Nyadi jerita tu nyadi dulu kelia ba menua bala Iban. Bisi siku orang lelaki ke benama Stor bebini ngambi siku indu ke benama Melaia. Nyau kelama udah seduai udah begulai, nyau beranak dua endur Melaia parai nyenggai lemai,danjan dibai bulan. Iya lalu ditumbakka Stor ba endur siti ti dikumbai iya Senuan.
Udah pemarai Melaia laban anak iya ke biak agi nusu iya seruran nyabak berari laban patah ai tusu. Nembiak mit nya enti lemai nyabak,enti lemai nyabak. Nyau kepuas ke nyabak, endur anak ke tuai iya bisi ninga indai seduai iya ngangau.
“Oh anak,enti adi nuan nyabak, anjung ngagai aku. Lakka aku nusuka iya ditu.”
Ninga kangau indai munyi nya, aka mit nya lalu ngajung adi iya ke Senuan awakka indai nusuka iya.
Nyadi hari siti udah indai nusuka anak mit nya, iya lalu bejaku enggau anak iya ke tuai agi. Ku iya, “Seduai adi nuan anang sekali-kali makai buah sebengkah ke kena pansa seduai pulai mansang kitu ke enda jauh ari tisau Senuan tu.”
Nyadi hari siti,dianjungka aka baka selama ga adi iya mansang nusu ngagai indai ke Senuan. Lebuh iya nganti adi iya ke nusu iya lalu bemain sebelah Senuan. Lebuh iya bemain tu, iya lalu tepansaka lemayung semadang bebuah. Lalu diambi iya buah nya lalu diempa iya laban perut iya ke nyau lapar. Sekeda buah nya bisi mega dibai iya pulai ke rumah. Udah adi iya tembu nusu iya lalu mai iya pulai ke rumah baka selama.
Datai di rumah, aka lalu meri adi iya makai buah lemayung nya tadi. Nyadi pagi siti nyau lapar adi iya. Aka iya lalu mai iya ke Senuan baru. Datai seduai din seduai nadai meda indai seduai agi. Dikangauka seduai nadai ga indai seduai iya nyaut.
“Kati alai indai nadai temu?” ku anak tuai iya gut-gut bejaku kediri berandau nenggali sambil nyabak.
Udah nya iya lalu bisi ninga munyi nyawa indai iya tang nadai meda tubuh iya baka ke selama. “Lapa indai tu nyau enda ulih dipeda,” ku iya bejaku dalam ati.
“Badu enda mih anak, ni seduai agi tau meda aku. Seduai ga udah makai buah lemayung nya. Nya kebuah kita ke idup enda ulih meda kami ke udah mati,” ku indai seduai.
Indai seduai lalu ngasuh seduai pulai tang iya bisi meri pesan ngasuh seduai madah ngagai apai seduai. “Tang tusui ngagai apai seduai, aku ditu nyau puas diau ngelaban ujan laban iya lalu enda ngagaka aku sungkup.”
“Ni gamal utai ke benama sungkup dih indai?” ku tanya anak iya ke tuai.
“Gamal iya berayuk-rayuk, betangkal enggau bepenjuang,” ku saut indai. “Udah sungkup nya tembu gaga iya, asuh unsut iya enggau kapu champur beting enggau buah jelagam awakka iya bisi linsu,” ku indai iya. “Udah tembu, sungkup anjung kitu lalu tanam atas lubang aku. Tang apin iya nanam, sungkup nya enda tau enda dulu digeselan enggau darah manuk,” ku iya.
Udah pulai anak iya ari Senuan, seduai lalu nusui pesan indai ngagai apai seduai. Ninga nya Stor lalu ngiga kayu ke digaga iya ke sungkup.udah tembu nya ukir enggau linsu iya, sungkup nya lalu dianjung iya ke Senuan nitihka pinta bini iya Melaia.
- lemayung - jungle palm
- sungkup - small house place over grave at ghost festival (Gawai Antu)
- bepenjuang - having braces on both legs
- berayuk-rayuk - broadly crowned and shady
No comments:
Post a Comment