Batu Belah Batu Betangkup

Jerita tu ngenang sepasang melaki bini ke idup merinsa dipanjuk penyeranta. Seduai benama Si Kantan enggau Si Tanjung. Seduai iya diau ba menua ke dikumbai Bukit Berapit Sebatu enda jauh ari Pangkalan Kampar. Seduai ngidupka diri bekuli ngambi upah nganyam atap apung, bumai paya, nganyam kelaya, berikan ba sungai. Taja pan seduai iya merinsa tang seduai liat amat ati bekereja dataika seduai teulihka sebidang tanah enggau sebuah rumah.

Bisi sekali seduai ke babas begigaka engkayu. Benung seduai matahka daun sabung enda mukai-mukai seduai tedingaka nyawa ke nyarih amat sereta nganakutka seduai. Si Kantan lalu begaut madah ngagai bini iya nya mih gua Batu Belah Batu Betangkup ke kala ditusui aki iya ngagai iya. Beberapa taun udah nya seduai lalu beranakka dua iku anak, siku benama Si Bunga Melur lalu siku agi benama Si Pekan.

Enda mukai-mukai pengidup enda panjai, Si Kantan tak mati ngenyit, lesi dibai hari tak parai nyenggai lemai ninggalka anak iya ke agi mit ngujungka pengidup Si Tanjung nyau merampau nadai alai orang enggau bepanggai. Nadai nemu enggau mih, Si Tanjung nya ngidupka anak seduai dua iku nya.

Nyadi bisi sekali, Si Tanjung bisi bulih ikan temakul siku ulih iya nginti ba sungai. Pulai nginti iya lalu ngasuh Melur ngerebus telu ikan nya seraya ke nganti iya nurun mandi. Lebuh telu nya udah mansau dia sebagi telu nya diberi iya ngagai Si Pekan lalu laluh iya disimpanka indai iya. Si Pekan lalu makai telu ke diberi ngagai iya. Tembu makai telu nya iya lalu minta bagi ke digalauka indai iya tang menyadi iya enggai meri.

‘Ni tau dih, tu digalauka indai. Lagi nama utai diempa iya dih,’ pia ku Melur.

Nama agi dih, Si pekan lalu nyabak rauh-rauh sambil numpu dinding sereta ngentak-ngentakka kaki ngasuh menyadi iya meri telu nya ngagai iya. Meda tak balat amat nyabak dia Melur lalu meri menyadi iya telu ikan ke endang diagih galauka indai seduai. Udah nya Melur lalu ngulihka sigi telu manuk dikena iya nganti telu ikan ngambika bisi ke lauk indai iya.

Pulai Si Tanjung mandi dia iya lalu deka ngintu diri. Baru ngauk asi dia iya tepedaka telu ikan nadai agi tang iya ke bisi ba pinggai nya semina telu manuk. Ati iya lalu berasai pedis, ringat. Muras. Deka nganu enggai ga nyadi laban ke udah anak. Nyau munyi ke ngengkahka leka lemayung ngeli Si Tanjung laban ke ngetatka diri enda nganu anak iya.

Ujung-ujung iya pan lalu madah ngagai anak iya, enda ulih begulai enggau seduai iya agi. Iya lalu nurun ninggalka anak iya kediri. Bejalai gupai-gupai mih tudah tuai dataika iya ba Batu Belah Batu Betangkup. Lebuh ke ninggalka anak iya tadi, Si Bunga Melur enggau sabak-sabak minta kasih indai iya. Si Bunga Melor lalu nitihka indai iya sambil nanggung menyadi iya, Si Pekan. Ngulihka lubah agi ke bejalai dia seduai enda tentu tetitihka indai seduai. Datai seduai ba pintu gua batu nya, indai seduai endang udah ditelanka batu nya. Melur pan lalu luput lebuh ke ngenataika diri dia meda indai iya udah ditelan batu nya.

Lebuh ke luput nya, Si Bunga Melur lalu bemimpi betemu enggau siku orang tuai. Orang tuai nya lalu madah enda ngasuh iya pulai agi ke rumah iya. Iya ngasuh Melur ngambi tujuh lambar buk indai iya lalu mai telu manuk ke nyadika lauk indai iya nya. Iya nya tadi mesti bejalai nitihka penunga pejalai kaki iya sambil nunu selambar ari buk indai iya tiap-tiap kali iya deka nindukka diri.

Melur lalu bejalai ngerembang babas kampung sambil nanggung Si Pekan. Bukit turun bukit tiki nengah menasan jalai mensia. Nyau kepuas ke bejalai iya pan lalu rembus ba rumah Dato’ Penghulu. Orang tuai nya lebuh ke meda seduai bisi berasai sinu lalu bisi ati deka ngibun seduai. Seduai lalu bemalam enggau penghulu lemai nya. Lebuh tinduk malam nya, Si Bunga Melur bisi bemimpi baru betemu enggau orang tuai ke sama. Dalam mimpi nya orang tuai nya ngasuh iya majakka pejalai iya ke menua ke ketiga.

Hari siti Si Bunga Melur enggau menyadi iya Si Pekan lalu neruska pejalai seduai dataika seduai tetemuka genturung pendiau ke dikumbai Bukit Perah Lantan. Dia seduai lalu betemu enggau Tok Batin. Tok Batin nerima penatai seduai enggau manah. Malam nya Si Pekan balat amat nyabak enggai badu-badu taja pan udah disampika Tok Batin sereta diengkah iya tenggak besi kuning ba rekung iya. Hari siti Si Bunga Melur majakka pejalai ke menua ke dikumbai Bukit Kapar. Datai dia seduai lalu bemalam ba rumah siku orang bumai. Seduai diau dia beberapa malam. Maya ke diau enggau orang bumai nya, iya bisi nusui ngagai Si Bunga Melur tentang pengerindu Ratu Jayang Sakti iya nya nyabung.

Beberapa hari udah nya Si Bunga Melur enggau menyadi iya lalu neruska pejalai datai ba menua ke dikumbai Kerayung Tamarulan. Ba menua nya seduai betemu enggau Ini Kebayan. Ini nya balat amat sinu ke seduai ngenangka penusah seduai diri menyadi. Malam nya, sekali agi Si Bunga Melur bemimpi betemu enggau orang tuai ke sama. Sekali tu iya ngasuh Melur engkah telu ke dibai iya nya ke dalam kerungan manuk di belakang rumah.

‘Tujuh hari udah nya telu nya deka netas. Inang anak manuk nya manah-manah. Nyadi madi dek Si Pekan tu ila deka suah amat menang nyabung. Betuah iya ila. Nya alai aku minta dek engkah tenggak besi kuning Si Pekan ba taji manuk lebuh nyabung ila,’pia ku padah orang tuai nya dalam mimpi Melur. Hari siti, Melur lalu ngerejaka pengawa nitihka mimpi iya malam nya.

Nyau sebulan nandan di langit setaun nampun di bukit seduai pan nyau ngangkatka diri bujang enggau dara. Si Bunga Melur nyau majak bajik sereta landik amat ngubah bungai sereta nganyam. Si Bunga Melur disempamaka baka ke teleba nuchung seraung nyundang menarang. Semua utai ke dianyamka Melur endang dijual Ini Kebayan.

Nyadi menyadi iya Si Pekan nyau majak ga menang nyabung belama-lama. Bidik amat Si Pekan, bidik nemu basik enda betulang; untung nemu adung enda bekengkang. Kepuas-puas ke menang nyabung, berita Si Pekan nyau pegari nama sampaika berita iya nyau datai ba pending Ratu Jayeng Indera Sakti, raja negeri nya. Raja nya lalu bisi ati deka nyabung manuk iya ngelaban manuk Si Pekan. Si Pekan pan lalu dikangau nyabung manuk iya ngelaban manuk raja di istana. Belaban mih manuk Si Pekan ke benama Jalak Bukit Berapit enggau manuk raja. Nyadi entaruh iya, enti sema manuk Si Pekan alah dia iya deka nyadi ulun raja tang enti sema iya menang iya tau makai pemakai sereta begari ngena pekayan istana.

Baka selama ke nyabung, manuk sabung Si Pekan mujur ngalahka manuk sabung raja. Hulubalang enggau bentara lalu diperintahka mai pemakai enggau pekayan ke rumah Ini Kebayan. Lebuh ke ba rumah Ini Kebayan bala raja tu tepedaka pemajik sereta pemanah basa Si Bunga Melur, aka Si Pekan. Lebuh ke pulai ke istana sida lalu madah ngagai Sang Ratu. Hari siti Si Bunga Melur lalu diperintahka nurun ke istana. Lebuh ke tepedaka Si Melur, ati raja lalu berubah rindu meda pemajik Si Melur. Iya lalu madahka asai ati diri ngagai Melur. Enda lama udah nya Si Bunga Melur pan lalu dipadu jadi enggau raja nya. Iya lalu diangkat nyadi permaisuri raja.

Nyau kepuas ke begulai dia sekali raja tepedaka Si Bunga Melur meruan baka orang ke tusah ati beraie, suah amat tegenung baka empelung mabuk ambuh. Raja pan bisi ati deka nemu nama utai ti nyadi, pekara ke benung dirunding bini iya, permaisuri baginda. Nyau kepuas ke ditanya raja baru Si Bunga Melur nyeritaka tentang Batu Belah Batu Betangkup ke udah nelan indai iya nya. Raja lalu tekala nya mai bala soldadu iya ngabas gua batu nya. Datai sida ba mua gua batu nya raja nya empu lalu ngambi panah lalu manah ke dalam gua nya. Kenyau ari sehari nya nadai agi didinga nyawa ke suah munyi ke ngerau sereta pemindah utai ba batu nya.