Engkejemu enggau Engkejuang

Jerita tu nyadi ba Lubok Meram. Ba menua tu bisi dua iku indu ke rapat bendar enggau pangan diri. Nama seduai iya Engkejemu enggau Engkejuang. Gamal seduai sama bajik, tang iya ke lebih agi bajik nya Engkejemu. Iya  mega ngembuan mayuh penemu enggau pengelikun pendiau sereta landik ngereja mayuh  macham pengawa. 

Nyadi Engkejuang tu jauh lain agi perangai enggau gaya. Iya cheredit bendar bejaku sereta ketik-ketik pendiau enggau tak gegilik gamal. Enti temuai bisi datai, dudi orang bukai, dulu iya datai nunga. Iya ke bendar Engkejuang endang jegit ari semua sida ti sama serambau. Ba pasal ngereja pengawa iya endang enggai alah laban orang. Nama-nama pengawa endang diuji iya magang, tang gamal utai digaga iya nadai tentu menuku. Semina nama tembu. Enti  numbuhka pengawa iya enggai dudi. Ku ati iya, awakka tembu dulu ari enggi orang tang suah pengawa iya nya tadi lalu enda tembu.

Nyadi sekali lebuh seduai iya benung mandi, dia Engkejuang nanya Engkejemu. “Nama utai kena ngasuh buk panjai awakka sabaka enggau enggi nuan, wai?” ku Engkejuang.

“Eh! Wai, nadai nya bisi utai memacham dikena aku dih wai sulu, semina diasuh aku sugu tulang tilan.” pia ku Engkejemu nyaut.

Ninga munyi nya Engkejuang lalu enda chechamang lalu ngambi tulang ikan, lalu diasuh iya nyugu buk iya. “Sugu buk aku tulang tilan, sugu abis, sugu lengis,” ku Engkejuang.

Tulang tilan lalu nyugu buk iya munyi ti endang diash iya. Peda udah nya tak nadai selambar agi buk Engkejuang tinggal, nyau lasu mih pala iya. Meda utai baka nya, iya lalu beguai-guai sereta enggau sabak-sabak ngagai Engkejemu, madahka buk diri udah abis disugu tulang tilan.

“Anang ke ngasuh panjai, ngasuh buk aku abis,” pia ku Engkejuang muchau kediri.

Meda utai udah nyadi baka nya, Engkejemu lalu madah ke iya jalai nyugu.

“Ka agi ila wai, munyi tu nuan ngasuh tulang tilan nyugu buk nuan. Oh! Tulang tilan! Aku minta nuan nyugu buk aku enggau manah awakka iya mansang panjai merundis galak melesak,” pia ku Endu Engkejemu ngajar Endu Engkejuang. Ninga munyi nya, nya baru Endu Engkejuang nitih ka ajar Endu Engkejemu.

Enda lama udah bekau nya, Engkejuang tepedaka lelaki siku ti sigat serta gangam bendar duduk ba ruai sida Engkejemu. Tama iya ke bilik, dia iya lalu nelai Engkejemu.

“Oh wai! Sapa lelaki ke sigat bendar gamal duduk ba ruai kita dia?” 

“Eh wai! Utai ulih aku nempap ari limau rangan,” pia ku Engkejemu.

Ninga munyi nya Endu Engkejuang lalu beguai-guai pulai. Udah nya iya lalu nyau ngambi daun limau rangan, tang enda milih iya ke manah, iya ke chukup tuai, tak sebarang ambi. Laban ku ati iya, asal nya daun limau deka aja nyadi. Nya alai ambi iya daun ke tuai sereta udah bisi charik udah diempa ulat. Daun nya lalu ditempap iya. Peda  lalu bebali nyadi aki tuai orang. Iya ga tuai, gamal iya ga jai ditambahka agi enggau ikil nyau penuh tubuh. Meda baka nya Endu Engkejuang lalu mansang ngagai Endu Engkejemu madah ka penyai utai ulih iya nempap ari daun limau rangan.

“Nadai aku nemu belaki orang ngenuai nya,” ku iya madah ngagai Engkejemu sereta enggau sabak-sabak. “Kati alai enggi nuan sigat bendar gamal lalu enggi aku jai sereta tuai dih wai?” pia ku iya nanya.

“Kati ku enda pia, nuan ga enda milih daun limau ke manah. Tak ambi sebarang ambi, dini enda baka nya dih utai ulih nuan,” pia ku saut Engkejemu.

Enda lama udah nya seduai iya beduruk mantun ba umai seduai. Lebuh seduai iya mantun nyamuk mayuh bendar datai makai seduai iya. Meda baka nya Engkejemu lalu bejaku nganu bala nyamuk.

“Naka ga kita tu nyamuk, deka bendar kita makai darah aku. Uji ambika bini kita sekali aku tu,” ku Engkajemu gut-gut bejaku kediri. Ninga munyi nya bala nyamuk lalu nabanka Engkejemu terebai ngagai rumah Raja Nyamuk. Datai din, ba rumah Rajah Nyamuk, Engkejemu lalu nyadi bini Raja Nyamuk. Nyau kelama udah nya, Engkejemu nyau mansang tusah ati laban iya enggai nyadi pemakai ti diempa sida nyamuk. Nya alai iya nyau enda nemu runding agi.

“Enti baka tu mati mih aku tu,” ku Engkejemu bejaku kediri. Taja iya empu enda enggau Raja Nyamuk makai, iya selalu mela laki enggau naka pemanah. Iya enda ngayanka penusah ati diri ba mua Raja Nyamuk. Nyau puas iya ke berundingka penusah diri, dia iya lalu ngaga diri sakit. Meda iya sakit dia dih Raja Nyamuk bekenanas ngiga jalai ngubat iya. Sida iya lalu ngambi manang. Dia dih Engkejemu lalu dipelianka jaban, dipesautka likup.  Tang  anang deka ngasuh iya gerai nyau ngasuh iya majak balat agi. Udah nya tadi Engkejemu lalu ngaga diri mati.

Meda iya mati, lalu disenggai bala Raja Nyamuk enggau chukup gaya sereta enggau chukup basa. Diberi Raja Nyamuk baya enggau chukup ngepan, chukup pekayan bansa Iban. Nambahka nya mega, iya dibaya enggau setawak, dumbak, bendai, menyarai, engkerumong, gung, benda, enggau chukup tengkira. Lebuh  maya nganjung antu, Engkejemu lalu dianjung bala nyamuk ngagai pendam. Datai din, Engkejemu enda ditumbak, tang diengkahka sida iya ba atas panggau ke endang udah digaga sida.

Kebuah alai iya enda ditumbak, laban endang nitihka baka adat Raja Nyamuk, semua turun menurun Raja enggau bini sida iya enda ditumbak enti lebuh sida bisi mati, tang diengkahka ba atas panggau.

Udah  nya semua bala orang ti nganjung antu lalu pulai ke rumah. Lebuh sida udah pulai semua,  Engkejemu lalu ngesaika diri angkat lalu ngesaika kain ke dikena Raja Nyamuk malut tubuh iya. Udah bungkus tubuh iya tebuka ari tubuh iya, iya lalu pulai ngagai rumah iya empu, lalu mai semua utai ti udah diberi Raja Nyamuk ke baya iya. Nyau baka ke pindah gaya pendiau Engkejemu empa pemayuh utai dibai iya. Datai iya dirumah sida, orang lalu begauka utai ti dibai iya. Bala sida serumah lalu nanya iya, dini alai iya bulih utai ngemayuh nya. Iya lalu madah ngagai sida, semua utai nya ulih iya belaki enggau Raja Nyamuk.

Ninga berita nya, Engkejuang laban iya enggai alah laban orang nyau sengit-sengit, lalu nurun ke umai, minta bai nyamuk awakka bulih pengeraja baka enggi Engkejemu. Datai iya ba umai endang baka selama, mayuh nyamuk nutu sereta makai iya. Meda bakanya iya lalu bejaku. “Eh nyamuk! Deka bendar kita makai aku tu. Ambika bini kita sekali aku tu nyah,” ku iya.

Ninga munyi nya, nyamuk lalu nabanka iya pulai ngagai rumah Raja sida iya. Datai din Engkejuang lalu diambi Raja Nyamuk ke bini iya. Nyau maya orang ti berapi apa indah, Engkejuang lalu begigaka beras, tang iya nadai nemu beras seleka. Semua benda enggau tibang dipeda iya penuh enggau darah magang. Kati ku enda bakanya, nya ga endang pemakai nyamuk, baka padi ti endang pemakai kitai. Laban iya ke enda liat ati baka  Engkejemu, iya lalu ngeransi laki iya Raja Nyamuk.  “Nadai apai aku kala ngajar aku makai darah baka kita tu. Ukai orang tau enggau begulai sejalai baka kita tu.”

Ninga ransi bini iya munyi nya Raja Nyamuk lalu ringat sereta pedis ati ngagai Engkejuang. “Nuan tu meri aku malu ba mua seribu, sereta lalu mechat pemakai kami. Nya  alai nuan kena ukum, dibuai ari menua tu,” ku Raja Nyamuk nganu Engkejuang.

Udah bedau bejaku, Raja Nyamuk lalu ngasuh anembiak iya nanchang kaki enggau jari Engkejuang lalu narit iya ngagai menua sunyi di dalam kampung. Iya lalu ditinggalka nyamuk di dalam kampung kediri.  Udah  nya sida lalu pulai ke rumah. Nyau kepuas tudah Engkejuang ke engkasak ke kiba, engkasak ke kanan, nya baru tanchang jari enggau kaki iya tebuka sereta lalu merubus ari tubuh iya.

Iya lalu beguai-guai mulaika diri ngagai rumah sida empu enggau naka pemedis ati. Tubuh iya nyau abis malui sereta generam bekau pantang bala nyamuk. Datai iya dirumah, sida serumah lalu begau meda iya nyau nadai temu gamal agi. Anangka bulih utai mesai bulu mata, nyema jaku, kain ba punggung enggau baju ba tubuh pan abis ridang.