Nyadi anak Raja Baya raya sakit. Lama amat udah, empa riman ba pegu. Ari nya diperubat orang ke ulu, diperubat orang ke ili. Nadai ga nemu penyakit iya.
“Enti kitai ba menua tu nadai nemu ngubat penyakit anak aku, manah kitai ngambi Iban ke menua,” pia ku jaku Raja Baya, meda Dayang Laminah majak sakit. “Nyadi kita igat Bujang Tengkalung Langit, Bujang Minggan, enggau Minggu Aji Rua ngambi Manang Jamba kin,” ku Raja Baya.
“Endai lapa enti aya ngasuh, enda mih ngasuh kitai parai,” pia ku sida tiga.
Udah nya nurun sida tiga ngambi manang. Tak pansut ari Teluk Lubuk Kumpai, lalu baka kitai Iban, ukai baya agi. Nyau merau, bekayuh ngili Batang Balingian. Puas ke bekayuh sida pan datai di Tanjung Taruh, endur rumah Manang Jamba.
“Lalu Wat, ” pia ku Manang Jamba.
“Au aya. Enda diasuh lalu, endang sigi deka niki mih tu.”
Datai dia lalu dinahka manang sarang insap, sarang pinang. “ Ni, udah makai kita Dom?” pia ku Manang Jamba.
“Enda ibuh makai kami aya. Kami tu beguai laban kami tu deka ngambi nuan belian” ku sida tiga.
“Endai! ngambi nama nya dih?”
“Nya mih belianka menyadi kami,” ku sida.
“Au, enti belian nemu mih aku,” pia ku iya, “ Laban aku sigi manang”.
“Kami tu udah puas bendar berubat. Siku pan nadai semitan. Mayuh manang kami din tang tak nadai nemu ngubat pemedis nya laban tak ba pun rang. Baka riman nya peda kami. Utai nya mesai lengan tumbuh ba pun pegu. Beradu Aya , enggau kami nuan,” ku sida tiga.
(Dibali ari Jamilah Hj. Ahmad dan Jonathan Singki.
Cerita Rakyat Iban. (1989).DBP. Kuala Lumpur.)
No comments:
Post a Comment