Mimpi SENDI

Sendi tu anak pengkuan siku tuai rumah di Undup. Menyadi iya ke bukai semua udah besai lalu udah beruang-bilik kediri, semina Sendi aja mih ke agi diau enggau apai iya. Sendi mih nulung nyaup apai ba umai kelimpah ari ngatur utai nyumai-pakai ba rumah iya. Indai ke dikesayauka lama udah lesi dibai hari danjan dibai bulan lebuh maya iya agi mit.

Sendi tu indu ukai indu lansang, indu kedubang tang indu ke landik di chungai tunjuk jari. Iya landik amat ngebat sereta ngayam mayuh bengkah tikai lalu ngaga mayuh bansa raga ke chukup manah enti dibanding ari iya ke dikebat digaga indai tauka ini iya. Semua pengawa tu endang diajarka ibu iya ke idup segulai ba rumah panjai sida. Ibu nya mih alai iya ngenataika kasih sayau nganti indai iya.

Sendi tu siku indu ke pengabis bajik ba rumah panjai sida. Nadai indu bukai ke serambau enggau iya di menua nya ngemajik Sendi. Mua iya nyau melan-melan baka bulan pegari maya malam. Iya mega ngembuan tukuh pendiau ke alus sereta ngembuan patah nyawa ke manah amat didinga. Mayuh amat orang bujang ba rumah panjai endang ngembuan ati dekaka Sendi tang iya enda tentu pedulika hal nya. Ukai nama, bisi kebuah mih nya baka belayan padi lebat bebuah, tiap utai ke nyadi tentu bisi kebuah.

‘Sendi tu indu ke sumbung,’ ku bala nembiak bujang rumah panjai iya.

Tang peragam ati sida nya salah sereta enda amat. Maya iya agi mit suba, Sendi bisi bemimpi. Dalam mimpi iya, niang ini iya madahka ngagai iya lebuh iya udah besai ila iya deka dipadu jadi enggau siku lelaki ke benama Guang. 

Nya alai udah ke bemimpi nya lebuh iya udah besai, Sendi endang meruan nganti deka betemu enggau orang ke benama Guang kelebih agi lebuh bisi ngintu pengerami gawai. Ninting kali sida serumah bisi ngintu gawai, maya nya mih Sendi nganti enggau pengetan ati deka betemu enggau orang ke benama Guang. Taja pia iya lalu bedau ga betemu enggau Guang. Hari beganti hari, minggu beganti minggu, bulan beganti bulan enda ga iya tetemuka lelaki ke benama Guang.

‘Sigi enda belaki mih Sendi tu ila,’ ku bala indu tuai berandau enggau pangan diri. ‘Baka ni iya ka ngiga laki ke benama Guang nya? Sampai sehari tu lalu bedau. Engka agi rindu bayam tubuh diri. Nama guna bunga ditanam enti enda ditutu kumbang,’ kenu sida indu ke tetuai.

Nyau kepuas ke nganti, ngiga orang ke benama Guang, pagi siti Sendi lalu minta deka nginjau perau ari apai iya. ‘Aku tu ka bejalai pai,’ pia ku iya madah ke apai iya. ‘Minta dek madah ngagai bala sida ke laki enggau aku ngambika sida ulih nulung bekayuh. Udah nya aku ka mai bala ibu bela enggau aku mega.’

Udah nya Sendi lalu mai selebuan tawak enggau tajau ke dalam perau. Iya mega mai bekal enggau gari ti chukup dikena bejalai beberapa hari. Udah nya iya lalu minta aya iya ngemudika perau.

‘Enti emperuji ati aku Guang nadai di menua tu, tentu iya bisi ba menua bukai, nya mih ke deka digigaka aku!’ pia ku ati iya udah mutus ati deka ngiga orang bujang ke benama Guang.

Sebedau iya mupuk bejalai, apai iya endang nguji enggau naka ulih ngumbuk iya terus diau ba rumah panjai sida.

‘Kapa dek ka bejalai jauh nya, endun?’ pia ku tanya apai iya. ‘Dek ukai kala bejalai ngejangka menua kitai. Nama utai temu dek? Pengelikun ba rantau jalai? Kada enda bisi jagu ba sungai, bisi batu besai ba sungai, bisi wung begenilung ai dalam. Di ili din selalu amat ribut bepuput enggau biau balai sereta enggau gelumbang besai mangka tebing. Semua nya tau mih mangkaka perau. Kati ti bisi orang jai ka nyerang kita ba tasik besai din?’

‘Aku enda takut ke semua nya apai,’ pia ku Sendi nyaut. ‘Sida ke lelaki dibai aku nya semua sida ke landik merau. Sida mega orang ke berani enti bisi orang deka nyerang kami ila. Aya ke enggau nya ukai anchi-anchi orang di menua Undup tu. Ukai dek apai enda nemu. Nya ibu ke enggau nya manang jagu; nemu bejaku enggau jagu sereta ngasuh sida tinduk. Aku udah tunggang ati pai, aku enda tau enda pegi. Aku enda ulih ngelanggarka mimpi aku. Mimpi aku nya sempama semaya aku!’

Udah tembu iya bejaku, perau pan lalu diju ke tengah sungai. Bala sida serumah ke tinggal sama bela ba pendai nya nganjung sereta meri selamat jalai ngagai Sendi.

‘Kati ulih kini Sendi tegigaka Guang? Amai kini mimpi iya nya siti semaya?’ pia ku randau bala indu ke tuai-tuai dia. 

Sehari nya sida pan lalu bekayuh undur Sungai Undup. Tiap-tiap kali lebuh nyau semak lemai hari, Sendi enggau raban iya lalu ngetu ba rumah panjai ke dipansa sida. Orang rumah panjai endang sedia nerima sida enggau manah lalu mai sida bemalam. 

‘Kati bisi kita ditu ke benama Guang?’ pia ku tanya ibu Sendi nanya sida indu ke tuai ba rumah panjai ninting kali sida ngetu ba rumah panjai.

‘Nadai. Nadai orang nama nya di rumah tu,’ ku orang dia madah ngagai iya. ‘Nadai orang nama nya ditu. Engka kita ulih ngiga orang nya di ili din!’

Hari siti, Sendi enggau bala iya lalu majakka pejalai sida bekayuh dataika sida ba Sungai Batang Lupar ke panjai sereta besai. Enda berasai sida udah ngejangka rumah panjai sida tujuh hari tujuh malam. Sungai ke ditengah sida besai tang enda deras. Muak kiba enggau kanan sungai nya endang dandang umai sereta kebun buah orang. Burung nyau baka kechiap baka ke nerima penatai sida. Angin balat bepuput tiap-tiap kali sida nengah sungai nya baka ngelaluka pejalai sida Sendi.

Nyau hari kesebelas udah ke bekayuh, sida pan tepedaka sebuah rumah panjai.

‘Nyin rumah panjai baka ke tegap sereta besai,’ pia ku aya Sendi. Iya lalu minta sida ke bekayuh nya ngelubahka kayuh sida. ‘Asai aku patut kitai ngetu bemalam dia lemai tu.’

Maya sida ngampir pendai rumah orang nya dipeda bala nembiak benung nginti ngena perau langkan; lalu iya ke bukai nya benung bediri tegir-tegir ba pendai. Bisi mega balat anak mit benung mandi ba sungai lalu bisi apai tuai siku benung meri manuk sabung iya mandi.

Sida tu sama-sama merening sida Sendi ke merau semak pendai sida. Datai di tebing, laki ke endang nyaga Sendi lalu nibarka tali perau ke tebing. Sida ke ba pendai ba lalu nyambut sereta ngikatka tali perau nya ba pendai sida enggau kemas.

‘Ari ni penatai bala kita?’ ku tanya orang ke empu rumah sambil ngasuh sida Sendi nya niki ke rumah. ‘Pelaba aku kita udah lelak amat sereta lapar! Aram bemalam mih ditu! Nama menua kami tu Sebuyau.’

‘Au pia, kami tu datai ari Undup, jauh di ulu din,’ ku aya Sendi madah ngagai sida rumah panjai nya. ‘Kami tu iya ke bendar bisi orang ke digiga. Ngiga lelaki siku ke benama Guang.’

Enda mukai-mukai bisi orang bujang siku ke sigat benung bediri enda jauh ari sida lalu malik lebuh nama iya disebut aya Sendi. ‘Sapa ke nyebut nama aku?’ ku iya nyau tekenyit lebuh nama iya disebut. Tak nyau tebelenga lilih mih tudah Guang tu tadi, baka orang ke ngemataka leka ujan jauh, tegenung baka burung ngemataka bungkung kayu labuh. Iya lalu bejaku baru, ‘Lalu kati kita nemu aku agi bujang?’

Bala raban ke indu ke enggau Sendi nyau manjung gaga ninga jaku orang bujang nya. ‘Kitai udah tetemuka orang ke digigaka kitai! Udah temu!’

‘Sapa ke udah ditemu kita?’ ku Guang lalu bedau nemu utai ke ku sida nya. Temati kutu mih iya baka jelu kena lunju mata sangkuh, tegepang baka orang ke ngemataka segang pasang penuh.

‘Eh, Sendi anak tuai rumah kami,’ ku sida madah ngagai iya, ‘lalu iya bisi kala bemimpi. Nyadi dalam mimpi iya, niang ini iya ngasuh iya jadi enggau lelaki siku ke benama Guang. Ngelama ke udah bemimpi nya iya udah nulak tanya bala bujang sida serumah laban sida nya ukai benama Guang! Iya arap amat ke mimpi nya!

Tak tebelenga baru mih tudah Guang baka orang ke ngemataka leka ujan jauh, tak nyau tegenung baka burung ke ngemata bungkung kayu labuh sambil meratika mua Sendi. Nadai seleka jaku tepambur ari mulut iya, tak sengian baka ba kampung dalam nadai didinga ensung nyumbuh bujang, temati kutu baka jelu kena lunju mata sangkuh. 

Menyadi lelaki iya nyau jengkak-jengkak gaga ninga berita nya. ‘Tu mih ke selalu disebut ini ngelama tu, aka!’ pia ku iya bejaku inggar nyau didinga sida ke bukai. ‘Ini selalu ngingatka nuan anang jadi enggau indu ba rumah panjai kitai. Iya selalu madahka nuan deka bulih indu ke bajik ari indu bukai? Enda ingat nuan ini kala madah munyi nya? Ku iya, bini nuan ila nya bajik amat, bagas sereta manah ati. Tu mih indu nya!’

Sida rumah panjai nya lalu mai sida Sendi niki ke rumah. Bala lelaki lalu nudukka diri ba ruai lalu sida ke indu dibai tama ke bilik sida indai Guang. Lemai nya sida temuai dinah enggau pemakai. Bala ibu, indu tuai mayuh rumah panjai nya malam nya sigi nyau besun-sun nemuai ngagai ruai sida Guang laban ke deka ninga berita ke balat ngasuh ati sida gagit amat.

‘Tu mih indu ke dianti-anti anak nuan nya, indai Guang,’ pia ku bala sida ibu. ‘Nya ney udah datai indu nya,’ pia ku bala sida. 'Amai pan jara,' ke sekeda nimbal.

Indai Guang endang baka selama lebuh ke nerima penatai temuai lalu dianchauka iya tikai, lalu dinahka nyau enggau ai irup. Udah terenah duduk baru iya nanya Sendi dikena iya nentuka indu nya endang setipak lalu tau jadi enggau anak lelaki ke bangat dikesayauka iya nya.

‘Kati dek nemu nganyam raga enggau tikai?’ ku indai tuai nya nanya Sendi. Sendi nensamka mua nyau malu tekuyung, enda tesautka tanya indai Guang.

‘Ya, Sendi ulih nganyam raga ke alus enggau tikai ke kemas sereta lichin,’ ku saut ibu Sendi.

‘Kati dek nemu enggau orang bumai menih padi, nanam sayur sereta engkani manuk?’ ku tanya indai Guang.

‘Belayan padi ke ditanam manah amat, sayur tumbuh galak lalu manuk ke ditupi iya gegeduk magang,’pia ku saut bala ibu Sendi.

‘Kati nemu berapi dek? Nemu nesah gari, nemu ngaga tuak?’ Majak indai Guang nanya Sendi. Mayuh amat utai deka ditemu iya, silik amat utai ditanya.

‘Sendi tu endang ari mit udah ngatur utai dalam rumah kediri laban ke segulai enggau apai iya. Indai iya lama udah nadai.’

‘Kati iya nemu ngebat pua ukir utai tumbuh, utai ngerayap, bintang enggau kantuk wi?’

Nyau kepuas ke ditanya, Sendi lalu mantaika kain ari raga iya. ‘Nyadi tu kain dikebat aku empu!’ ku Sendi taja pan malu deka madah laban ke nyau puas ke ditanya indai Guang.

Kain pua bechura mirah redam, mesai pua kitai nya. Chura chelum enggau burak nunjukka tapak kaki burung, paku kubuk, tangga ke langit, raja jagu enggau mua bala anak mensia.

‘Pu neh, tu mih pua ke pengabis manah ke udah kala peda aku!’ pia ku Indai Guang. ‘Ukai sebarang indu nemu ngebat ukir baka tu. Sendi, nuan endang tau nyadika bini anak aku!’

Meda baka nya hari siti sida lalu ngaturka pengerami melah pinang ba rumah panjai nya. Lalu beranchauka tikai bekembaika bidai mih sida serumah. Semua rumah ke sepemakai enggau sida, dipadahka magang. Nama dih sampal mih orang datai, betambit pintu bekaling alu. Nyau penuh kenu rumah sida Guang jamah mensia, pemayuh orang dia nyau mayuh ari beluh di Letung Kumpang, banyak ari lemetak di Tinting Kedang, kiraka pengerami melah pinang ke pengabis besai ba ai Sebuyau. 

Maya pengerami nya, ibu Sendi ngena ngepan ke dikebat Sendi. Udah nya iya lalu masukka ngepan Sendi, ngingkatka bengkung pirak ba punggung lalu nyarungka gelang pirak ba jari enggau kaki Sendi. Pala iya diias enggau sugu tinggi. Udah tembu nya baru iya mai orang indu keluar ari bilik lalu nuju ke ruai. Orang mayuh endang udah lama nganti.

Sendi udah nya pan lalu diasuh duduk ba atas ketawak mit lalu Guang duduk ba tawak ke besai agi. Udah nya lemambang lalu miau seduai enggau manuk sambil besampika ngagai petara ke pemujur pengidup seduai ila, ngambika seduai lantang senang beranak betelesak. 

Udah tembu pengawa nya, seduai lalu diasuh nyirap daun sirih lalu bekunsi enggau pangan diri makai iya. Lebih sirih nya lalu disadung ngagai bala sida tuai ke bukai. Udah nya lalu berengkah mih pengerami makai enggau ngirup sehari-hari semalam-semalam. Orang pan nyau rami betundi-bebuti enggau pangan diri, betarit-tarit ngirup ke setak ulu ke setak ili. Sendi enggau Guang malam nya sah jadi melaki bini. Lantang mih pengidup seduai udah nya.