Mali Tiung

Nyadi jerita tu nyadi kelia lebuh bansa Iban ke selalu kena ipa munsuh dalam babas lebuh menua tu agi siga munsuh. Lebuh nya kelia, lebih agi sida ke indu endang takut bendar turun kediri dalam babas tauka ngagai umai sida, laban Kantu selalu bisi datai ngayau anak sereta ngipa sida. Munsuh seruran datai lalu munuh bala Iban ti bisi ayan tauka dipeda nadai mayuh raban sebelah babas tauka umai. Nya alai ti maya sida ke indu bisi deka turun, sida selalu minta uluka orang lelaki ke endang sigi berani. Sida iya enda berani ngereja pengawa umai tauka begiga sebelah babas enti nadai orang ke lelaki ngulu serta ngemataka sida.

Maya nya kelia bisi lelaki dua iku ba Rumah Nasat ke berani bendar. Nyadi nama siku nya Ajau “Nyempitau Lembang”, lalu nama siku agi nya Janggok “Telok Nyempayang”. Meda Ajau enggau Janggok nya berani bendar, sida ke Indu selalu deka bendar minta uluka seduai turun ke babas enggau umai.

Nyadi sida lelaki bukai ke sama diau dalam Rumah Nasat balat bendar malu ke diri enda dikumbai sida ke indu nya berani baka Ajau seduai Janggok.

“Malu kitai ke lelaki dalam rumah tu laban sida ke indu selalu minta uluka Ajau enggau Janggok. Seduai nya orang datai ari rumah bukai. Kati kitai ditu nadai lelaki ke berani, alah laban seduai nya magang? Buyan amat kitai tu,” Pia ku jaku tuai rumah sida dia.

Nyadi dalam rumah nya mega bisi lelaki siku ti benama Ranggong. Iya pedis bendar ati sereta enda lantang ati meda bala indu sida serumah selalu deka minta uluka Ajau enggau Janggok sebarang maya sida deka turun ke babas, maku, nubu, ngiga ikan, ngiga lampan sereta lebuh sida gawa ba umai laban seduai ditemu sida berani.

Nyadi hari siti sida ke indu deka turun ke umai. Maya nya sida minta diuluka Ranggong siku aja. Sida lelaki bukai dalam rumah nya nadai siku deka enggau Ranggong nguluka bala indu turun sehari nya.

“Lapa kita bangat selalu minta diuluka seduai nya ke datai ari rumah bukai? Katika semina seduai nya aja ke berani?” ku jaku Ranggong enggau bala indu. “Aku tu pan berani mih baka seduai nya. Aku tu pan tau mih nguluka kita turun,” pia ku Ranggong.

Udah nya sida lalu nurun ari rumah diuluka Ranggong. Datai sida di umai, sida ke indu lalu berengkah mantun ba umai diri. Benung sida mantun kira urung tengah niki mata panas, dia sida lalu tekenyit meda bala Kantu datai betubuh duapuluh iku deka munuh sida. Sida lalu begau kiba kanan, sereta lalu lari, ngangauka Ranggong.

”Oh Ranggong, parai kami tu! Rari kitai! Rari kitai! Munsuh datai deka munuh kitai!” ku sida ke indu.

Ninga nya Ranggong lalu angkat mansang ngelaban bala Kantu nanka bala indu. Gasak iya ke atas, peda baku ke ditebas. Ansakka iya ke baruh peda abis bebaring labuh. Teruju iya ke ulu peda abis tingkil dagu, rembang iya ke ili abis tingkil ngeli. Dia mih iya belaban enggau bala Kantu. Bala Kantu enda tentu nyamai dijamah iya siku. Ranggong siku aja ngelaban sida. Penapat-inat iya ngelaban bala Kantu, sereta nanka bala indu ti turun ba umai sida.

Udah parai Kantu siku dibunuh Ranggong, iya lalu manjung minta tulung kaban. Nadai mega kaban datai nulung. Enda lama udah nya parai baru ga Kantu siku dipumpung iya. Manjung baru ga Ranggong minta tulung kaban, tang nadai ga kaban bisi datai nulung iya. Dia bala Kantu makin mayuh agi parai makin mayuh agi ga datai. Nadai ga pangan sida datai mantu sida Ranggong. Dia Ranggong nyau kirat-sekirat. Udah nya manjung baru ga iya minta bantu orang, tang nadai ga orang bisi datai mantu iya.

Tang enda mukai-mukai lebuh nya tak nasit bendar datai sekaban burung Tiung mayuh bendar sereta chapuh amat. Sida datai lalu nepan ba puchuk ragai tebelian ti besai bendar enda jauh ari sida ke bamuk. Sida inggap dia, lalu bemunyi inggar bendar.

“Tiong! Tiong! Tiong!” ku sida bemunyi inggar sereta nyaris bendar. Ninga Burung Tiung inggar bendar munyi nya, dia dih bala Kantu ti agi ngelaban Ranggong tekenyit bendar ati lalu rari, laban sida ngumbai nya bala Ranggong datai mantu iya.

“Nya bala iya datai! Aram, rari kitai!” pia ku jaku tuai bala Kantu. Bala Kantu ke agi idup lalu rari magang, laban ngumbai nya nyawa bala Ranggong datai ninga panjung iya ke kaung-kaung minta bantu.

Nyadi bala Kantu saru bendar ngumbai nya guom nyawa bala Ranggong datai ari jauh, enda nemu nya tak nyawa Burung Tiung ke datai mantu Ranggong ti ngasuh bala Kantu rari enda beapai enda beindai.

Munsuh udah parai bisi empat-lima iku, lalu Ranggong endang nadai telih mimit.Udah pukas pengawa Ranggong ke bamuk enggau bala Kantu laban ke nanka sida ke indu di umai, sida lalu pulai ke rumah. Datai di rumah sida ke indu lalu nusi berita Kantu ke alah dijamah Ranggong.

“Amat berani mih Ranggong. Balat mih pemerani iya. Taja pan bala Kantu lebih duapuluh iku. Sida ke enda ulih mantap Ranggong lalu rari magang dijamah iya. Iya ngelaban endang nadai takut mimit. Enti Ranggong nadai enggau kami turun pagi tadi, tentu abis kami ke indu parai dibunuh Kantu,” ku jaku sida ke indu.

Udah lepas nya, semua Iban dalam rumah nya enggau ke ari rumah bukai bekelingi sebelah nya dia endang semua muji Ranggong sereta lalu ngemesaika iya ngumbai iya endang amat betul berani belaban ke munsuh lebih duapuluh iku. Sida ngelagu pengeran iya ke munuh munsuh parai empat parai lima iku.

Nyadi malam nya, sida laun mimit tinduk laban ke gaga ka Ranggong ti udah ngalahka bala Kantu. Chapuh amat sida serumah sebedau sida nindukka diri. Nyadi lebuh sida Ranggong nyau udah tinduk, dia iya lalu bemimpi. Dalam mimpi iya asai ke tepedaka Raja Tiung begamal baka mensia tang bepatuk baka burung.

Ku Raja Tiung nganu iya, “Tegal sah kami nuan menang ngelaban bala Kantu, lalu nuan agi idup. Enti bala Tiung enda bemunyi di puchuk ragai tebelian tadi, nuan tentu alah dijamah bala Kantu. Sida ke indu pan tentu parai magang dibunuh Kantu. Tegal saup kami Tiung, sida Kantu rari semua lalu kita enda parai. Nya alai, kenyau ari diatu nyentuk ke sida uchu-ambu, ichit-wit nuan jemah ila enda tau sekali-kali munuh Tiung. Kita enda tau makai Tiung. Barang sapa purih enggau peturun nuan bisi makai Tiung, sida nya deka parai laban besi. Barang sapa indu ari purih nuan bisi munuh tauka makai Tiung deka parai beranak.”

Nya alai nyentuk ke sehari tu agi mayuh orang Iban mengkang mali munuh tauka makai burung Tiung.