Tesat Dalam Semengat

Sepengudah makai malam, endang baka selama kami sebilik begumpul ba lawang meda cherita ba televisyen. Enda lama udah nya aku pan berasai ngantuk. Engka ketegal kelalu lelak laban sehari-hari nya sekula kami bisi ngaturka lumba darat entara rumah. Aku lalu tama ke dalam pangking. Nindukka diri.

Ngalihka tengah malam dia aku berasai aus asai ke deka ngirup ai amai. Aku pan nguji muka mata aku lalu angkat sereta deka nyingkang dia aku berasai tekenyit, tegepang. Nadai utai dipeda. Petang tegayam.Taja pia aku nguji ngemeranika diri bejalai belubah-lubah begada-gadai ngiga pemegai pintu. Aku ke bejalai nyau baka orang ke buta.

Enda lama udah nya aku ngasaika seput aku nyau rapas lalu jari aku asai ti bisi dientunka orang. Lebuh aku malik ke belakang dia aku tepedaka siku orang benung ngerising, ngeli betaring, mata melut meda aku. Meda utai baka nya aku pan lalu ngelengensai angkat lalu belanda enggau penapat inat ngelarika diri.

Ketegal ti kelalu lelak aku lalu ngenudukka diri ba tisi pun tiang. Lebuh aku malik ke kiba enggau ke kanan dia aku ngasaika diri ukai ba rumah agi tang ba pendam. Tiang ti alai aku nyandih ukai tiang tang pun kara. Meda baka nya aku lalu berengkah ngelarika diri baru.

Benung aku ti belanda enda berasai kaki aku tetebakka kerimpak kacha. Enggau ai mata naya nerutu mua aku majakka pelanda aku pia ga ngetatka telih pia ga tubuh asai ti rajai disayat empasan bai ngerembang babas. Sepemuas aku ti belanda aku pan rebah lalu enda nemu diri.

Maya nya aku bemimpi asai ke tepedaka bulan kembung, Terang manchar mua aku. Enda berasai ati aku sinu ngenang penusah diri. Enda nemu dini endur. Benung aku bepikirka sida indai aku dia aku ngasaika tubuh aku digusakka orang. Mua aku berasai ditatak orang enggau ai. Tekenyit! Lebuh aku enchelakka mata dia aku tepedaka sida indai aku. Baru aku nemu aku nya bemimpi tesat dalam semengat.

Dikarang: Ainie Lamet (SMK TAR)