Asal Iban Bulih Padi

Pagi siti udah sida menyanak badu makai, Indai Jebua ngasuh Simpang Impang diau ba rumah ngibun bala adi iya tinggal iya turun ngiga pemakai ke sida. Simpang Impang diau di rumah ngibun bala adi iya nitihka atur indai iya. Nyadi lemai siti, lebuh indai iya pulai ari tanah, peda Simpang Impang utai bai iya tak upa padi, leka padi enggau macham utai bukai baka leka entimun enggau upa-upa.

Nyadi hari siti lebuh Simpang Impang benung berapi ba dapur, peda iya bala adi iya tak bebali bebulu lalu meragau sebelah bilik baka gamal anak tikus. Meda sida meragau, iya lalu ngerara enda ngasuh sida agi meragau baka nya enggaika nempuh periuk ke benung melidih. Sida menyadi ngenjing enda ngasi mimit. Nyau kepuas iya udah ngerara sida, iya pan lalu ngauk ai asi ngena tiluk lalu disimbur iya ngagai sida. Sida lalu betu memagang kena simbur ai asi nya. Nya ke ngasuh sida nyabak balat bendar enda ulih dikemaduka laban lukus.

Nyau lemai hari pulai mih indai sida ke turun. Agi jauh iya udah ninga bala anak iya ngejing baka rit nyabak. Datai di rumah iya lalu nanyaka kebuah sida nyabak ngenyadi nya ngagai Simpang Impang.

‘Eh, badu enda mih indai,’ pia ku Simpang Impang, ‘sida kelalu manchal. Nya alai abis nempuh periuk asi ke benung melidih. Nya ngasuh sida lukus.’

‘Bula Simpang Impang nya indai, iya ke manjah kami enggau pupu asi,’ ku saut siku ari anak iya.

Ninga jaku anak iya munyi nya, Indai Jebua lalu bejaku. ‘Enda nyadi main nuan ngenyai nya ati enggau anak aku dih Simpang Impang. Enti baka tu nuan enda tau lalu ke anak aku. Abis anak aku mati dibunuh nuan ila.’ Indai Jebua lalu ringat bendar ngagai Simpang Impang.

Pagi siti, udah sida badu makai, Indai Jebua lalu bejaku, ‘Nuan Simpang Impang enda tau ke anak aku agi. Nuan enda tau enda angkat ari tu lalu pulai ke menua nuan empu.’

Iya lalu bedua reta iya ke tanda iya udah buya ngiru Simpang Impang ke anak. Pesaka beri iya nya padi tiga leka ke mesai buah embawang.

‘Pesaka tu taruh nuan manah-manah ke tanda nuan udah nyadi anak aku.’ Udah nya iya lalu madah ngagai Simpang Impang endang pengawa peturun iya idup makai padi.

Udah Simpang Impang nyambut leka padi nya, iya lalu mupuk bejalai ngema perengka.