kin kitu sambil tak bepechalka tusu orang ke indu.

Meda utai nyelai baka nya, dia orang dalam rumah nya pan lalu begau sereta lalu ketawa senaka iya. Indu nembiak, tuai biak bela sama bakalekik ketawa betempik pangan diri. Bisi sekeda ke ngerara pan lalu sama ketawa mega dia. Sekeda nya nyau nabanka diri bepichit perut ketawa ke bilik empa pengeli ati tepedaka ulah kera nya ke tak nemu bepechalka tusu sida ke indu baka nya.

Nyadi sekumbang bala pengabang nya tadi ti begau sereta richah rami ketawa enggau pangan diri, dia alai kuyat dua iku nya tadi pan tak lesap nadai temu tunga agi. Ari pemayuh sida dalam rumah panjai nya, siku pan sida nadai ga tepedaka penunga pengelenyau kuyat dua iku nya tadi. Sekiraka antu mih kuyat dua iku nya kini, laban tak tau lesap tekala nya.

Apin bangat lama udah bekau nya orang mayuh ti begau tachuh riuh ketawa sambil betegenung berundingka pengelesap kuyat dua iku nya tadi, dia hari pan lalu berupai bebali bebuat kudi. Langit ngenjing chelum ngelintum baka burit kali, ribut bepuput udu peneras mangka rumah panjai nya. Guntur temepur, ngitar nyambar, ujan batu pan ngenjing bekesetak ninggang atap enggau gelegar tanju. Kabut sereta enggau ujan udu pemalat ti ngujungka rumah panjai nya lalu tumbang sereta bebali nyadi batu ti belubang besai.

Nya mih pengujung Rumah Uyong Kanggan, nyau bebali nyadi batu kudi sama sereta enggau orang ti ngulu pengerami Gawai Nulang. Batu rumah nya agi mengkang tau dipeda dataika sehari tu lalu dikumbai Batu Kudi Kuyat. Baka nya mega lepung siti ti dia lalu dikumbai Lepung Kuyat. Nambahka nya sungai dia lalu dikumbai Sungai Kuyat dataika sehari tu. Batu Kuyat nya laban ti belubang besai lalu nyadika endur burung lelayang betansang.