Kumang Mansai

Nyadi sekali sida bala indu orang di Gelung dibai Kumang nurun mansai. Enggau magang mih bala indu sida serumah sebarang ke nadai penanggul. Nyadi sida ke mansai nya lalu napat Sungai Kemayung ngilika Sungai Duri. Mansai mih sida sehari-hari nya. Urat abis diangkat, reba abis dikeruga, kelekatai abis dikusai, rau abis dikeranau. Nyau lemai hari sida lalu berunding deka mulaika diri.

Indai Abang, Lulung, Selinggar Matahari enggau bala indu bukai bela bulih ikan penumbas bai diri empu. Kumang tu tadi dih nadai bulih ikan. Tak siku pan nadai ga tama pemansai iya. Nyadi ke penudi iya ngaukka pemansai dia dih iya meda anak sawa baru mesai tunjuk anak dalam pemansai.

Anak sawa nya tadi lalu dibai Kumang pulai ke rumah. Datai di rumah anak sawa nya lalu ditupi Kumang, disimpan dalam kebuk. Nyau kira sebulan anak sawa udah ditupi Kumang, anak sawa nyau mansang besai lalu enda umbas agi disimpan dalam kebuk. Diambi Kumang lalu dipindah ke tajau. Kira setaun udah ditupi dalam tajau, hari siti Kumang ninga utai ngangau ari dalam tajau.

‘Udah besai atau nuan, Kumang?’ ku anak sawa nya.

Ati Kumang berasai tusah. Iya enda nyaut tang berunding dalam ati. Hari siti benung iya agi nampung kebat, nanya baru ga sawa dalam tajau. Nyawa utai nya majak ga nanya pemesai atau Kumang. Kumang lalu nyaut,

‘Baru mesai tunjuk,’ ku Kumang. Dalam tusah ati nya Kumang teulihka runding lalu ngaga minyak kepayang. Hari siti agi mega anak sawa nanyaka pemesai atau Kumang.

‘Mesai tapa jari diatu,’ ku Kumang. Udah ninga anak sawa munyi nya, Kumang lalu bekira nutuk tepung. Udah nutuk tepung lalu digaga iya penganan. Diambi Kumang penganan lalu diengkah iya sesingkap di sadau, sesingkap di ruai, sesingkap di tanju lalu sesingkap dianjung ke jalai pendai. Tiap-tiap singkap penganan nya dibekal Kumang enggau jaku.

‘Enti kita bisi ninga nyawa orang ngangauka aku ila, ila kita nyaut madahka alai diri,’ ku Kumang ngajae singkap penganan. Singkap penganan pan setuju mega.

Malam siti lebuh bulan di langit benung belah dua mansang, dinga anak sawa ngangau baru nanyka pemesai atau Kumang. Nyaut dih tudah Kumang.

‘Baru mesai chapak. Kira ke keleman bulan tu ila baru atau aku mesai daun birah raya.’

Udah nya Kumang lalu belabuh besikap. Tembu besikap Kumang lalu nurun mai minyak kepayang. Tuju pejalai Kumang endang deka ngelarika diri. bejalai mih Kumang nguluka sungai ngilika ai. Kelama udah bejalai, iya tak rembus ba tisi umai orang. Maya nya baru deka belabuh nunu. Dia iya lama bediri ninjau kin-kia nyangka bisi meda kenaya tubuh orang. Tang lalu ga iya nadai tepedaka orang. Puas ke gegining iya lalu tepedaka lensat sekayu ba tisi umai. Kin mih iya lalu niki batang lensat nya.

Nyadi nyau ngenangka sawa ke ditinggalka Kumang. Hari siti sawa ngangau. ‘Ni nuan Kumang?’

‘Tu aku di sadau,’ ku singkap penganan ke ditinggalka Kumang. Diabas iya ke sadau. Nadai ga anak sawa tetemuka Kumang. Semina iya meda langgur pua baru setengah udah ditenun Kumang. Nurun anak sawa ari sadau, ngangau ga iya baru.

‘Tu aku di ruai tu,’ ku singkap penganan ke di ruai.

Abas iya ke ruai. Nadai ga iya meda Kumang. Ngangau ga iya baru. Bisi ga iya ninga Kumang nyaut di tanju. Diabas ke tanju nadai ga. Kangauka anak sawa ga Kumang baru. Bisi ga Kumang madahka diri di pendai. Nurun anak sawa ngabas tang nadai mega iya nemu Kumang. Ati iya arapka diri betemu enggau Kumang benung mandi.

Udah nemu diri dikeduanka Kumang, anak sawa lalu ngelantar ngiga Kumang. Nyau kepuas iya pan datai ba tisi umai ke alai Kumang belalai. Iya lalu nungas-nungas. Kepuas ke nungas iya lalu tekalaka bau anak mensia bisi semak iya ke ngetu dia. Iya tepedaka Kumang bisi ba puchuk lensat. Iya lalu ngelantar nuju pun lensat ke alai Kumang belalai.

Meda anak sawa nyau datai semak pun lensat nya dia Kumang lalu ngambi minyak kepayang ke dibai iya ari rumah suba lalu dilunsurka Kumang ba batang lensat nya. Datai anak sawa dia, iya lalu enda kakang niki pun lensat nya. Niki belanchar ga iya. Ensepi diri enda tetikika pun lensat, iya lalu nyengkilung ba pun lensat nya.

Nyau pengelama udah panas, dia dih orang Panggau nyau berati ngabas reban. Sida Keling, Bunga Nuing, Laja enggau Sempurai berunding ngasuh Aki Buku Tebu ngabas pengerangkai reban. Nyadi sida sebuat tu bumai bedandang. Datai Aki Buku Tebu ba umai, dia iya ninga utai nyelai bendar bemunyi ba tinting umai sida Keling.

‘Nunu-senunu nuan Aki Buku Tebu. Ke dulu kemarau indu, ke tengah kemarau buah, ke dudi kemarau laki ke bedau kemarau sanggau,’ ku nyawa utai didinga Aki Buku Tebu. Lama udah nya bisi ga Aki Buku Tebu ninga nyawa orang bemunyi baru.

‘Purrr, guru-guru ai bah ngampuhka tanah. Ujan ngampuhka emperan, ulak ngampuhka tinting. Ai ngelegua ngampuhka dunya,’ ku nyawa utai didinga iya.

Ninga utai tak nyelai munyi nya, Aki Buku Tebu lalu berasai takut. Lari mih Aki Buku Tebu enda beapai enda beindai. Kaki dulu kaki diasur, pala dulu dulu pala disungkur. Terampaka tuga, tepelunggangka batang mih Aki Buku Tebu ke rari. Datai di rumah Aki Buku Tebu lalu telentang luput. Begau mih orang sekayu rumah panjai meda Aki Buku Tebu ke luput.

‘Uh!’ ku Keling, ‘Sapa nganu ulun dulu, neresu jemu ambun pagi? Parai mih ulun tuai kitai dih indai nadai nyaga umai tisi.’ Peluh dada enggi Aki Buku Tebu tadi tau alai baya enchapak, peluh belakang iya tau alai enseluang betanjak.

Maya nya indai Keling baru ngengkahka labu laban ke baru pulai mandi. Belanda indai Keling lalu diterutuka iya ai ari ujung buk ngagai bubun aji Aki Buku Tebu. Peda tak seranyut seput Aki Buku Tebu. Iya pan enseput ngeleda. Udah iya ngeleda, iya lalu nudukka diri lalu minta ai enggau asi. Ambika orang asi sekempuk enggau ai seteguk. Pia Aki Buku Tebu benung makai, pia ga Sempurai enggau laun nemu berita.

‘Apa utai negu, apa utai nganu nuan tadi!’ ku Sempurai.

Nyau udah benyawa, baru Aki Buku Tebu nusi berita. Tusi iya mih berita ke ditemu iya lebuh ke ngabas reban. Ninga munyi nya Sempurai lalu bejaku.

‘Enti munyi nya, Petara ngarak nunu nya,’ pia ku Sempurai.

Sida ke bedandang umai lalu bebai sempun. Datai sida ba reban, bisi ga sida ninga utai ke didinga Aki Buku Tebu. Sida Sempurai enggau Keling lalu baum nyelup. Sida Keling dih ke empu umai ke alai Kumang niki pun lensat. Sida Keling belabuh nyelup. Kumang lalu mali diri nyadi buah lensat. Pia nyelup, pia ga Sempurai meransang api.

‘Laban bujang berani. Empa enggau tuga, angkatka urat, sungkangka batang,’ ku sampi Sempurai.

Laban hari endang kemarau, reban lama ga udah dikirai, angus bendar mih umai sida sebuat. Bala indu bedau betanam pagi siti laban endang baka orang maya nya agi diauka bangkai ibun. Nyau kedua hari baru sida indai Keling, indai Laja, indai Sempurai enggau bala indu bukai betanam. Nyadi sida ke lelaki ngelangkarka langkau.

Puas ke betanamka leka utai, ngetu bala sida ke indu ngagai tisi serarai. Meda bisi batang besai ba tinting umai sida Keling, sida lalu ngetu dia. Bala sida ke lelaki pan ngetu ga serumpu makai pinang. Sida duduk ba batang ke besai lalu betukupka buah pinang. Peda dih batang ti alai nukup pinang tak lalu bedarah.

‘Nyelai endar batang tu, tak bedarah,’ ku Keling.

‘Anang bula-bula kua, buat,’ ku Sempurai.

Angkat Sempurai lalu mantap senentang iya ke duduk. Peda amai pansut darah. Meda baka nya, Sempurai lalu belanda meresa batang nya tadi, belanda muak ke ulu, Sempurai nemu iku ular. Belanda ke ili tetemuka pala ular. Nya baru iya nyata nemu nya ular sawa. Agi ga sida ngeringak makai pinang. Malik Laja lalu nengkadah puchuk lensat. Dia Laja tepedaka buah lensat seigi-igi aja.

‘Landik endar lensat tu bebuah nempuakka seigi-igi, seleka-leka. Uji aku niki buat. Tang anang nganti aku meri kita. Enti ulih aku endang lalu aku empa. Kulit enda mih aku muai lagi,’ ku Sempurai laban ke enggai laun semua utai.

Niki mih tudah Sempurai. Bedau datai setengan batang peda tak merurut.

‘Lapa dih buat? Enda makai kua pagi tadi bengat tak ngenadai nya tulang?’ ku Pandak Segatak. Udah nya Pandak Segatak ga nguji niki. Baru engkabit tudah Pandak dinga merentum ga labuh. Puas bala ke beuji-uji niki. Orang mayuh lalu ngasuh Laja nguji. Baru deka nyingkau dan keterubah tudah Laja alai iya pan merurut ke baruh. Kepuas iya, sida lalu ngasuh Keling.

‘Alai mih buat. Kua enda mih lebih ari kami lagi,’ ku Sempurai laban ke enggai alah.

Tak bedau engkesap mata Sempurai, peda Keling udah datai di puchuk lensat. Diambi Keling buah lensat lalu disimpan dalam temilah. Anang deka meri orang udah iya nurun, ngayan enggai mih iya ngagai orang mayuh. Buah lensat nya dibai Keling tinduk ba panggau. Nyau jauh malam dia iya bisi irau ati. Diambi iya buah lensat nya lalu dikupak. Peda iya tak Kumang ngarung diri dalam buah lensat.

Pagi siti sida Keling serumah sampal nurun nugal. Nyadi indai Keling enda mindah nganti nugal ba tegalan sida empu. Pagi nya iya ngaga piring. Benung iya ngaga piring, dia indai Keling ninga utai tak bemunyi ba panggau Keling.

‘Si manuk, si pituk. Anang ngindik tikai balai anak aku,’ ku indai Keling nyapa ari bilik. Ninga utai nya agi ga bemunyi enda liat ati indai Keling lalu ngabas panggau Keling. Sereta datai di panggau Keling, dia dih indai iya tekenyit tepedaka Kumang.

‘Iya nuan ke bemunyi nya tadi endu?’ ku indai Keling.

Lalu dibai indai Keling pulai ke bilik mih Kumang tu tadi. Pulai sida Sempurai ke nugal, anak mit lalu ngambat.

‘Manah endar gamal indu temuai bisi ba bilik aya Keling,’ ku bala nembiak nusi ngagai Sempurai.

Sempurai lalu belanda ngebakka pintu sida Keling. Lalu tekenyit ati Sempurai meda pemajik gamal indu temuai nya.

Lemai nya sida serumah dikangauka apai Keling empuru ngagai ruai sida. Apai Keling nusi berita kebuah ke ngangauka sida serumah empuru

‘Kati ku alai nuan dih endu tak tau datai ditu? Ukai ga salah nemuai salah bejalai?’ ku tanya Aya Bujang Tuai.

Kumang lalu nusi semua berita alai iya ke datai di rumah orang Panggau. Udah nya lalu berandau mih sida dia nyau tengah malam orang pulai magang. Berengkah ari sehari nya Kumang lalu jadi enggau Keling.