Alladin enggau Lampu Ajih

Alladin nya siku nembiak ke pintar tang iya mega siku nembiak ke enda tentu rindu ngaga kereja. Bisi sekali indai iya nganu iya lalu ngasuh iya ngiga kereja ke pasar. Datai iya ba pasar, Alladin betemu enggau siku orang ke tau tepang. Orang di menua nya ngumbai iya Beliau. Beliau nya besemaya deka meri duit mas enggau barang mas ke mayuh enti Alladin nitihka perintah iya. Alladin berasai gagit amat lalu nitih orang nya.

Beliau nya ngasuh Alladin tama ngagai sebuah gua ngiga siti lampu kelita. Iya lalu meri sebentuk tinchin ajih ngagagi Alladin. “Unsut tinchin tu lalu jin deka pansut nulung nuan!”

Alladin lalu tama ke dalam gua. Enda lama udah nya iya lalu tetemuka lampu kelita ti diasuh giga orang ke tau tepang. “Aku udah tetemuka lampu nya!” ku Alladin rerauh ari dalam gua ngagai Beliau ke nganti ba luar nya.

“Badas. Alu beri ngagai aku nya!” ku Beliau madah ngagai Alladin. 

“Keluarka aku dulu!” ku Alladin. Beliau nya lalu ringat lebuh iya ninga Alladin minta keluar dulu. Iya lalu enda mukai-mukai nutup pintu gua nya. “Sepi asai dek, bedau nemu aku dek nya,” ku Beliau nya.

“Apu! Parai mih aku tu lagi enti baka tu. Nama utai patut digaga aku ney?” Alladin lalu nyabak duie-duie sambil ngunsut jari iya. Enda berasai iya tekusukka tinchin ajih nya. Enda lama udah nya jin lalu pansut ari tinchin nya lalu nanya iya, “Nama utai ti diasuh Tuan gaga aku?”

Tekenyit Alladin. Iya berasai takut amat. Nyau tegepang tudah Alladin baka ke ditegah beruang jelu jugam. Puas ke bebengap enda engkesap baka ke sendat leka maram baru mih Alladin teingatka pesan Beliau. “Minta tulung nuan mai aku pulai,” pia ku Alladin madah ngagai jin. Nama mih dih dalam sekelip mata aja Alladin udah datai ba rumah iya enggau lampu ajih nya.

“Kada enda lampu tu ke tau ajih.” Alladin lalu ngusuk lampu nya. Enda mukai-mukai jin lalu pansut ari lampu nya. “Tuan, nama utai ke ka nuan?” tanya jin nya.

“Aku ka sebuah astana ke besai, penuh enggau mas, intan belian enggau raban bala penempara,” ku Alladin. Dalam sekelip mata aja, Alladin lalu nyadi siku orang ke pengabis kaya ba menua iya. Sebulan nampun di bukit setaun nandan di langit, Alladin pan lalu tetemuka siku indu ke bajik amat, bemua manjan baka bulan tumbuh mansang. Nama agi diantu nama agi ditunggu, Alladin lalu bisi ati ke indu nya. Enda lama udah nya, iya lalu jadi enggau indu nya.

Nya mih enda lama udah nya, Beliau pan lalu bisi tedingaka berita senentang Alladin ke ngembuan kelita ajih lalu iya mega nemu Alladin diatu diau ba sebuah astana ti besai. Nama agi dih, iya lalu ngaga diri nyadi siku penyual lampu ke misikin papa. Iya lalu ke astana lebuh maya Alladin nadai dia. “Lampu baru tu nganti lampu lama,” ku iya manjung.

“Badas iya! Lagi mih aku meri lampu tu ngagai Alladin kena nganti ke lama,” pia ku saut bini iya. Mesai bulu mata nadai mih iya nemu lampu Alladin nya tau ajih.

“Ha, ha ha,” nyau rakah-rakah Beliau nya ketawa sambil lampu kelita nya pulai. Datai iya di rumah. Beliau nya lalu ngusuk lampu ajih nya. Enda lama udah nya lalu pansut jin ba mua iya.

Iya lalu ngasuh jin nya, “Pindahka astana Alladin enggau bini iya ngagai endur ke jauh amat!” Jin lalu tekala nya nitihka perintah tuan baru iya.

Enda lama udah nya, Alladinlalu mulai kediri. Datai iya dia peda astana enggau bini iya udah nadai agi dia. “Kenika tu tau nyadi?” ku iya mutap kediri dia. Nyau puas ke mutap baru iya teingatka tinchin. Lalu dikusuk iya tinchin nya lalu ngasuh jin nya mai iya ngagai lampu ajih.

Jin pan lalu mai Alladin ke rumah Beliau. Maya iya datai dia, Beliau nya benung tinduk. Alladin pan begadai-gadai ngambi lampu ajih nya. Udah nya Alladin pan lalu ngusuk lampu ajih nya sereta minta jin nya ngemulaika bini enggau astana iya.

Udah nya iya lalu ngasuh jin nya nganjung Beliau ke tempat bukai ke jauh ari menua iya. Nama dih, jin nadai betangguh-tangguh agi lalu ngerejaka pengawa nitihka diasuh Alladin. Kenyau ari sehari nya Alladin enggau bini iya idup lantang senang nadai agi utai ngachau.