MAYAU BEMUNSUH ENGGAU CHIT

Dulu kelia, Mayau enggau Chit tu bepangan bendar dataika seduai iya begulai tinduk begulai makai. Nyadi tu cherita ti madahka kebuah alai Mayau enggau Chit badu bekaling enggau pangan diri agi.

Nyadi sekali, bisi siku chit diau begulai enggau pangan iya mayau. Seduai iya berumah dalam lubang kayu ti besai, lalu jauh mega ari orang bukai. Ngelama seduai iya udah begulai, sekali pan enda mih kala mansutka jaku jai nganu pangan diri. Genap hari seduai iya endang nurun bejalai ke kampung ngiga pemakai.

Hari siti, lebuh seduai iya bejalai ngiga pemakai, dia seduai iya bisi tepedaka budu dagin jelu ti udah dipachak orang enggau garam. Gaga mih ati seduai iya meda diri nemu utai baka nya. Ku ati seduai iya, dagin nya deka ditaruh ngambika bisi ke pemakai seduai maya hari udu ujan ila. Maya nya ila pemakai tentu pedis bendar alai ngiga.

Dagin nya tadi lalu ditaruh seduai iya dalam lubang kayu. Udah nya seduai iya lalu angkat pulai ke rumah.

Nyau kelama udah nya, tudah Chit tu tadi bisi berunding deka nguji ensepi asai dagin ti ditaruh seduai iya nya suba. Nyau kepuas iya berunding deka makai dagin nya, iya pan bulih runding siti.

“Pagila aku deka nguji ensepi dagin nya,”ku ati iya. Liur iya lalu neritik ngenang diri deka makai dagin nya.

Nya alai hari siti Chit tu lalu madah ngagai Mayau, iya enda ulih enggau bejalai ngiga pemakai sehari nya. Iya udah dipadahka bala chit bukai, kaban belayan iya bisi parai, lalu iya deka enggau sida bukai nya nganjung antu.

Mayau lalu tusah ati ninga pemarai kaban Chit munyi ke dipadahka nya. Iya pan lalu enda mega mai Chit bejalai sehari nya.

Nurun dih tudah Chit tu tadi. Iya enda enggau orang nganjung antu. Iya bejalai nuju pun kayu ti endur seduai iya ngelalaika dagin. Datai din, iya lalu berengkah makai dagin. Udah iya kenyang, pulai ga iya ke rumah seduai iya.

Enda lama udah bekau nya Chit lalu bejaku baru enggau Mayau, madahka diri pedis isi, pedis pala enggau pedis perut. Iya madahka diri deka berubat ngagai dukun. Amai mega iya munyi nya, tang tuju ati iya endang sigi deka napatka pun kayu nya tadi, ngambika ulih makai dagin ti tinggal dia. Nyadi sekali tu, iya makai dagin nya sampai abis. Mimit pan nadai mih agi tinggal.

Nyadi hari siti, dia Mayau bejaku ku iya, “Semua pemakai tua tu udah abis, lalu kampung pan basah endur ngiga pemakai. Badas tua ngambi dagin ke ditaruh tua dalam lubang kayu suba.”

Seduai iya lalu mupuk ga bejalai begadai-gadai berimbai-rimbai nuju pun kayu nya tadi. Nyau kelama, seduai pan datai ba pun kayu nya. Tudah Mayau lalu ngachukka jari iya ke dalam lubang kayu nya. Tang jari iya nadai tegamaka utai. Udah nya baru iya tepedaka bekau kaki Chit ba mua lubang kayu nya. Iya lalu malik ngagai Chit.

“Nuan tu mih ke enchuri dagin tua ditu,” ku Mayau nganu Chit dia. “Aku ngelama tu arap bendar ke nuan, tang nuan udah ngemula ke aku. Nuan makai dagin melakangka aku. Nuan tu mih jelu rangka. Nya alai enti baka tu parai mih tua laban pemakai nyau nadai agi. Dagin tua abis ditenggali nuan kediri,” pia ku Mayau nganu Chit.

Ati iya bangat pedis bendar. Iya lalu deka nerekam tudah Chit. Tudah Chit tu lanchat bendar, nya alai iya lalu engkechit tama lubang kayu nya.

Lalu belabuh ari maya nya, Mayau endang selalu begigaka Chit, laban deka bebalaska diri ti udah diakal siku nya. Nya mih kebuah pun Mayau bemunsuh enggau Chit.

(Dibali ari Nendak Lumor 1, Borneo Literature Bureau)