Lebuh sida Simpang Impang mulai kediri ari menua Bunsu Ribut sida pan datai ba langkau tunggu di Rantau Tapang ke alai sida ngetu. Lebuh sida ngetu dia, Raja Sempulang Gana lalu bejaku mai sida begempuru baum.
‘Kala kitai mayuh tu begempuru ditu magang, manah kitai lalu baum betuaika Raja Selampandai. Tuju kitai baum laban deka ngagaka semua utai saum nama magang,’ pia ku Raja Sempulang Gana.
Petara ngumbai nya ngena laban ngambika semua sida nyebut utai nya sama nama magang. Petara pan lalu ngatur nama utai. Semua sida mensia, antu, orang langit enggau orang dalam ai sama bela setuju nyebut nama utai ngena nama ke sama. Lebuh semua utai udah bisi nama magang, bala mayuh pan nyau selibuh deka beranyat mulaika diri ngagai endur diri. Lebuh sida bekakisuk deka pulai, manuk lalu terebai atas pala semua bala. Iya ke terebai nya lalu bira.
‘Banggar bendar manuk tu. Bengat nadai nya basa enggau kitai seribu tu. Terebai lalu bira,’ ku jaku bala mayuh, ‘bunuh enggau iya,’ ku bala sida.
Ninga orang bisi deka munuh manuk, Raja Sempulang Gana lalu bejaku. ‘Ba runding aku, enda ngena kitai bisi mati sehari tu, laban hari tu kitai begempuru ngaduka utai manah. Tang laban manuk tu udu enda bebasaka tuai-tuai mayuh tu, ari sehari tu lalu ngagai tubuh uchu ambu iya ke dudi hari, enti sapa kitai mayuh tu bisi pengawa besai tauka mit, darah iya kena kitai nembuka pengawa. Enti iya enda dibunuh, bulung ka dunggul iya sayat ngambi darah iya kena enselan.’
Ninga jaku Raja Sempulang Gana nya tak aruh iya, orang bukai lalu enda nyadi munuh manuk.
No comments:
Post a Comment