Nanga Tachu Engkatak Puru

Ba menua siti ke dikumbai Nanga Tachu Engkatak Puru bisi dua iku engkatak diau begulai sejalai enggau pangan diri. Pengidup seduai ke rapit enggau pangan diri endang baka asam gulai garam. Seduai bela besaup enggau pangan diri enti bisi pengawa tau penusah.

Nyadi sekali seduai iya berunding deka matau sereta meda pasar ke kira-kita sepuluh kilometer ari endur seduai iya diau. Lama mega seduai udah berandau sereta merambu deka ke pasar nya, tang laban ke kiruh enggau ke bekangauka ujan dia perambu seduai nya enda kala mujur nyadi nyata. Tang sekali tu nyangka nyau puas betangguh dia seduai pan mujur deka ke pasar. 

“Pagila tua kin, punggal. Lama amat ga udah diau ditu lalu enda nemu utai ke nyadi di luar din,” pia ku engkatak ke keterubah.

Hari siti, tumu pagi udah ngirup pagi seduai lalu nurun. Bejalai mih seduai sehari-hari nya, bukit turun bukit tinggi nengah menasan jalai jani. Iya ga hari bangat panas. Nyau kepuas ke bejalai dia seduai berasai ikak. Dia katak ke keterubah lalu bejaku, “Kada enda udah dampih pasar nya unggal. Kati bisi nuan meda?”

“Nadai.” Tak nyemetak saut engkatak kedua. “tang enti aku nepan ba belakang nuan nyangka aku ulih meda pasar nya.”

Nya alai engkatak kedua nya lalu niki nepan ba belakang engkatak keterubah. Nyadi lebuh engkatak kedua nya ngangkatka pala iya, mata iya semina ulih meda utai ke di belakang tang ukai ba mua seduai. Nya alai semina menua seduai ke ulih dipeda iya maya nya.

“Punggal, kati ulih nuan meda pasar nya?” ku tanya engkatak keterubah ke ngema kaban iya nya.

“Bisi ga,”ku saut engkatak kedua ke nepan ba belakang kaban iya nya. “Ulih aku meda tang iya ke dipeda aku tu enda salah-salah baka menua tua empu ditu.”

“Pia. Enti baka nya nadai guna ga tua majakka pejalai tua kin. Semina masau hari tua aja. Ujung-ujung pengawa tu ke bekangauka ujan nadai ulih dikereja. Lagi tua ga dianu bala anak mensia.”

“Enti munyi nya, manah tua nikal,”pia ku saut engkatak kedua.

Nya alai seduai lalu mutus ati enda nyadi mansang enggaika rugi muai hari. Pulai mih seduai nikal ngagai menua seduai ba Nanga Tachu. Bukit turun bukit tiki nengah menasan jalai jani. Nyau lemai seduai ngenataika diri ba menua seduai ba Nanga Tachu.

Lemai nya mayuh bala engkatak bukai bisi nemuai ngagai ruai seduai laban seduai bisi nesau sida kaban belayan seduai ngasuh datai ba ruai engkatak keterubah. Seduai deka madahka berita pejalai seduai. Malam nya udah makai lemai semua kaban belayan seduai ke bisi datai magang begelumu ba ruai engkatak keterubah.

“Nyadi aku meri besai terima kasih ngagai semua kaban aya, kaban ibu, semua kaban belayan, suku juru ke udah datai ke ruai aku malam tu. Nyadi kita pan sama nemu kami duai punggai tu lama udah merambu deka ke pasar kin. Nyau puas perambu kami duai mujur ga dipejalaika. Sehari tu tadi tumu pagi kami udah nurun. Enti didinga kitai ngelama tu sigi semak ga pasar nya. Tang kami duai ke bejalai ukai nya munyi ke disebut. Bukit turun bukit tinggi, nyau sehari enggai baru datai di pasar din.”

“Kati baka pendiau pasar din dih?” ku tanya siku ari sida ke ninga jaku ke dipansutka engkatak nya.

“Ess, tak nadai bida enggau menua kitai ditu. Nadai guna kitai kin semina muai hari masau jam aja. Ngagai bala nembiak ke bisi ati deka bekereja ke pasar kin ba runding aku manah enda ibuh. Kiruh aja. Manah kitai sigi ditu ngerejaka pengawa bekangauka ujan. Sida din pan bepanggai ba kitai ditu enti dekaka hari ujan.”

“Oh.. enti pia munyi ku nuan nya amat nadai guna kih kitai kin,” ku saut bala engkatak ke bukai. Udah tembu ningaka berita nya bala sida lalu berandauka pekara bukai. Bisi nya lalu mulaika diri laban ke udah lelak kereja sehari nya.