Ensera Tekuyung enggau Rusa

Bisi sekali, siku rusa tak berasai aus amat. iya lalu nurun ke sebatang sungai mit laban deka ngirup ai. Datai iya ba tebing anak sungai nya iya pan lalu nundukke pala iya deka ngirup. Enda mukai-mukai iya tepedaka siku tekuyung benung empikil ba sigi batu besai. Iya pan lalu nanya, "Hai, kaban aku tekuyung, dek pan bisi ditu ga?"

"Ya, bisi mih aku ditu," ku Tekuyung.

Rusa nya meda Tekuyung nya bejalai baka orang sakit laban iya ke bejalai begadai-gadai. Rusa lalu ketawa rakah-rakah enggau naka penyaris. "Ha...ha...ha!"

Nyadi tudah Tekuyung lalu nanya, "Nama utai ke diketawaka nuan, kaban?"

"Eh, nadai nya nama-nama kaban, semina geledi ati aku meda chara dek bejalai. Nya ke ngasuh aku ketawa, laban enti sema bisi beperang lalu dek bejalai begadai-gadai baka nya udah tentu dek nya mih ke kena tangkap."

"Hai, anang mih nuan nundi aku baka nya, kaban. Taja pan singkang nuan panjai, bedau chuba bedau temu mih," ku saut tudah Tekuyung.

"Eh, kaban, berani ga dek ney," ku saut Rusa. Iya pan ketawa baru. "Kati ti tua kaban, berumpak enggau pangan diri, ka dek?" tanya Rusa. Iya lalu ketawa baru.

Tang ku saut tudah Tekuyung, "Ya mih. Taja pan aku lubah baka tu, nadai ga salah nguji, ni nemu bedau kala nguji."

Rusa berasai diuji laban ngasaika diri betubuh besai sereta bekaki panjai. Nya mih tudah tuai lalu malik ke baruh meda kaki diri empu ke chungkir sereta panjai. "Bah," ku Rusa, "kemaya tua ulih berengkah berumpak dih?"

"Aram mih enti udah munyi nya," ku tudah Tekuyung, "enam hari ari diatu, lalu hari ketujuh kitai betemu baru."

"Ya, ulih nadai nanggul nya,"ku saut Rusa tanda setuju. "Tang dini tua berumpak dih?"

Lalu tudah Tekuyung meri tuduh penemu, "Tua berengkah belanda ari atas, tempat nuan diau, udah nya kitai nurun kitu lalu belanda datai ke bukit ti ketujuh. Lebuh udah datai din kitai lalu ngetu. Sapa entara tua datai dulu ba bukit ti ketujuh, nya mih menang."

"Ya, ulih," ku Rusa.

Nyadi lebuh semaya udah ditetapka, seduai iya pan lalu mulai ngagai palan diri empu. Sepengudah nya tudah tekuyung lalu ngusung enam iku tekuyung ke bukai berundingka pasal pekit berumpak ke udah disemayaka enggau Rusa. Ku Tekuyung madah ngagai sida, "Keterubah iya cherita nya baka tu, bisi siku rusa nurun deka ngirup ai, tang iya tepedaka aku bejalai ngelansat laban kitai ke endang bejalai begadai-gadai. Iya lalu ketawa enggau naka penyaris sampai kami duai besemaya sehari nya berumpak enggau pangan diri," ku Tekuyung nerangka ngagai bala tawing iya. "Nyadi aku mai kitai semua besedia ditu kenaka hari ti ketujuh, lalu lebuh Rusa ngangau, 'Dini dek Tekuyung?' saut mih munyi tu, 'Ditu aku.' Tekuyung nya berunding baka nya enggau semua tekuyung ari ke satu datai ke enam. Penyampau semua sida tekuyung nya bisi tujuh iku. Ba tiap-tiap bukit nya ila endang bisi siku tekuyung ke udah besedia dulu.

Lebuh datai hari ti ketujuh, seduai pan lalu betemu ba bukit baka ke udah disemayaka. Seduai pan lalu bebaris. Ku Rusa, "Lebuh aku niap, 'Satu, dua, tiga,' ku aku belanda...alu belanda mih."

Seduai pan lalu besedia, lalu Rusa pan berengkah niap, "Satu, dua, tiga", seduai pan sama bela enda kakang-kakang lalu engkechit belanda. Rusa nama agi dih lalu tabun-tabun belanda nadai malik ke belakang laban takut ka diri alah.

Lebuh iya datai di bukit ti kedua, Rusa pan lalu ngangau Tekunyung, "Dini dek Tekuyung?"

Tekuyung ke endang besedia dia lalu nyaut, "Ditu aku."

Lebuh Rusa ninga Tekuyung udah dulu, iya pan lalu belanda laju baka peluru leka senapang. Lebuh iya udah datai ba bukit ke ketiga, keempat, kelima lalu diatu udah semak bukit ti keenam, Rusa pan berasai ikak amat. Seput iya nyau di dagu. Iya lalu ngangau baru. Tekuyung nyaut madahka diri dulu ari iya.

"Apu ney," ku Rusa, "amat laju kaban tu." Lebuh iya nyau ngampir bukit ti ketujuh, ari jauh Rusa nya nyeru baru, "Dini dek Tekuyungt?"

Tekuyung ti ketujuh pan nyaut, "Ditu aku," laban iya ke dulu ari Rusa, nama agi dih tudah Rusa enda sempat ngenataika diri ba kaki bukit nya lalu rebah luput.

(Diambi sereta dibali ari Cerita Dongeng Kadazan Labuk-Kinabatangan,
Jabatan Muzium Sabah, 1979, m/s 22-23)