Kumang Jadi Enggau Bunsu Tengiling

Lebuh Keling Gerasi Nading udah diatur apai iya bebini jadi enggau Jawai Mensagai Kumang, dia dih Keling nyau bisi ati deka belelang.

Lemai siti iya berunding enggau sida sebilik. Bini Keling enggau sida sebilik nadai nyakal iya ke deka belelang. Tang sebedau iya nurun, dulu iya ngaga sebuah langkau ba puang kampung. Udah langkau nya tembu digaga Keling, iya lalu nganjung Kumang ngagai langkau nya. Hari siti baru Keling ngira diri nurun belelang. Keling ninggalka Kumang ba langkau kediri laban iya nangika orang ke bujang ba rumah panjai tuyu Kumang laban gamal iya bangat bajik.

Nyadi lebuh Keling nurun bejalai, dia Kumang mekal iya enggau beras tujuh leka enggau ketupat tujuh igi. Keling ke nurun belelang nya nadai meruan mena ditapat tak nyingkang nitihka peneka kaki. Tiga bulan Keling udah ninggalka Kumang dia dih Kumang nyau selalu merampau, nyau semampai tusah ati seilu-ilu. Udah mega ditinggalka laki agi ga kediri-diri ba puak kampung. Anang deka orang bisi nemuai ngagai Kumang kelimpah ari sida entua iya, dipansa orang bejalai pan nadai mih langkau tudah Kumang.

Kira salah kelala lemai siti, dia dih Kumang bisi ninga redup kaki orang mansang ngagai langkau iya. Datai semak langkau, orang nya lalu ngangau. 

‘Jadi rumah nuan Kumang?’ ku orang nya ngangau.

‘Lalu mih niki. Nadai pemali rumah aku tu,’ pia ku saut Kumang.

‘Sapa mih orang tu lagi?’ ku ati Kumang lebuh iya ninga nya ukai nyawa Keling. Lebuh orang nya nyau niki lalu dianchauka Kumang tikai lalu diambika Kumang kandi. Nyau maya makai lemai Kumang lalu berenah makai. 

‘Makai tua unggal,’ ku Kumang. Seduai lalu makai. Peda Kumang nadai endar asi empa temuai nya. 

‘Nyangka iya tu agi malu,’ ku Kumang bejaku dalam ati.

Badu makai seduai lalu sama duduk berandau. Nyau lama malam mayuh mih utai dikerandauka seduai, datai ba Keling ke belelang mih leka randau seduai. Dini hari dalam, seduai lalu sama belatur nindukka diri. Kumang pulai ngagai peninduk lalu temuai tinduk ba peninduk ke udah disediaka Kumang.

Lebuh hari tawas hari siti, Kumang bebela makai pagi. Lebuh dibai makai temuai nya madahka diri lembau makai. Udah Kumang badu makai, temuai nya madahka diri deka turun. Lebuh Kumang deka nyimpan bekal temuai nya madahka diri enda mai bekal. Lemai hari peda datai ga temuai nya napatka langkau Kumang. Peda Kumang nadai ga iya mai utai ke pulai turun.

Baka nya mih temuai nya tiap hari. Datai pagi nurun ga iya, pulai lemai nadai ga utai dibai. Nyau kelama seduai ke udah begulai dia dih temuai nya bejaku mai Kumang jadi.

‘Nadai Keling dianti nuan pulai. Kada enda udah mati dibunuh munsuh,’ ku iya bejaku enggau Kumang.

Kumang pan setuju lalu begulai mih seduai jadi melaki bini. Nyau lama seduai ke udah jadi dia dih Kumang tu nyau betubuh bisi. Nyadi laki Kumang tu baka ke udah-udah ga ulah iya. Kepuas ke meda laki iya bansa nya Kumang lalu beratika gaya pendiau laki iya, agi mega laki iya nya tak selalu lembau makai. Lemai siti, lebuh laki iya pulai turun Kumang tepedaka tubuh laki iya tak dibalut kesa.

‘Nama tubuh nuan tak dibalut kesa?’ ku Kumang nanya.

‘Eh...lebuh aku bejalai ba kampung tadi tetempuhka sarang kesa,’ ku iya nyaut Kumang.

‘Enda ga nuan mai ke aku,’ ku Kumang.

‘Enda nemu nuan ka makai kesa,’ ku iya.

  Lebuh kandung Kumang nyau chukup semilan bulan semilan hari dia Kumang beranak ngadaka anak indu siku. Udah Kumang beranak, laki iya jarang mindah laban ke ngibun Kumang di rumah. Apus tiga bulan umur anak Kumang baru laki iya belabuh turun baka selama.

Hari siti tengan niki mata panas Kumang bisi ninga orang tak bisi ngangau.

‘Ui... Kumang! Bisi nuan di langkau?’ Ninga orang bisi ngangau Kumang lalu nyimpan anak iya dalam raga lalu dipelawikka iya tebelayar atap. Udah Kumang ngelalaika anak iya Kumang lalu nilik orang ke ngangau. Peda iya Keling udah datai ba kaki tangga.

‘Oh...nuan Keling. Lalu mih nadai aku mindah,’ ku Kumang. Keling lalu niki nyuaka pachak babi, pachak rusa ke ulih iya mindah. Pemisi bukai ke ulih iya belelang ditinggalka iya ba rumah.

Lebuh udah badu merarau tengah hari nya Keling ngasuh Kumang ngiga kutu iya. Lebuh ke begiga kutu dia dih ai tusu Kumang nitik ninggang bau Keling.

‘Nama ai tusu nuan tak nitik dih Kumang?’ ku Keling. Kumang enda bemunyi. Kumang pan lalu nyabak. Keling angkat ari ke duduk lalu merening Kumang. dia dih burung tiung lalu bemunyi ba tisi langkau.

‘Keling seduai Kumang begiga kutu. Anak nyabak ka nusu,’ ku burung tiung. Keling lalu ngiga tunga nyawa anak ke nyabak. Keling lalu tepedaka raga beguyat begitang ba tebelayar atap. Keling lalu ngeruntun raga nya. Dia iya tepedaka anak tengiling dalam raga nya. Keling enggau Kumang pan sama tegenung baka empelekung mabuk keruh. Udah nya baru Kumang nusi cherita iya sekumbang ke ditinggalka Keling belelang.

‘Diatu agi ga iya pulai kitu, Kumang?’ ku tanya Keling.

‘Endang iya selalu pulai kitu. Sabung petang lagi pulai iya,’ ku Kumang.

Lebuh nyau deka sabung petang, Keling lalu nengkira ngipa laki Kumang ke pulai turun. Keling lalu belalai ba semak mua pintu. Maya alai pulai, pulai ga tudah laki Kumang. Datai laki Kumang ba mua pintu iya lalu dipantap Keling. Rebah laki Kumang, peda lalu bebaring bebali nyadi tengiling.

‘Au Keling,’ ku tengiling bejaku, ‘Aku semina ngetau jambai, nuan endang ngetau padi. Aku semina beambai  nuan endang empu bini. Enti baka tu, alah mih aku laban nuan,’ ku tengiling nya.  Udah iya bejaku munyi nya iya lalu ngapus ka seput diri. 

Nya baru Kumang nemu diri jadi enggau bunsu tengiling. Bangkai tengiling nya lalu ditumbakka seduai ba tisi langkau. Nyadi anak Kumang ke udah bebali nyadi tengiling nya dilepaska seduai ke dalam kampung. Kumang enggau Keling lalu begulai baka selama.