Kumang Betelu

KEDUA TAUN Keling seduai bini iya udah beguilai, nya baru Kumang betubuh bisi. Nyadi pagi hari siti lebuh maya kandung Kumang nyau deka chukup bulan, Keling melah kayu api di tanju, lalu Kumang nutuk beras ba tempuan ruai sida iya empu. Limpang ari iya ke nutuk beras nya, dia Kumang tak bejarit bendar tama ka bilik. Nyau kenam kali iya udah tama ka bilik alai Keling lalu nilik ari seling dinding, dia iya meda Kumang tak pansut ari tajau sida sigi ke pemadu besai. Tajau sida sigi nya besai bendar, endang tak asai ke diau ba bilik siti asai diau dalam nyin. Lebuh Kumang tama tajau nya tadi, iya nadai nemu Keling bisi ngemataka pengawa iya. Udah Kumang tama ke bilik nyau ketujuh kali, dia Keling nilik baru ari seling dinding. Peda iya Kumang pansut baru ari tajau nya tadi. Ati Keling irau bendar meda iya baka ke bisi utai dikereja enggai kena peda orang. Udah nya Kumang pansut baru ka ruai lalu nampung pengawa iya ke nutuk nya tadi.

Keling pan agi ga mengkang melah kayu api, tang ati iya seruran irauka pengawa Kumang tak nyelai baka nya. Enda liat agi ati iya, lalu tama ke bilik lalu ngebakka tudung tajau besai ke udah alai bini iya tama. Lebuh iya udah ngebakka tudung tajau dia iya lalu tekenyit meda telu tujuh igi dalam nyin. Lalu ku pikir ati iya ; “Tentu tu telu bini aku.” Ati Keling ringat sambil malu bendar, laban nadai kala ninga mensia tau betelu baka nya. Keling lalu pansut ke ruai. Dia iya meratika kandung bini iya. Peda iya nadai kandung agi, perut bini iya tak nyau ngelempis mit.

“Oh !” ku ati Keling dalam nyin. “Naka mih pemalu aku tu, laban bini aku nya tak nyelai ari mensia bukai bap langit tu,” ku iya.

Iya lalu tama baru ke bilik lalu ngebakka tajau nya tadi. Peda iya telu nya tentu tujuh igi, lalu sigi-sigi kira mesai ujung betis iya empu.

“Tusah ngapa laban utai nyelai baka tu. Manah agi buai enggau telu nya,” ku ati iya. Iya lalu nanggung tajau sarang telu nya lalu dituang iya ngagai ujung bilik sida. Nama dih, baka ke nuang pekasam bulat, ku orang iya nuang telu nya, lalu pampul iya idung diri takutka bau banggar telu enti nya pechah datai di tanah. Nama dih, munyi redup buah embawang labuh puda, ku orang redup telu nya ga labuh ke tanah, tang tak enda pechah, mimit pan enda ga telu sigi-sigi bisi berabi.

Udah nya baru Keling nurun ke tanah mai sangkuh siti. Datai iya di tanah enda chechamang alai iya lalu natuk telu nya sigi-sigi enggau ujung sangkuh iya. Udah ditatuk iya sigi pansut ga anak mensia siku ari nya, tatuk iya ga sigi baka nya ga, pansut ga anak mensia siku. Tujuh igi telu nya, tujuh iku ga anak mensia pansut ari nya.

“Oh !” ku iya. “Enda mih aku kala, enda umur aku kala meda utai nyelai tu. Nadai mih aku nemu Kumang nya tau ngandungka telu tujuh igi, lalu telu nya ngadaka anak mensia. Nyelai mih Kumang tu ari semua indu bukai. Deka aku ngumbai diri enda bepentika iya betubuh bisi naka ulih ga aku menti diri empu, ngingatka semua utai ke mali dikereja. O, kada enda menawa Raja Genali, laban iya ngajar aku bebini ngambi Kumang suba, nambahka jaku apai seduai indai,” ku ati iya.

Benung iya agi tusah ati di tanah berundingka penyelai utai nya, alai Kumang pan tama baru ke bilik lalu nemu telu iya nadai agi dalam tajau. Udah nya iya lalu malik ngagai ujung bilik meda Keling ngeringak bediri ngilaka anak iya di tanah baru mechah pansut ari telu.

“Oh ! Mati mih laban iya nya !” ku Kumang. “Naka-naka mih penyayau anak tua digaga nuan bakanya dih Keling. Lapa-lapa alai nuan bengat ngaga sida baka nya dih Keling ?” ku Kumang.

“Eh, nama kesayau, ukai bisi guna. Siku pan sida nadai mih bisi mata. Semua sida buta magang-magang,” ku Keling.

“Ni enda buta, sida ga ditatuk nuan ngena ujung sangkuh,” pia ku Kumang nganu Keling.

“Badu enda, sangkuh mih kena aku natuk sida iya. Aku ga enda nemu reti. Nadai kala meda utai ngenyelai nya. Aku ga malu meda nuan beranak nyelai ari orang bukai bap langit tu,” pia ku Keling nyaut bini iya.

“Eee Keling,” ku bini iya. “Enti enda digaga nuan baka nya, enda anak tua buta.” Udah nya bini iya lalu nurun ke tanah lalu ngambi anak iya pulai ke rumah. Bini iya merap tiga iku, lalu Keling nyau ka enda teberapka empat iku.

Dalam dua tiga bulan udah bekau nya selalu bisi temuai datai ngagai sida. Orang datai ari mayuh bengkah menua, laban baru ninga berita mensia bisi tau betelu. Lalu sida deka medaka gamal anak mensia ada ari telu. Semua orang mayuh ti datai ninga berita nya alit bendar ati. Nadai kala ninga mensia tau betelu.

“Kenyau ari rangkat dunya nyadi kelia alah dataika diatu, nadai kala ninga mensia tau betelu. Nyelai mih dunya kemaya hari tu,” ku jaku orang mayuh.

Lalu ku orang bukai, “Nyangka anak nya tau ajih.” “Eh, anak Petara nya,” ku sekeda. “Eh, endang anak Kumang seduai Keling,” ku sekeda, “tang menawa alai sida nyelai bakanya.” “Anang jaku nya,” ku sekeda, “kitai enda nemu penyadi sida nya kedudi hari jemah ila.”

Nyadi semua anak Keling tujuh iku nya tadi nadai alai mantah ba perengka tubuh bukai, semina penyelai semua sida iya mih buta magang-magang. Jangka kebuah sida buta laban dipechahka Keling ngena ujung sangkuh, ukai endang mechah kediri empu. Enti enda pia nyangka sida endang sigi menawa ari kandung indai sida empu.

Keling seduai bini iya tak tusah bendar ati laban anak seduai iya tak buta magang-magang baka nya. Kenyau ari anak iya udah ada alah datai ngagai maya umur sida iya udah lebih setaun Keling nadai ngetu ngasuh semua orang ke bisi penemu ngubat mata sida iya. Manang enggau dukun ngenjing besundur pulai mansang bebelaka mata anak seduai. Belian enda ngetu malam belian, begawai nadai kala ngelaung lemai ga sida Keling begawai bedaya ngiga chara ngeraika mata sida nya.

Abis penuai manang di menua nya, dikumbai sida Manang Chelong pan diambi sida belian. Iya nya mih naka penyidi manang di menua nya. Semua orang ke dipelianka iya ngelamatu jarang bendar ketisau enda suman, amat baka ke muai empeleman. Manang Chelong nyau tuai bendar, mata enda lansik, pending enda ninga utai, ngeli nadai agi, belakang nyau bungkuk, bulu pala iya nadai agi chelum selambar. Nya mih iya, ke diambi orang nyau ulih ngiring baru tau bejalai. Nya alai belian mih iya dia semalam-malam nya, belian besagu-ayu. Hari siti sida lalu nganti mata bala anak Keling bisi insur pama, tang lalu nadai ga insur pama.

“Enda ulih mih sida tu, enda ulih geraika ngena leka pelian. Semengat sida tak udah jauh bendar dipeda aku, nyau ngili Batang Mandai,” ku Manang Chelong.

“Enda nemu chara mih kami tu aki, tak bepanggai ba nuan nya mih, bedaya ke sida iya. Sebarang chara ku nuan titihka magang. Anang ngantung penemu diri ba kitai sebilik tu,” ku Keling.

Udah pulai Manang Chelong nya tadi dia sida agi nganti. Nganti mata sida nya bisi insur pama. Kapa dih ngumbai bisi insur pama, ngenjing ngasuh mata sida bekerambit rapit agi ari selama.

“Enda mih nemu daya ngeraika mata sida nya,” ku Kumang. “Nya baka tengkira reta dalam bilik nyau silik kena ngupah orang ke bisi penemu ngubat sida,” ku Kumang gut-gut mutap kediri empu.

Kumang seduai Keling sinu sereta nelap enggau anak seduai taja mata sida nya buta. Sida serumah pan selalu nyaup seduai iya nyapi sida nya makai lebuh maya seduai ngereja pengawa bukai. Nya mih seduai iya setaun-taun nya jarang bendar mindah ari rumah. Seduai enda enggau orang mindah kiba kanan, laban kiruh ngintu anak seduai nya ke enda tau enda disapi makai enda tau enda diberi mandi.

Lebuh anak iya agi mit, Keling apin ngaga nama sida iya. Kira lebuh umur iya ke biak nyau tegar belanda nya baru iya ngaga nama sida nya. Iya ke tuai Kilat, nangkanka nya Galong, Sandau, Jisi, Ilin enggau Galang, lalu iya ke biak bendar bunsuka sida benama Mujong.

Dua taun udah nya, dia dih ati Keling seduai Kumang tak bisi berubah pengerindu ke anak seduai, laban seduai nyau berasai puas, berasai leju nupi sida nya. Seduai nyau berundingka pemuas diri nyangkung semua sida nya tujuh iku seumur idup.

Nyadi lemai siti Keling bejaku enggau bini iya. “Tua enda ulih agi ngidupka anak tua, laban sida nadai tau gawa. Dini tua tesangkungka sida gawa selama umur idup.”

“Nama chara tua enggau sida nya ? Dini endur tua engkah sida ?” pia deh ku Kumang.

“Eh, nama ketusah, pagila aku ngaga langkau dalam kampung din. Dia alai tua engkah sida nya,” pia ku Keling nyaut bini.