Kebuah Uduk Enda Agi Nyalak Ringin

Udah tembu Raja Sempulang Gana bejaku, bala mayuh pan lalu deka mulaika diri, tang Uduk enggau Mayau madahka diri enggai pulai. Seduai madahka diri deka diau enggau Simpang Impang. Seduai madahka diri enda nemu chara ngidupka diri. Enti seduai dilepas ke dalam babas kediri, seduai mati lpar laban seduai enda nemu ngidupka diri.

Lebuh orang baru deka ngelebus, Uduk ke garing-garing nganti Simpang Impang ba karangan tebing ai dinga tak kaing-kaing enda nemu kebuah. Ninga nya nikal baru bala nanyaka kebuah Uduk balat bendar engkaing. Uduk seruran kaing-kaing belama laban telu pelir iya bedarah disepit Gerama kejang Gerama dek mulaika diri ke dalam lubuk.

Meda Gerama bangat mia ke Uduk, orang mayuh lalu ngiga Gerama awakka ngukum iya. Orang nadai nemu chara ngiga Gerama ke dalam lubuk, laban lubuk nya gadung letu empa pemesai enggau penalam iya.

‘Enti baka nya, awak nuan Ringin ngiga laban nuan betah dalam ai,’ baka nya ku Raja Seragindi. Ringin lalu nyelam. Lama bendar iya dalam ai nyerangkap rau ngiga Gerama. Nyau kelama baru iya pansut manggum Gerama ke lalu dibai iya ke karangan ngagai semak Uduk ke agi kaing-kaing.

Sereta Uduk meda Gerama, iya lalu nekus merejuk-rejuk ama ngetup Gerama ama dilengkaka iya ga. Udah nya baru Ringin bejaku, ‘laban aku udah nulung penusah nuan Uduk, lalu ke agi tu ila badu agi nuan nyalak bansa kami nyentukka uchu ambu peturun tua datai ke jemah ila.’

Uduk lalu besumpah madahka diri badu agi lalu mesan ngagai uchu ambu iya nyentukka dudi hari enda ngasuh sida nyalak Ringin. Nya alai ari tegal sumpah tu, uduk enda nyalak ringin. Anang ke deka nyalak, enti iya tetemu ke tai ringin ke makai gerama, uduk ukai semina ensium iya tang lalu ngalika diri malai tai nya nyentukka kemaya hari tu.

Pia mega Uduk udah iya besemaya enda nyalak peturun Ringin, iya lalu ngasuh ringin bepakaika gerama belama-lama. Nya alai nyentukka sehari tu, ringin endang bepakaika gerama laban iya udah ngemediska uduk.

Udah tembu pengawa nya, alai dinga balat bendar bala bechakah ngelaban pangan diri. Sida bechakah laban sekeda enda arapka Ringin ke semina mesai lengan tau ngulihka Gerama dalam lubuk ke ngenjing baka tasik. Ku sekeda tau laban besai ari nya pan endur belalai enti belalai ketegal ngelalaika penyalah ulih ga giga ku sida.

Balat bendar sida bechakah sampai ngagai sida nyau deka beripih ngelaban pangan. Ninga sida enggai badu-badu bechakah, Raja Seragindah lalu bejaku. ‘Nya ukai pasal laban betah alai Gerama ulih giga Ringin tang laban iya bepenyalah. Enti kitai belalai mai penyalah dini-dini pan endur kitai diau ulih ga giga.’

‘Enda,’ ku sida bukai, ‘ni Gerama ulih giga Ringin dalam lubuk ngemesai enggau ngenalam nya.’

Nyau kepuas sida ke betalat baru Seragindah ngasuh kalam ai. Semah ke betah enggau endang tuai orang diau dalam ai, diasuh nyelam ngarika orang ke ngumbai penyalah ulih dilalaika. Ringin ke diau di darat diasuh sida nyelam ngarika orang ke ngumbai penyalah enda ulih dilalaika.

Udah badu Seragindah nyampi, Semah enggau Ringin pan lalu nyelam. Seduai nyelam lama bendar. Sekumbang seduai ke nyelam, bala orang di tebing bechakah berari ari sama ngeringka manuk sabung diri.

Nyau kelama udah nya alai Semah pansut belubah-lubah ngabul ke atas ngambi angin. ‘Nyah,’ ku Seragindah, ‘alah Semah laban iya diasuh ngarika utai ngapa. Enti iya ngarika utai bendar, utai amat ni Ringin tan laban iya ga endang tuai orang diau dalam ai.’

Udah nya Seragindah bejaku baru. ‘Kenyau ari sehari tu, sapa kitai mayuh bisi utai dipebelitka enggau pangan tang enda ulih sara ngena adat laban bisi pengelandik ngelindung penyalah diri enggau jaku, laya baka nya patut diaduka ngena kalam ai awakka laya nya diatur Petara enggau rurus sereta manah. Tang kejang orang deka nyelam, orang ke diasuh nyampi ari sepiak-sepiak enda tau enda ngangauka orang ke empu menua alai sida nyelam baka Raja Lelabi, Raja Genali, Raja Semah, Raja Tapah, Raja Adong enggau Raja Kulong laban sida endang orang diau dalam ai kenyau ari jeman dunya nyadi. Sida tau enggau Petara ngaduka pemetul kita.’

Udah tembu sida kalam ai, nya baru semua bala bela mulaika diri empu ngagai endur diri enggau ati lantang ati senang laban semua utai ke patut ditemu sama udah magang kena atur sida lebuh sida pulai nunggu Bunsu Ribut ke belaya enggau Simpang Impang.