RAJA JETI

Jetie seduai indai iya begulai semak orang ba rumah panjai. Seduai iya enda betampung enggau orang tang diau ba pelabuh. Nya alai maya hari panas, orang begigaka ikan, mansai mih orang, nubai mih nya. Nyadi seduai iya enggau tang enda tulihka ikan. Jetie suah alah laban orang lebuh maya begiga ikan. Laban empa pemayuh ikan, seduai iya tulih ga ikan ke empa sekali dua.

Ensepi diri ke nadai bulih, nyanda ikan ngagai orang bukai indai iya. Dijali orang ikan ga seduai iya.

“Nganti bulih ila mayar, “ pia ku jaku. Jali orang ikan, jali orang salai enggau pekasam mih seduai iya. Mansai ga seduai menyanak, begigaka ikan dikena bebayar tang lalu enda tulihka ikan dikena malas ikan, salai enggau pekasam ke udah dijali orang ngagai seduai. 

Udah nya hari pan ujan. Nadai mih seduai menyanak ulih begiga dikena mayar ikan ke udah disanda seduai. Seduai menyanak pan nadai ga nemu chara bukai agi dikena ngulihka ikan.

Nyau ke lama udah nya, orang ke endur seduai nyanda ikan pan nyau nagih seduai. Seduai meindai pan nadai ga nemu chara dikena mayar utai nya laban hari selalu ujan. Dia seduai iya lalu diambi orang ke ulun.

Jetie tu diasuh tuan iya ngibun langkau umai laban umai tu sigi siak, siga rusa. Iya lalu diau ba langkau umai. Tudah Jetie apin tentu besai. Kadang-kadang nadai dianjung orang bekal tudah tuai. Merinsa mih iya laban suah enda makai. Lapar. Dua-tiga hari sekali ga orang nganjung pemakai ke tudah tuai. Nyabak mih tudah Jetie, rauh-rauh madahka pemerinsa diri. Serebanaka diri ke diambi orang nyadi ke ulun.

Nyau kepuas seduai iya ngetat sereta serebanaka pemerinsa diri, seninjik bendar Keling bisi nyumpit ba puchuk kara, enda jauh ari nya. Ninga bisi nyawa orang nyabak, dia Keling lalu nurun ari puchuk kara.

“Sapa mih orang ke nyabak nya,” pia ku Keling bejaku kediri. Iya lalu bejalai ngagai tunga umai nya ngiga tunga munyi sabak orang ke didinga iya ari puchuk kara. Iya lalu tepedaka Jetie.

“ Nuan ke nyabak nya Jetie?” pia ku Keling.

“ Iya, aku mih nyabak,” pia ku Jetie.

“ Nama utai ke disabakka nuan dih?”

“ Ni aku enda nyabak, merinsa bendar kami duai indai aku tu, diambi orang ke ulun,” ku Jetie.

“Nama kebuah orang ngambi seduai ke ulun dih?’ pia ku Keling.

“ Nya mih, kami duai nyanda salai, nyanda pekasam ari orang tang enda ulih bayar kami duai ga laban hari ke selalu ujan. Nya alai kami duai diambi orang ke ulun ngibun umai ditu,” pia ku Jetie.

“Anang nuan agi ngibun umai. Pulai enggau aku nuan,” pia ku Keling. Keling lalu mai Jetie pulai.

“Enggai aku dibai nuan pulai dih, lagi dianu orang aku,” pia ku Jetie.

“Nadai orang nganu dih, pulai enggau aku mih nuan,” pia ku Keling. Keling pan lalu mai Jetie pulai ke rumah sida.

Bejalai mih seduai, datai ba rumah sida Keling, gaga mih bala sida Kumang meda iya mai Jetie.

“ Nya alai bakatu ga nya Jetie. Aku enda mai nuan lama nemuai kitu laban sinu ke indai nuan diperinsa orang din. Bayar salai orang nya ulih seduai. Ukai nya nadai salai ditu dikena mayar salai nya dih. Pagila Buat nganjung nuan, mai salai kena mayar ke udah disanda seduai indai nuan, “ ku jaku Keling.

Nya, udah nya, nadai mih orang ke nganjung bekal ngagai Jetie ba langkau umai nemu iya dia.

“Nadai dia Jetie. Nyangka iya udah mati. Rari kini Jetie,” pia ku jaku sida serumah. Nyabak mih tudah indai iya, ninga Jetie tu nadai temu tunga.

Lima hari udah nya, baru orang di Panggau Libau nganjung Jetie pulai. Anjung orang iya lalu dibekal sida enggau pengaruh.

“Nya alai tu ubat Jetie. Bai nuan pulai. Nuan ila enda merinsa agi, semua utai ulih nuan magang,” ku jaku sida Kumang enggau Lulong.

“Laban nuan udah diambi orang nyadi ke ulun, kaya raja nuan ila,” kenu ku orang ngagai iya.

“Nya alai kami tu ngasuh Buat Sempurai nganjung nuan, ngambika bisi ngema salai ke nuan,” ku jaku Keling seduai Kumang.

Orang pan lalu nganjung Jetie naka langkau umai.

“Ma salai tu ulih nuan. Kami semina ulih nganjung nuan naka tu aja, “ pia ku Sempurai.

“Nadai aku temaka salai nya,”ku Jetie.

“Ulih. Baka ma aku ga ma nuan,” pia ku Sempurai.

Udah nya lalu dima Jetie. Ulih mih semua salai nya dima iya. Datai di rumah, begau orang meda pemayuh salai dibai Jetie pulai.

“Nama main nuan nadai kemari dih?” pia ku orang nanya Jetie.

“Ngiga salai aku. Nyau puas ke ulun kita, puas diperinsa kita. Nyadi tu dikena mayar salai kita,”pia ku Jetie. Salai nya tadi lalu dikena iya mayar semua salai ke udah disanda seduai meindai. Nama agi dih, gaga mih semua orang. Indai iya pan gaga.

Berengkah ari nya, Jetie pan lalu nyadi raja. Semua orang ke ngambi seduai ke ulun nyau merinsa ari seduai menyanak. Seduai iya ga udah disumpah sida Keling. Lantang mih pendiau seduai udah nya.

pelabuh - rumah tauka bilik tambah ti digaga nangkir rumah bukai, tanju.