Mimpi Rimau

Tempat: Ba kampung dalam mayuh didinga ensung nyumbuh bujang

Nyadi sekali Rimau nurun ari rumah iya lalu bejalai nuju rumah Kambin. Rumah Kambin enda bangat jauh ari rumah Rimau, kira pejalai satu jam ari rumah pangan diri. Sida endang bekelala enggau pangan diri. Nyadi Kambin ti dituju Rimau bisi bini siku enggau anak bujang pan siku. Anak bujang Kambin endang anak ti dikerinduka apai seduai indai Kambin nya.

Rimau : (negung ngangau) Kati tau ditiki rumah nuan punggal?

Kambin: Tau punggal! Niki mih!

Rimau tak enda chechamang lalu niki, peda liur Rimau nyau bekerenjui neritik ari dagu iya. Nyema enda pan Kambin ngasuh niki, sigi niki mih iya ba rumah Kambin.

Kambin: Nama pejalai nuan tak tumu-tumu tu dih punggal?

Rimau : Aku tu besai amat pejalai punggal. Nya kebuah aku tak tumu-tumu pagi tu dipeda nuan.

Kambin: Besai enda besai pan punggal tusi dulu mih kebuah nuan ngagai aku. Enti bisi penusah awakka aku jampat nemu. Nyamai ga alai kitai berundingka penusah nuan.

Rimau : Nya mih punggal, demalam lebuh aku tinduk asai ke enda, dia aku bekalih bisi mimpi. Mimpi asaika meda antu besai bendar gamal datai ngagai aku. Antu nya lalu ngasuh aku makai anak bujang nuan, tang aku madahka diri enggai ngereja pengawa nya, laban aku ngenang nuan pangan aku. Agi ga antu nya, ku iya, ti aku enda makai anak nuan, aku deka mati tauka gila.

Kambin: Pu nih. Enti munyi nya punggal enda mih aku ulih nulung nuan, laban nya tak anak aku ti deka asuh antu pakai nuan. Pasal mimpi nuan tu aku endang enda besetuju enggau nuan.

Udah nya, lama Rimau seduai Kambin bechakahka jaku enggau pangan diri. Sama nyau terit urat rekung seduai bai bekelikuhka jaku enggau pangan. Nyau kelama nya baru seduai sama setuju deka bechara ba Akim Singa.

Rimau lalu nurun ari rumah Kambin, bejalai nuju rumah Akim Singa. Rumah Singa nya tinggi bendar ba tuchung bukit nunga ngagai padang ke besai. Singa endang udah meda Rimau ari jauh bejalai nuju rumah iya. Iya lalu bediri ba mua pintu nganti penatai Rimau.

Rimau : Tabi Akim Besai. Aku bisi pejalai, ke deka betemu enggau nuan ditu, laban aku bisi pechara ngelaban Kambin. Ari pengawa nya aku minta nuan Akim Besai nulung mutuska pechara aku enggau Kambin.

Akim Besai: Enti seduai Kambin bisi laya ti deka asuh seduai putuska aku, nama dih kebuah aku enggai, ga endang pengawa mutuska pechara orang. Tang, enti pia panggil Kambin datai kitu. Landak, panggil Kambin datai kitu.

Enda bangat lama udah nya, sida Kambin menyanak lalu datai ba rumah Akim Singa. Nambahka sida tiga menyanak jelu bukai pan bisi mega datai sama enggau mendingka pechara nya. Udah abis semua randau bukai, pechara pan lalu belabuh.

Rimau : Aku empai lama ke udah bisi mimpi. Dalam mimpi nya aku diasuh Antu makai anak bujang Kambin. Nya mih pagi siti aku lalu ngagai Kambin madah ngagai iya mimpi aku nya. Dalam mimpi aku nya, Antu madah ti aku enda makai anak kambin aku tau mati tauka gila. Tang penanggul iya diatu Kambin enda arap ke mimpi nya, lalu enda sekali-kali ngasuh makai anak iya.

Kambin: Enggai nyadi aku ngasuh Rimau makai anak aku laban nya semina mimpi. Mimpi ukai nya utai amat. Sapa-sapa tau bejaku munyi nya. Ukai aku tu palui. 

Nyau kelama sida udah besautka jaku ari sepiak-sepiak, nya baru Singa Akim Besai mutuska runding diri empu.

Akim Besai: Nyadi pemutus pechara Rimau seduai Kambin ba penemu aku enda tentu bangat panjai. Jaku ari sepiak-sepiak sama udah terang bendar. Baka kita mayuh sama udah mega mendingka cherita Rimau ke diasuh antu makai anak Bujang Kambin. Ari nya tudah Rimau laban ti apin deka mati, apin deka gila, endang keras deka makai anak bujang Kambin. Iya ke deka makai nya ukai ketegal ati enda manah, ukai ketegal peneka ati iya empu, tang nya endang terang bendar ari mimpi munyi ku iya tadi. Baka tudah Kambin pan udah mega ningaka penemu Rimau enggau silik, tang iya enda agi arap ke mimpi, lalu enda sekali-kali ngasuh Rimau makai anak bujang iya. Nya alai ba pechara tu dalam penemu aku Rimau enggai nyadi enda menang.

Sereta pemutus pechara nya udah diputuska Akim Singa, madahka iya alah, dia kambin lalu kaat-kaat bejaku.

Kambin: Ka...ka..ti ulih a..aaku ngapil Tuan Akim.

Akim Singa: Tau, tang timpuh nuan ngapil semina tiga hari aja.

Udah nya semua orang ke bisi datai sama mendingka pechara nya, sama bela mulaika diri magang. Semina Kambin sebilik enda pulai. Ari rumah Hakim Besai Singa sida menyanak lalu bejalai nuju rumah luya Pelanduk, laban sida menyanak deka ngambi Pelanduk nyadika luya ngarika sida ba pechara tu.

Datai sida menyanak ba rumah Luya Pelanduk, Kambin lalu ngangau. 

Kambin: Tau ditiki rumah nuan Luya Besai? 

Laban Luya Pelanduk tu endang orang ti pintar, iya nyengguk deka nemu sapa orang ke ngangau. Iya lalu tepedaka sida Kambin menyanak, lalu ngasuh sida niki.

Udah sida menyanak duduk, dia Kambin lalu nusi berita ngagai Luya Pelanduk. 

Kambin: Nya mih kebuah aku tu datai kitu deka minta tulung nuan Tuan Luya lebuh bechara apil tu ila.

Pelanduk: Aku nadai mayuh jaku, laban nya endang sigi pengawa aku ke nyadi luya nulung orang baka nuan tu Kambin.

Betul-betul chukup tiga hari udah nya sida Kambin menyanak lalu mupuk mega mansang ngagai bilik ke endur bechara. Datai din sida meda bilik endur bechara endang udah penuh laban bala jelu bukai ke sama datai deka mendingka pechara apil Kambin ngelaban Rimau. Nyadi hari maya nya kira benung tengan niki mata panas. Apin lama udah sida Kambin menyanak enggau Luya Pelanduk datai ba bilik pechara, dia Singa Akim Besai pan datai mega entudi sida. Singa lalu duduk ba kerusi Hakim Besai ti endang endur iya mutuska pechara.

Udah nya Luya Pelanduk lalu bediri sereta lalu bejaku.

Pelanduk: Salam Satu Kampung. Nyadi tiga hari ti udah dia nuan Tuan Akim Besai bisi ngatur pechara Rimau seduai Kambin. Dalam pechara seduai nya suba, bepun ari Rimau ke bemimpi diasuh antu enda tau enda makai anak bujang Kambin, laban enti enda makai nya tau ngujungka iya mati tauka gila. Lalu pemutus runding nuan Tuan Hakim Besai, ba pechara nya suba Rimau menang. Tang laban Kambin enda puas ati ba pemutus runding nuan ba pechara nya suba. Nyadi sehari tu aku diambi iya nyadi Luya dalam pechara apil tu. Tang diatu, aku minta ngagai nuan Tuan Hakim Besai nangguhka pechara pagi tu ngagai ngalih hari tu lagi, laban diatu aku buntau bendar, bekau ke udah berundingka pasal pemutus pechara tu, ti lalu diapil Kambin baru. Aku deka natka diri enda lama.

Akim Singa: Enti munyi nya ku nuan Luya Pelanduk, aku nadai penanggul ga nangguhka pechara tu ngagai ngalih hari lagi. Kut ngetu enda lama lalu besambungngalih hari lagi. (Iya lalu malu tukul Akim)

Datai ba maya ngalih hari, nya baru bala jelu datai baru ngagai bilik pechara. Datai dia sida meda Pelanduk benung tinduk ba atas mija. Tuan Hakim Besai pan udah ga datai. Pelanduk lalu ensugau angkat dani ari iya ti tinduk, lalu meda bilik pechara endang udah penuh laban bala jelu. Tekala nya mega Luya Pelanduk lalu ngasuh semua jelu ti bisi datai kia ngambi rangkang sesan siku. Nyadi Kambin diasuh iya ngambi minyak gas sebutul. Udah semua sida ti diasuh iya ngambi rangkang kayu datai semua, Luya Pelanduk lalu lalu ngasuh sida nugungka rangkang kayu ba tisau mija Tuan Akim Besai. Udah nya iya lalu nuangka minyak gas ngagai tugung kayu, sereta lalu ningkuhka machis.

Meda iya baka nya dia Tuan Akim Besai Singa lalu bejaku.

Akim Singa: Hey! Luya Pelanduk, nama pengawa nuan baka nya?

Pelanduk: Nadai mayuh pengawa aku tu Tuan Akim. Tak semina nitihka mimpi aku ke tinduk ba atas mija tadi. Lebuh aku ke tinduk enda lama dia tadi, dia aku lalu enda mukai-mukai bekalih bisi mimpi diasuh antu enda tau enda nunu rumah pechara tu. Enti aku enda nunu rumah pechara tu, aku deka mati tauka gila. Laban aku empai deka mati sereta enggai merinsa laban gila, nya alai aku deka nunu rumah tu.

Akim Singa: Enti pia anang nuan nunu rumah tu.

Pelanduk: Tu nadai anang-anang Tuan Akim. Nuan empu udah ngatur pechara baka nya. Enti nuan deka nyaman aku, alah mih nuan, laban nuan ba senentang pechara Rimau seduai Kambin, ngatur Rimau menang, laban iya bisi mimpi diasuh antu makai anak bujang Kambin. Nya alai dalam pechara apil, laban aku bisi mimpi aku mega menang, lalu enda tau enda nunu rumah tu.

Akim Singa: Enti munyi nya, tebuai mih pechara Rimau seduai Kambin, menang mih Kambin ba dalam pechara apil tu. Nya alai ari diatu datai ke pengujung dunya jemah ila, Rimau enda tau sekali-kali ngachau anak Kambin. Enti Rimau bisi ditemu teketik jari lalu ngemansutka darah anak Kambin sebilik, deka ganti Rimau enggau dagin iya seketi, tu adat.

Pelanduk: Manah penemu nuan Tuan Akim Besai Singa. Enti munyi nya enda mih aku nyadi nunu rumah pechara tu, sebaka enggau Rimau ke enda nyadi makai anak bujang Kambin. Ti nuan nentuka Rimau nyadi makai anak bujang Kambin, aku tunu mega rumah tu, laban kami duai Rimau sama bisi mimpi.

Udah nya tebuai mih pechara Rimau seduai Kambin ketegal pimintar enggau pengelandik Luya Pelanduk ke ngaga diri bisi mimpi, nunda mimpi Rimau. Sereta udah abis pechara Rimau seduai Kambin, gaga mih sida Kambin menyanak. Anak Bujang Kambin nyau ngingkak gaga kediri enda nyadi diempa Rimau. Sida Kambin menyanak lalu meri besai-besai terima kasih ngagai Luya Pelanduk, sereta lalu meri Pelanduk sesintung buah buan ke upah iya nulung ngatur pechara nya. Pelanduk pan gaga mega nerima buah buan ngemayuh nya. 

Pelanduk: Bisi endar ka empa aku seminggu tu. 

Baka nya mega bala jelu bukai lalu madahka diri besemaya deka begunaka Luya Pelanduk enti semua sida bisi bechara dudi ari ila.Tudah Tuan Akim Besai Singa nyau enda nyamai asai ketegal ati iya udah bisi deka ngeringka Rimau, enggau ensepi diri alah penemu enggau pemintar laban Luya Pelanduk.