Anak Dayang Racha anak iru Indai Jebua

Simpang Impang tu anak Dayang Racha asil ari ketik rias kusuk. Nyadi Simpang Impang mansang besai sebesai. Nyau besai iya, indai iya Dayang Racha pan lalu mai iya angkat ari tuchung bukit, mulaika diri ngiga endur diau ke baruh.

Datai di baruh bukit, nyau kepuas seduai bejalai, nya baru seduai bisi nem abi kaki orang bukai. Seduai lalu ngiga endur orang nya diau. Nyau kelama udah nya baru seduai bisi nemu endur orang. Nyadi orang tu mayuh bendar laban sida ku sida idup laban niki ke tuchung bukit ke pemadu tinggi di menua sida empu. Simpang Impang seduai indai iya lalu diau ngulai orang dia.

Nyau kelama seduai udah ngulai orang, orang deka bendar ketawa ke gamal Simpang Impang ke timpang. Lebuh bemain enggau nembiak bukai ti sama bela enggau iya, deka bendar orang mantah gamal iya dataika Simpang Impang nyau malu bendar.

Nyau kepuas iya malu ke diri ti diketawaka orang, dia iya berunding deka munuh diri. Ku ati iya, ‘idup pan aku nadai ga guna laban gamal aku diberi Petara enda sebaka enggau gamal orang bukai. Nyamai agi aku mati.’

Nyau kepuas iya berunding besehari-sehari kediri diketawaka orang, iya lalu berunding deka ngeraratka diri ngena latuh ke tasik awakka mati. Puas iya berundingka nya. Hari siti iya lalu ngaga akit. Ku ati iya, ‘ngena akit tu aku berarat ngilika sungai awakka rembus ke tasik lalu parai tepawah kinkitu dibai ai.’

Udah tembu akit digaga, Simpang Impang lalu ngeraratka diri ngili sungai. Nyau kelama udah iya berarat, iya mansa pendai siti ti alai indu siku benung mandi. Indu nya tepedaka iya ke benung rarat.

‘Kini nuan wai?’ ku indu nya nanya iya.

‘Aku tu deka rari berarat ke tasik awakka mati.’

‘O, nama main nuan deka munuh diri baka nya?’ ku indu nya.

‘Peda nuan gamal aku tu tak enda sebaka gamal enggau kita mayuh nya. Idup pan malu mih,’ ku saut Simpang Impang.

‘Ni nuan tau baka nya dih,’ ku indu nya nyaut iya. ‘Manah nuan jadi anak aku.’

Simpang Impang madahka diri enggai laban iya endang udah putus ati deka munuh diri. Indu nya lalu ngumbuk iya enggau naka ulih. Nyau kepuas seduai bebujuk nya baru Simpang Impang ke seruran nyabak pan nyau deka ga diambi nyadi anak indu nya. Indu nya pan lalu mai iya niki ke rumah ke alai iya ngelantangka ati Simpang Impang. Lemai nya udah tembu makai, indu nya madahka nama diri Indai Jebua, Bunsu Tikus lalu iya madahka diri bisi anak tujuh iku. Indai Jebua lalu madahka diri deka ngiru Simpang Impang ke anak nambahka anak iya bukai nya. Belabuh ari sehari nya Simpang Impang lalu nyadi anak iru Indai Jebua, Bunsu Tikus.