Bunsu Ribut Kena Tunggu

Bejalai mih Simpang Impang sehari nya. Nyau lemai iya pan lalu ngetu ngaga dunju daun tepus endur iya bemalam di rantau jalai. Pagi siti, udah mela diri iya mupuk bejalai baru sehari-hari nya. Nyau lemai hari iya ngaga dunju baru endur bemalam.

Pagi ketiga udah iya tembu makai, Simpang Impang mupuk bejalai baru. Bejalai iya sepagi-pagi nya. Nyau tengan niki mata hari, iya lalu ngetu laban tulang iya nyau ikak bendar. Panas bisa bendar. Lebuh ke ngetu dia iya lalu berunding. ‘Nadai guna ga aku agi bejalai jauh ari tu. Manah aku lalu diau ditu.’

Iya pan lalu berengkah beramu kena ngaga langkau arau ke endur iya diau. Langkau iya tembu hari pan malam ga.

Pagi siti kira nyau tinggi hari, hari pan bisa bendar ga panas, Simpang Impang lalu berunding, ‘manah jembi enggau leka padi pesaka ke diberi indai.’ Iya lalu ngambi leka padi ke mesai buah embawang nya lalu dijembi iya ba atas puchuk tunggul. Nyau kelama leka padi udah dijembi iya endur ribut datai lalu muputka leka padi. Leka padi iya lalu labuh ke tanah lalu belah sereta bebali nyadi mit mesai leka padi kemaya hari tu. Meda leka padi iya belah, ringat bendar Simpang Impang. Iya lalu nyumpah ribut.

Ringat ketegal nya, hari siti iya nurun ngagai rumah orang ke enda berapa jauh ari langkau nya. Datai iya din, iya lalu madahka penusah ati diri laban ribut udah muput lalu melahka leka padi pesaka ke diberi Indai Jebua. Iya lalu nanyaka penemu orang dia sekalika iya patut nunggu ribut laban iya ke balat ngerugika iya. Orang madahka iya endang patut nunggu ribut laban iya bangat enda beadai-adai muput lalu ngerusak leka padi iya.

Ninga jaku orang mayuh munyi nya, Simpang Impang lalu ngangau deka ngempuruka semua mensia ke ditemu iya, semua jelu, antu bukit, antu langit, orang tanah enggau orang ai. Nambahka nya Sengalang Burong, Lang Betenong, Keling, Bunga Nuing, Anda Mara enggau Sempulang Gana pan sama bela bisi dipadah datai magang.

Udah terentak datai magang semua orang ke kena tesau iya, Simpang Impang lalu nusi kebuah diri ke ngempuruka orang mayuh.

‘Aku ke ngempuru kita mayuh kitu laban tusah bendar ati, laban ensana, lebuh aku nyembi padi aku ba puchuk tunggul, ribut tak datai enda beadai-adai lalu muputka leka padi aku, lalu mechahka iya labuh ke tanah. Padi nya ukai padi sengapa tang padi pesaka diberi Indai Jebua Bunsu Tikus ke pemai aku, ke tanda aku udah diiru iya ke anak. Nya alai tusahka nya aku lalu nemuai kia-kia nanyaka runding pangan pasal jalai ngaduka utai nusah tu. Ku semua orang ke udah enggau aku betemu nadai enda ngasuh aku patut nunggu Bunsu Ribut. Nya alai baka tu, kita bukai ke empai enggau aku betemu pan bela udah magang bisi ditu. Aku ka nanyaka runding kita jalai aku ngaduka penusah tu enggau Bunsu Ribut.’

Ninga jaku Simpang Impang nya, orang mayuh bela nyaut madahka patut bendar Bunsu Ribut kena tunggu laban iya bangat enda bebasaka utai orang. Udah jaku sida serakup ngumbai nya ngena, sida lalu nganjung seruan kin kia. Jaku asuh sida anjung seruan munyi tu; Bunsu Ribut deka nganti leka padi Simpang Impang ke udah perah tang enti iya enggai nganti, Simpang Impang deka nyerang lalu ngalahka rumah Bunsu Ribut.

Orang lalu nganjung seruan ngagai Geranjang enggau Semada Balu. Seruan dua iku pan bejalai bebendar. Lemai baru seduai datai ba Rantau Tapang. Dia seduai belangkau lalu bemalam dia. Langkau seduai nya dikumbai langkau tunggu alai betandan mansang nunggu.

Seduai lalu bemalam dia malam nya. Sereta tawas pagi siti, seduai pan bejalai baru. Kira baru ngalih hari, seduai lalu datai ba sebuah tinting ke dikumbai Tinting Unsut Entemut, Tatai Panjai Giut Giut. Ba tengah tinting nya endur rumah Bunsu Ribut ke gila bepuput surut mansang. Iya mega digelar Raja Besin ke bemain niti batang, Bunsu Bua ke mangka besundang luntang.

Datai seduai dia lalu niki. Peda seduai ruai jebung enggi Bua Angin Nyabong agi digantung upung gagang pinang, ruai besai enggi Bua Biau Balai agi dianchau tikai baka ke baru pulai puang pengabang. Meda seduai tak lalu niki, nyapa mih dih Bunsu Bua ke gana-gana mangka tegalan.

‘Nama pejalai seduai uchu?’ ku iya.

‘Bisi pejalai mih kenduai tu aki, diasuh bala mayuh beseruan suh dek. Kenduai tu datai nunggu dek laban dek udah muput lalu mechahka leka padi Simpang Impang ke dijembi iya atas puchuk tunggul kila ensana jauh,’ ku saut Geranjang enggau Semada Balu.

‘O pia, nadai mesai nya kebuah mih seduai tu dih uchu. Ukai semina nemuai ngapa, deka nunggu aku seduai,’ ku saut Bunsu Ribut. ‘Kati alai Simpang Impang enda nemu nya endang pengawa aku ke bepuput enda ngetu bap langit tu,’ ku Bunsu Ribut nganu seduai. ‘Enti iya nyembi utai ke diguna, lapa enda nyembi nya di tanju, jembi manah-manah awakka aku ngelala nya utai diguna. Nya dijembi iya ba atas puchuk tunggul, ni aku ngelala dih,’ ku Bunsu Ribut. Seduai nadai engkeretik ninga Bunsu Ribut bejaku.

Bunsu Ribut lalu madahka diri enggai ngisi tunggu nya lalu enggai nganti leka padi Simpang Impang laban penyalah nya ukai enggi iya. ‘Nya alai baka tu uchu, nadai ku enggau mih.’ Puntan baka menasan jalai jelu, labah baka buah merunjau ulu mih pejalai Geraranjang enggau Semada Balu.

Ninga saut Bunsu Ribut munti nya, Geranjang enggau Semada Balu lalu mulaika diri ngagai bala mayuh. Nyau lemai seduai pan datai ba langkau tunggu iya nya ba Rantau Tapang. Peda seduai bala besai endang udah datai magang nyurung kia.

Lansa Penerang:

1. Ari Simpang Impang orang Iban belajar nemu nunggu pangan diri ke bisi salah.

2. Enti orang Iban mansang nunggu, sida enda tau enda ngaga langkau ke dikumbai langkau betandan mansang nunggu. Semak pan alai nunggu; langkau enda tau enda digaga nunda adat seruan Simpang Impang mansang nunggu Bunsu Ribut.