Uduk enggau senayau

Lebuh maya tuake dagin nya kiruh bejual enggau bala pemeli enda mukai-mukai siku uduk siga lalu engkechit semak bangku penyual dagin lalu nyambar sekerat daging. Udah nya,iya ngelarika diri.

‘’Eh, uduk ti jai!Berani dek enchuri dagin aku ney!’’ku penyual dagin nya rauh-rauh mandangka diri ringat. Iya lalu ngagai uduk siga nya enggau duku ke dikena iya ngerat dagin. Taja pia uduk siga nya terus ngerarika diri enggau naka penyapat nadai beapai nadai beindai.

Uduk nya rari benapat-inat datai ba sebatang sungai. Kira ke udah ngasaika diri likun iya pan lalu ngetu sambil nyintak seput panjai. Seput nyau asai ke ba dagu, semengat nyau asai ke digenggam.

Iya lalu nengah andau laban ke deka ke seberai sungainya. Tang lebuh iya nyenguk ke dalam sungai, dia iya berasai udu tekenyit lebuh iya tepedaka siku uduk bukai benung manggum sekerat dagin ke besai agi ari enggi iya.

Nyadi tudah tuai nadai nemu nya semina senayau iya aja. ‘Aku mesti ngulihka dagin nya ari iya itu. Untung iya bulih kerat dagin besai ari aku. Legi asai dek,’ pia ku pikir uduk siga nya.

Tak enda bepikir panjai, iya pan lalu nyalak uduk ke dipeda iya ba dalam sungai nya. Tang enda mukai-mukai lebuh iya muka mulut iya,dagin ke benung dipanggum iya nya tadi lalu labuh ke dalam sungai.

‘’Ahhhpu…dadak amat aku tu ney! Aku patut beterima kasih ketegal pemakai ke bisi ba aku. Tu naka mih pengerugi aku ketegal pengebam aku …’’ku uduk nya gut-gut nesalka penadak diri. Nadai ku enggau mih pengujung iya pulai mai perut ke lapar enda indah baka sempama manuk lepas jari bau tai.