Nyerang Bunsu Ribut

Malam nya orang lalu begempuru alai ningaka saut Bunsu Ribut ari Geranjang seduai Semada Balu. Seduai madahka Bunsu Ribut enggai ngisi tunggu lalu enggai nganti leka padi Simpang Impang ke pechah dipuputka iya. Kebuah alai iya enggai, ku seduai nusui, laban penyalah nya ukai enggi iya, tang salah Simpang Impang ke pechah nya ukai enggi iya, tang salah Simpang Impang. Bunsu Ribut endang enda ngetu bepuput berari ari bap langit tu. Enti Simpang Impang nyembui utai ke diguna iya enda tau enda nyembui manah-manah awakka nyamai dikelala orang, ku saut Bunsu Ribut munyi ku ditusui seruan ngagai orang mayuh dia.

Simpang Impang lalu nadai runding bukai lebuh ninga saut Bunsu Ribut. Iya lalu mai bala mayuh ngalahka rumah Bunsu Ribut. Udah jaku Simpang Impang mutus mai ngalahka rumah Bunsu Ribut, bala mayuh pan lalu belaturka tubuh diasuh ngambu dulu ke bala sida.

Hari tawas, bala pan lalu mupuk. Datai sida baruh Tinting Kuning Unsut Entemut, Tatai Panjai Giut-giut, sida ke dulu pan lalu nguji nikika tinting. Lebuh sida baru datai ba tengan tanah, tak lalu ngelagua Angin Raga baka baya pansut ari lubuk, sedandang Angin Kenchang baka lang nyambar manuk. Dia ribut lalu bepuput entula alai, Bua mangka bebiau balai. Sida ke bejalai nya pan nanka diri ama bediri ama ngerayap. Bisi sida tekebu kena pangkaka ribut, bisi sida lalu tepelanting ke lebak, enda tetanka diri agi. Nyadi sekeda sida ke belindung ba lengkap nguji ngerayap.

Meda nya lalu betekan Ribut Selatan ari dan melanjan birung, lalu nempekang angin kenchang ari batang tapang betenung. Dia ribut ke bepuput beambi-ambi bua ke bepangka hari kudi. Kena pangkaka ribut nya bala sida ke mupuk ngambu dulu nyau abis tepelanting. Bisi nya abis rebah lalu abis tegali. Bepuput ribut enggau naka pemalat. Sida ke bebaring nya bisi patah kaki enggau jari. Barang ke agi dapat mupuk ga ngerayap ke tinting.

Nyau kelama udah nya baru sekeda sida nuntung baruh kaki atap Bunsu Ribut. Datai sida din, dipenyadika sida sempun kulit engkajang deka nunu rumah Bunsu Ribut. Meda sida deka nunu rumah iya, Bunsu Ribut lalu ngetu bepuput. Iya lalu ngangau enda ngasuh sida Simpang Impang datai jari ba rumah iya.

Simpang Impang lalu niki ke rumah. Datai dia, Bunsu Ribut lalu merap iya sereta ngasuh iya duduk. ‘Nama laya tua Simpang Impang alai nuan bangat ngeras nya deka ngalahka rumah aku enggau tubuh mua pemayuh? Enda nuan nemu kami duai apai nuan Kusok tak naka iya bepangan enggau diri sama diri?’ ku Bunsu Ribut. ‘Enti iya makai, aku ga muput ngambika iya mau.’

Ninga jaku Bunsu Ribut munyi nya, ngenung Simpang Impang baka empelekung mabuk ambuh laban kenyau ari mit, iya enda nemu diri bisi apai. Indai iya, Dayang Racha nadai kalai nyebut nya. Bunsu Ribut lalu nusui ngagai Simpang Impang nya apai iya Bunsu Api ke beranakka iya enggau Dayang Racha.

‘Nyadi laban nuan anak Bunsu Api, nya alai nyentukka uchu ambu nuan ke dudi hari enda tau enda nyembah Petara ngena api.’

Udah nya baru Simpang Impang madahka kebuah iya datai deka nunggu Bunsu Ribut ari tegal leka padi pesaka iya ke pechah kena puputka ribut.

‘Ni nuan tau nunggu aku tegal nya Simpang Impang,’ ku Bunsu Ribut. Iya lalu nusui ngagai Simpang Impang pengawa iya endang enda tau ngetu bepuput dalam dunya tu. ‘Enti aku ngetu bepuput, aku salah enda ngereja pengawa diri. Enti nadai angin lagi semua utai idup bap langit ngaum nuan deka mati magang,’ ku iya.

‘Nya alai kita anak mensia enti bisi utai dijembui anang nyembui ba sebarang alai enggaika aku enda nemu utai diguna kita. Enti kita berumah, kita enda tau enda ngaga tanju enggaika nadai endur kitai nyembui utai,’ pia ku Bunsu Ribut. ‘Nyadi baka leka padi nuan ke perah kena puputka aku nya laban iya dijembui nuan atas puchuk tuga. Nya alai aku enda nemu nya utai diguna nuan,’ ku iya nampung baru.

‘Pasal utai aku,’ ku Simpang Impang, ‘nuan enda tau bejaku, ga utai aku. Dini-dini endur aku nyembui iya nadai salah. Nya alai laban aku udah besai pengerugi rusak pesaka laban nuan, aku enda nunggu nuan. Tang enti nuan enggai ngisi tunggu pinta aku, aku enda tau enda nyadi ngeleburka rumah nuan enggau api,’ pia ku saut Simpang Impang enda ipakka pendiau iya ke timpang nya.

Nyau kepuas seduai udah bebelit enggau besakalka jaku, Bunsu Ribut lalu angkat tama ke bilik. Pansut iya ari bilik minching bendai selabuan.

‘Aku berundingka nuan bangat anak pangan besai aku Kusok, nya alai aku kasih ke nuan. Enti pasal ba penyalah, aku endang nadai penyalah laban pengawa aku bepuput belama. Petara pan enda ngumbai penyalah tu penyalah aku laban iya nemu nya endang pengawa aku bepuput belama-lama. Nadai ngawa nya Simpang Impang. Tu bendai selabuan kena aku ngisi tunggu nuan,’ ku Bunsu Ribut nganu Simpang Impang.

Udah iya nyauka bendai nya iya lalu bepesan. ‘Enti kita ke agi tu ila bisi penyalah besai ke ngudi menua, ngudi dunya, enti Petara ringat ngagai kita lalu ngasuh aku bepuput, aku enda tau enda muput enggau ransi, enggau pedis ati nitihka asuh Iya. Tang semaya aku enggau kita, enti lebuh aku ngeransi, enti aku bisi ninga kita bisi mangkung tawak enggau bendai, aku lalu ngetu laban kita ngasuh aku ngetu,’ ku pesan Bunsu Ribut.

Udah tembu iya bejaku, Bunsu Ribut lalu merap Simpang Impang sereta ngasuh iya pulai. Simpang Impang pan lalu angkat pulai mai bala iya ke nganti di kaki tangga rumah Bunsu Ribut. Maya ke pulai nya nya bisi ke agi ulih bejalai, bisi nya ke ulih ngema, ulih ngaling laban selau, patah kaki patah jari.