Pulai ke Batang Mandai Jenuh

Lemai begelansat enggau lubah ngenataika diri ba pengujung hari. Raban burung berengkah pulai ke sarangan, bala manuk mupuk pulai ke penepan. Aku enggau menyadi aku benama Dilang benung begagai ba tebing sungai, tebing pendai kami serumah. Kepuas-puas ke begagai enggau pangan diri, aku pan lalu mai iya pulai irauka hari nyau majak lemai.

Datai di rumah endang baka selama dulu ngabas apai aku di bilik. Sinu ga meda iya gali garing-garing. Taja baka nya iya agi nurun nangkal getah, ngintu kebun lada iya taja pan umur iya nyau udah lebih setengah abad. Apai aku kala madah, iya sanggup gawa baka nya laban deka melanja aku besekula. Udah suah mega aku madah ngagai iya, ngasuh iya diau aja ba rumah. Pinchin ari gawa ba kebun. Bebuih nyawa aku madah. Tang jaku aku semina baka nuang ai ba daun keladi. Nadai nemu enggau. Nyangka iya ke dulu agi ngetup garam ari aku, tentu nemu agi pasal pengidup. Tang nya suba. Maya agi regas, maya agi dapat.

Diatu apai gegaring ba katil tuai iya. Bisi berasai nesal mih aku enggau ulah apai ke bepalaka batu nya. Deka asai ati aku nganu tang enda kempang. Aku tu ga anak iya. Iya ga dulu ngetup garam.

Aku merati mua apai enggau penuh pengasih. Nyau puchat kelat mua iya peda aku. Mua ngeriut diempa umur ke majak lunggar, dipakai panas bisa maya ke gawa ba kebun lada. Pala iya engkebut belubah-lubah. Mata iya mupuk tebuka. Layu baka daun ke udah dipanchar mata panas pagi. Tuchum iya meda aku. Tang tuchum enda baka selama. Tuchum ngerising nyangka ngenatka pemedis. Apai majak merati mua aku. Lama ga iya merening aku. Aku nemu. Aku ngasaika perening iya nya tentu bisi reti. Besai bendar reti. Besai bendar pengarap iya ngagai aku. 

‘Anang irau nuan apai,’ ku ati aku bejaku kediri berandau nenggali. Apai nutupka mata baru, nyintak seput panjai.

Udah seminggu apai gegaring ba katil iya. Seribu macham chara dikena aku ngubat iya. Manang berapa iku manang udah diambi aku. Manang kami serumah. Manang ari menua bukai. Manang laut pan udah mih dikangau. Pelian bemacham pelian udah diatur. Nadai siti ke semitan. Nadai siti ke bisi asil. Bingung chukup bingung berundingka pekara tu. Sepital? Udah aku nguji mai iya tang iya enggai ke sepital. Enggai muai belanja. Enggai muai hari. Iya ngasuh aku majak nurun nangkal getah, ngereja kebun lada kami. Nadai nemu ngelaban jaku orang tuai.

Hari siti baka selama tumu pagi udah nurun nangkal. Hari ga manah amat. Rega getah ga tinggi. Tang enda mukai-mukai lalu bedau apus pengawa sehari nya alai aku dikangau menyadi aku pulai. Beguai-guai mih aku mulaika diri. Datai di rumah aku lalu terus tama ke bilik apai. Datai aku dia aku lalu nudukka diri ngimbai iya. Dada iya lalu aku untus begadai-gadai. Seput iya nurun niki enggau jampat. Apai merati mua aku. Perati aku ai mata iya labuh belinang. Apai nyabak. Dalam sabak ke sengian nya iya nguji deka nyebut utai ngagai aku.

‘Ijau ... aba nyangka enda ulih ngasaika pemujur pengawa nuan. Aba minta ampun laban enda ulih nulung dalam pelajar nuan. Tangkal getah, kerejaka kebun lada kitai dia.’ Apai ngetu bejaku. Batuk. Batuk nyau nyadi senyadi. Nyau rengkung-rengkung. Puas ke batuk enda lama udah nya iya lalu baka orang ke tinduk. Mata tutup. Seput padam. Tegepang asai ati. Enda berasai aku lalu nyabak. Udah lama aku enda nyabak. Udah nya aku lalu angkat nesau kami serumah. Bepadah ngagai kaban belayan suku juru, apai udah parai nenggali lemai, udah mati nenggali hari.

Lemai kami serumah lalu ngintu pemarai apai aku. Sehari semalam laban semua kaban udah datai magang. Hari siti apai dianjung ke pendam. Apai dikubur enggau penuh basa. Ba aku iya mih bujang berani kami sebilik. Kebun getah kebun lada nya tanda iya ngagai kami dua menyadi aku, Dilang. Dilang pan nemu apai udah nadai. Nyau sesikuk tudah tuai nyabak. Ba pendam nya mih aku besemaya ngagai apai aku deka terus nangkal getah lalu ngereja kebun lada kami sebilik. Udah abis pengawa ba pendam bala mayuh pan lalu belubah-lubah beseranyat ninggalka pendam. Aku pan lalu narit jari Dilang mai iya angkat pulai.