Juluk Ati Endu Piah

Endu   Piah enda ulih ngetanka asai ati ke sinu lebuh ti dianuka  Tuan Jabu ngumbai iya indu ti enda ingatka diri. Enda nemu ngenang budi.  Utai tu bepun ari  Piah ke  meli kerita mar berega bejuta ringgit enggau nadai pemendar iya. Tuan Jabu minta bini iya  ngemulaika  kerita nya ngagai   penjual iya.

Ku Endu Piah, mensa mih rega kerita nya. Duit Tuan Jabu mayuh, projek pan mayuh bulih. Kilang dua tiga buah. Rega nyampau nya ukai nya mar bendar. Rega kerita Datin Beremas, tawing rapit iya jauh mar agi ari nya. Nadai mih ninga laki iya nganu. Tang Tuan Jabu mutap ari pagi sampai ke  lemai nyau baka dunya ke deka  runtuh. Orang  madah  Tuan Jabu enchadi  tang iya enggai ninga. Tuan Jabu deka ngasuh bini iya bebelanja enggau bejimat tang Endu Piah madahka  duit nyampau nya ukai mayuh bendar. Duit sejuta ringgit hari tu enda  sama nilai  enggau  sejuta  dulu kelia. Duit kemaya hari tu udah nurun nilai mata duit iya.

Endu  Piah berasai ringat ninga  Tuan Jabu madah iya nembiak orang ulu ke enda nemu diri. Tuan Jabu mega berasal ari menua pesisir, ari rumah panjai. Seduai iya endang  orang rumah panjai. Nama kebuah enggai enda mangkit  pasal hal nya, iya enda ulih nerima. Nama jai amat kini nembiak rumah panjai. Tuan Jabu patut  ingat, iya nya nembiak rumah panjai ke udah mujur. Ari ke diau idup manuk kerais pantuk, diatu iya nyau ulih idup  senang lantang. Nama salah kini enti iya bekerita mar ketegal deka nyaga  status Tuan Jabu. Agi mega  gosip berita selebebu ngapa nyau udah berengkah didinga madahka  Tuan Jabu deka diberi gelar   Datuk enda  lama  agi. Enti berita nya amat tentu iya ila pan digela  Datin. Nyadi endang patut mih iya ngena  kerita mar  dikena nyaga  status. Bini orang pedagang ke mujur sereta deka digelar Datuk, nadai jalai ngena kerita murah. Lagi nyau  diketawaka  orang. Datin ke bukai  semua ngena  kerita mar, beperindang  di kelab  sereta nemuai ke menua tasik.

Kerita lama iya udah patut dibuai  ke garaj besi buruk. Dijual pan orang enggai mih  meli. Mamak ke be jual chandut  pan  udah ulih ngena  Mercedes, tu dih iya, bini  orang kaya. Orang Kaya Jabu. Sapa enda ngelala. Orang Melayu dah nemu, orang udah ga ngelala. Orang kaya Iban.

Datin Beremas ke nyaup iya meli kerita nya, sama model enggau kerita Datin Beremas.  Iya empu enda nemu  nama model kerita nya tang  Datin Beremas madahka iya kerita  Eropah. Kerita  ke balat dikerinduka  orang mayuh tang  jarang ulih dibeli laban kelalu mar. Tukuh pendiau iya sporty, mit  di belakang baka  tubuh  burung lalu  tempat duduk iya muat dua iku aja. Enti iya ngembuan kerita nya, iya diatu dikiraka  sama tikas enggau  Datin Beremas. Baka diri menyadi. Kerita Datin Beremas bechura mirah, kerita iya bechura kuning. Iya enggai dikumbai sengkek enti ila iya digelar Datin.

Iya pan enggai alah dilaban Datin bukai taja pan iya empu apin begelar  Datin. Bala pangan iya mayuh udah digelar Datin. Kadang-kadang iya empu suah  disalah anggap digelar Datin mega. Tempias nya udah bisi ba tubuh iya empu. Pendiau enggau gaya pengidup iya endang baka Datin. Datin Beremas mih ke ngajar iya  senentang mayuh  perkara. Sebedau digelar Datin, Beremas pan baka orang indu ke bukai, indu selama, buk besanggul lalu semampai ngena baju kurung. Sepengudah ke digelar Datin imej iya berubah seratus peratus, buk iya dulu suba besanggul udah berubah nyadi  imej blonde, chura chelum nyadi  perang. Bibir enggau mata iya nama agi, beselup sereta  bechelak baka primadona filem Bollywood. Pendiau  Datin Beremas betambah begaya udah iya ke meli kerita mar  bechura merah, dipeda nyau cheli-cheli  gaya mua iya. Semua mata Datin bukai bela merati iya memagang. Iya mujur ngalahka Datin bukai ketegal chara iya begari enggau begaya nya. Ketegal  Datin Beremas nya ke pangan rapat iya nya alai iya empu pan deka mega baka  Datin nya. Dulu suba iya meli inchi ti dijual ba kaki lima. Inchi ke diselup ba  bibir iya nyau lela lebuh kena pancharka mata panas, nyau lilih sampai ke dagu. Iya agi ingatka orang ke ketawaka iya lebuh iya merarau ba  sebuah restoran ke pegari ba bandar raya Kuching. Mujur ga bisi Datin Beremas. Iya mih ke ngelalau  Piah,  ngasuh iya meli kereban penganta ke betul sereta ba kedai ti pegari nama. Ku Datin Beremas alat penganta ti dijual ba kaki lima nya ukai ti chulin. Udah nya  baru  Endu Piah nemu utai tu benama  Max Factor, Lancome, Chanel, Nars, Estee lauder, Dior enggau Yves Saint Laurent. Chap nya kediatu ti udah nyadi chap ti dipiliha iya.

Diatu iya berasai enda engkeman laban ke bedau digelar Datin. Nya mih kebuah iya suah besampi ngagai petara ngambi Jabu  jejampat bulih gelar  Datuk. Lebuh iya ninga  Tuan Jabu deka bulih  gelar nya  ati iya balat gaga, balat lantang, semampai tuchum lelegup.

Endu  Piah nyau udah berengkah masang angan-angan  bepengidup baka Datin. Ba runding iya nadai  salah enti sema iya masang angan-angan baka nya. Tiap-tiap iku orang endang meruan bisi angan-angan. Orang ke nadai angan-angan nya orang ke udah  mati. Iya  orang idup. Orang idup ke idup lantang, mesti pandai ngatur pengidup diri enggau chara pengidup orang kaya. Ngembuan sebuah  kerita mar nya siti ari chara-chara iya. Orang ke enda tentu kaya pan ulih mih meli  kerita mar. Tu iya, bini orang dagang ke kaya raja. Kena mih nyaga status.

Kerita baru nya mih ti nyadika  imej iya enggau Tuan Jabu. Iya enda tau ringat, enda tau muras. Iya mesti  nerima. Iya enggai dikemaruhka bala Datin bukai enti iya ila udah nyadi Datin. Lagi  Tuan Jabu nya mih ke malu mega. Iya deka nyaga status. Tuan Jabu enda ulih  agi berpikir baka  tukang kebun sekula. Tikas iya udah niki.

Dulu suba  Tuan Jabu endang  tukang kebun sekula.  Pendiau buchai-buchai sereta nadai beduit. Deka  ngeshow diri pan enda nemu.  Ngena baju sampang  putih chap pagoda  enggau tanchut   kelabu kain khaki. Diatu  Tuan Jabu ukai agi baka suba. Tuan Jabu diatu udah kaya raja. Siku orang dagang ke mujur.

Diatu Tuan Jabu udah bepangkat  tinggi. Tikas pengidup iya udah niki. Bala pangan iya ukai agi orang menua pesisir tang orang ke bisi tikas  Datuk, Tan Sri  enggau  macham-macham  agi. Tikas iya niki enggau chara ngenyit. Tuan Jabu udah nemu bejaku  orang putih. Enti iya bejaku  orang putih orang enda nyangka iya semina pas peresa  SRP. Jaku iya nyau munyi  orang putih.  Tang iya ke bendar iya semina  belajar jaku  orang putih  ba kelas sekula  malam aja.

Ukai  orang nemu  sejarah pengidup iya. Ukai  orang deka  ngurik profil iya. Orang meratika gaya pendiau  iya. Iya  begaya.  Ngembuan selangkuh tubuh ke  tegap. Ngembuan gaya  lelaki korporat. Bisi  rumah besai. Kerita mar. Ngena pekayan chap ke mar. Bejaku orang putih. Tuan Jabu lelaki spesial. Tuan Jabu lelaki macho.

Baru diatu Endu Piah nemu utai ke nyelai pasal lelaki  iya. Suba nadai iya bisi ati deka meda mua  Tuan Jabu. Nembiak  tukang kebun sekula dini bisi orang indu bisi ati ke iya. Endu  Piah suah ngelese iya sereta ngemaruhka  Tuan Jabu. Ku iya kechiak  Tuan Jabu bau tengung. Mandi enda kala besabun. Iya ngelar Tuan Jabu macham-macham; tu-tulah, nya lah. Iya endang nadai ngembuan pengerindu ngagai  Tuan Jabu. Suba iya bisi ati deka belaki enggau pengajar. Lebuh agi besekula iya bisi ati ke Pengajar  Bangga. Pengajar Bangga sigat  begaya, bisi moto  vespa  biru. Iya suah numpang vespa Pengajar Bangga maya pulai  sekula. Nyau ensinat  idung iya lebuh orang madahka iya nya ambai  Pengajar Bangga. Siang malam iya  ngenangka  Pengajar Bangga sampaika diambi rmimpi begulai enggau  Pengajar Bangga. Iya  dikumbai nembiak ke manchal sereta  beperangai gila-gila. Ujung-ujung  Pengajar Bangga bebini enggau indu bukai. Endu  Piah merampau lalu besehari-sehari enda masuk  makai.  Lebuh indai iya ngasaika iya deka belaki, indai iya pan lalu ngiga laki ke iya. Maya Tuan Jabu datai nanya indai iya lalu terus nerima. Ku  indai iya, Tuan Jabu nembiak ke manah sereta tau diambi nyadika laki. Iya nyau duie-duie nyabak lebuh pengerindu iya ke  Pengajar Bangga jelungan. Iya nadai ati ke  Tuan Jabu. Tang  indai iya madah  Tuan Jabu nya bagas gawa sereta sayau ke iya. Udah iya jadi  baru iya nemu  Tuan Jabu bisi juluk ati, bisi visyen. Tuan Jabu bekerja kuat laban deka ngubah pengidup iya.

Endu  Piah endang orang ke rindu nganta kenyau ari iya ke agi besekula menya. Jabu labuh pengerindu ke Endu Piah ketegal gaya pendiau iya.

Endu Piah pan ukai  orang  ke nemu sejarah pengidup iya. Nya  sejarah menya. Diatu  Endu Piah bini orang. Dulu suba  Endu Piah pan enda nemu jaku orang putih. Diatu Endu Piah udah mereti bejaku orang putih. Bisi pengajar datai  ngajar di rumah. Taja  pan  dilah Piah  tilur lebuh deka nyebut leka jaku Inggeris tang iya enda  malu. Enda ngira nya salah tauka  betul iya tetap bejaku. Orang bukai  pan ukai nya  pandai bendar bejaku  orang putih, main lantak aja.

Bala pangan iya pan mayuh mih ke bejaku  orang putih. Deka nyaga status. Nadai pas pan enti udah bejaku orang putih orang pan nyangka sida udah pas. Abis kurang pas SPM. Iya ti bendar  SRP pan Endu Piah enda pas. Lebuh agi besekula iya endang nembiak ke jegit. Nadai pengawa bukai; kereja nguntik pengajar aja. Pelajar endang enda dikeibuhka iya. Tang laban ke benasit manah, udah ke jadi enggau  Tuan Jabu, pengidup iya berubah. Tuan Jabu  nembiak ke bagas. Kuat ngiga chara ngubahka pengidup diri. Bisi ngembuan juluk ati kediri empu.  Jabu bedagang enggau mujur. Endu Piah numpang tuah Jabu. Pengidup iya diatu  berubah. Kenyau ke diau ba nengeri,  iya semampai bejaku orang putih. Bejaku orang putih nya ulih ngangkatka tikas status iya. Orang deka ngumbai iya pandai. Orang pandai.  Badu enda mih, ga jaku antarabangsa.

Iya enda pedulika chara nyebut  nya  betul tauka enda, iya  endang tetap deka nyebut  taja  pan diketawaka orang. Enti malu kemaya tau pandai. Iya mesti  berani.nyau kelama-lama  chara nyebut iya deka nyadi  betul baka orang bukai. Enti iya takut kemaya iya nemu jaku  orang putih. Iya enda  takut dikeleseka orang. Iya deka  belajar.

Niat Endu Piah deka nyaga status tang  Tuan Jabu enda ulih nerima. Tuan Jabu madah enda ibuh. Iya enggai ngasuh  Endu Piah nitih  perangai orang  bukai ba nengeri tu. Sida nya orang sosial. Orang betikas  global. Endu Piah apin datai ba tikas nya. Iya deka agi meda  Endu Piah diau di rumah. Nyaga pemakai  iya. Nyaga anak-anak. Ukai ngabiska jam ba  kelab tauka  beganjuh kin-kitu. Tuan Jabu enda rindu.

Datin Beremas pan mesan anang diau  di rumah aja lalu nadai ngaga nama-nama  aktiviti. Lagi  boring. Boring-boring ku iya. Ba  kelab mayuh pangan, mayuh tawing. Ulih berandau ruai,  ulih bekaraoke, ulih bepocho-pocho, ulih ngaga tu, ulih ngaga nya.  Kapa irau ke utai  di rumah.

Endu Piah bingung lebuh  Jabu madahka business iya bisi penanggul. Iya ngumbai laki  iya betundi  aja. Tuan Jabu enda kala becherita pasal business iya. Enda mukai-mukai maya nya  iya madahka business iya bisi penanggul. Endu Piah  enda nemu nya  Tuan Jabu bejaku amat tauka chara-chara iya dekat nagang iya ari ngembuan  kereta mar  nya. Endu Piah enda nemu.

Tuan Jabu madahka business iya  nyau enda baka suba. Bisi kilang  dipejal tutup. Jual kusut. Mayuh kontrak dikinsil. Iya endang napi mayuh pengerugi. Duit jali ari bank pan enda  ulih dibayar enggau penuh iya. Mayuh utang enda dibayar. Duit  bungai mayuh. Tuan Jabu sereba bingung sereta sereba tusah ati.

"Kitai patut bejimat, enda tau bebelanja sepeneka ati agi," ku Tuan Jabu mutap.

Iya irauka jemah ila  jelungan enti enda bejimat, enti enda bekelimat. Enti  Endu Piah sengapa bebuaika duit  tentu iya ila enda tebayarka  utang. Utang iya mayuh nyau ngelingi punggung. Bank-bank tengan  ngasuh iya mayar utang.

Iya nangika  semua reta tengkira iya ila deka  tegadai. Kerita ti Endu Piah beli nya ukai mit rega iya. Bayar bulan   pan tinggi. Muai duit aja. Kapa meli  kerita agi. Ba  rumah udah bisi dua tiga buah  kerita. Nyadi  indu ke bisi  kelas ku.

"Aku minta nuan mulaika  kereta nya!" terit munyi nyawa Tuan Jabu ngeluarka perintah.

Piah bingung sereta sereba salah. Utai ga udah dibeli ukai  ulih dipulaika  baru. Nadai kala digaga  orang.

Endu Piah enggai nitihka perintah Tuan Jabu ti enda ulih  masuk akal nya. Iya balat sayau ke  kerita nya. Utai ti dikedeka iya kenyau iya agi mit suba. Kerita ti dijuluk ati iya kenyau ari mit.  Diatu kerita nya  udah diempu iya. Kapa iya mulaika nya baru. Enggai iya nyual nya pulai. Baka ni kati iya tetap dekaka kerita nya. Enti sema  Tuan Jabu enggai mayar, iya deka nguji mayar kediri. Iya deka ngiga kereja tauka  muka business memit dikena ngulihka duit. Enti bangat tusah iya sanggup nyadi model iklan tauka pelakon drama. Mua  pan enda jai. Tubuh agi ga begetah. Kulit iya burak bebetau. Bibir iya merekah.

Iya enda peduli agi ke Tuan Jabu ke deka nganu iya tauka enda. Iya enggai ngemulai tauka nyual kereta nya. Iya deka ngena iya. Iya deka mayar kerita nya kediri enti sema  Tuan Jabu enggai ngeluarka duit. Iya udah mutuska ati. Iya udah ngaga pemutus runding.

Tuan Jabu nadai bekira enti tikas business iya manah. Beli mih barang utai ke deka ati. Sebedau tu pan iya ngasuh bejimat bekelimat.

Endu Piah dua hari udah enda pulai ke rumah udah ke balat bendar betalat enggau laki iya.  Iya ke rumah Datin Beremas. Tuan Jabu nadai ngambi iya. Tuan Jabu ngelakka aja lalu enggai ngumbuk iya. Iya ngelakka ati iya ke kering nya nyadi lembut kediri. Taja pia Tuan Jabu berasai sunyi udah ke Endu Piah nadai dia. Iya suah ngigau kediri sambil ngalih-ngalihka surat utang ari bank-bank. Iya nyau balat irau ati sereta nangi lebuh ke macha surat nagih utang ti patut dibayar pulai. Ari ni iya deka ngiga  duit, dagang iya nyau majak kusut. Mayuh bendar peminta ti digaga ke atas kompeni iya  udah dikinsil tauka ditarit pulai. Endu Piah rua enggau belanja lalu  sanggup meli kerita mar ti dibayar bulan enggau rega ke mar mega. Jabu nyau bungau pala, bepeling-naning utai dipeda asai ke deka luput.

Masuk hari ketiga Endu Piah pan pulai. Tuan Jabu ngaga diri enda nemu. Iya alit ati meda  Piah pulai ngena  teksi. Kini tunga kerita baru iya ke mar  nya. Jabu sigi enda nanya. Iya diau diri. Belubah-lubah Endu Piah datai ngampir iya. Endu Piah besugang ba kaki iya sambil nyabak duie-duie. Tuan Jabu enggau naka ulih nagang ati ngambika iya enda  ringat. Iya alit ati meda ulah Endu Piah ke enda mukai-mukai berubah nya.

Tuan Jabu nadai engkeretik meda ulah bini iya. Iya diau jenuh. Iya alit ati meda ulah bini iya ke minta ampun sepengudah tiga hari ninggalka iya laban ke muras. Jabu berasai geram lebuh ke ngenangka perangai iya nya.

"Laki Datin Beremas udah nyeritaka pasal business wai ti benung majak nurun sereta utang ti enda tau dibayarka nuan, " munyi nyawa Piah sambil munyi sabak iya. Ai mata iya labuh bekelinang  sambil bekali-kali minta ampun sereta besemaya minta pemendar Jabu dulu sebedau ngaga sesebengkah pengawa.

Jabu ngurut-ngurut  rambut bini iya seraya  nanya, "Ni kerita mar nuan dih?"

Piah majak nyabak. Sedu-sedu  bunyi sabak iya.

"Udah aku  jual wai,"ku Piah nyaut enggau lubah...