Rusak tu di entara orang ke dulu ngerumpang berimba lalu ngentapka pendiau diri ba Nanga Sakundong, Paku. Enda lama udah ke diau numbuhka genturung pendiau dia, iya lalu bisi ati deka betemu enggau raban pendiau orang ke didinga iya bisi diau ba nanga Saribas.
Hari siti, iya pan lalu undur laban deka betemu enggau sida nya. Lebuh iya datai ba Nanga Luba enda jauh ari nanga Paku ba batang Sungai Saribas, iya enda mukai-mukai lalu nempuh gelumbang, bena ke ngujungka iya nadai jalai bukai tang nyinggahka diri ba tebing sungai. Enda lama udah nya, iya tedinga munyi orang benung bekayuh. Rusak lalu ngangau enggau nyawa ke naka iya penyaris. Orang nya lalu enda sempat nyaut laban ngeringak nanchangka tali perau. Meda baka nya lalu ditanyaka Rusak baru.
“Ari ni penatai nuan punggal?” pia ku tanya Rusak.
“Eh, aku tu ari laut. Nyadi aku tu ka betemu enggau bala Dayak ke baru ngentap diri ba ulu din.”
“Bala kami mih ti ku nuan nya punggal. Kami tu apin lama udah pindah kia. Nyadi aku tu Rusak penama aku, tuai kami sebala.”
“Au, pia.”
Meda ke udah betemu ba Nanga Luba seduai lalu besetuju enggau pangan diri ngaga endur nya nyadi garis entara menua bansa Laut enggau Dayak Saribas. Kenyau ari nya mega, orang Dayak endang ngumbai bansa sida nya ke diau dia nya Laut laban orang ke terubah betemu enggau Dayak madahka diri datai ari laut.
No comments:
Post a Comment