Lenyau Akal

Nyau kepuas Tekura diau kediri nadai orang enggau berandau, dia iya berunding deka mindah ngagai menua bukai ngichaka bisi orang enggau bepangan. Angkat dih Tekura tu tadi tusah bendar berundingka jalai tau kena iya jampat datai ba menua bukai. Deka iya terebai nadai mega sayap, deka merau enda mega tau beban perau. Nya alai tusah mih ati tudah Tekura, tusah diau kediri.

Seninjik bendar hari siti iya bisi betemu enggau Itit dua iku.

‘Oh! Kini seduai tak ngena gaya pejalai?’ ku Tekura.

‘Eh! Deka bejalai ngagai menua bukai kami duai tu ngichaka diri tau betemu enggau orang bukai. Enda nyamai bendar kami duai tak legut-legut diau kediri,’ ku saut Itit.

‘Enti munyi nya, ngena bendar mih nya, aku tu pan berunding deka bejalai ngagai menua bukai. Tang aku tak nadai daya mindah. Sayap aku tu nadai, kaki enda panjai,’ ku Tekura.

Itit lalu nyaut iya. ‘Nadai nya nusah nuan dih Sambi. Enti nuan nyengala amat deka mindah ari menua tu, kami duai ulih nabanka nuan terebai.’

‘Au, nya keba manah, enti seduai deka nabanka aku terebai. Tang ni maya kitai angkat dih? Ku Tekura nanya.

‘Nadai nya anggur lama,’ ku Itit. ‘Enti nitihka aku tak pagila mih kitai angkat.’

‘Nya alai hari siti sida tiga pan lalu ngatur diri mindah ari menua nya. Atur sida terebai baka tu; nyadi Itit dua iku nya diasuh manggum lumpung kayu ba puting setak-setak lalu Tekura diasuh ngetup kayu ba tengah-tengah. Kebuah ngasuh iya ngetup kayu, ngambika nyamai ditaban terebai.

Udah nya sida lalu angkat terebai. Peda tak kebap-kebap sayap Itit dua iku nya terebai. Nyadi Tekura tak semina kating-kating ngetup lumpung kayu. Nadai utai ngenyamai nya ditabanka Itit dua iku terebai. Nyau kelama sida terebai, dia sida mansa rumah anak mensia. Tak enda mukai-mukai maya nya anak mensia bisi nengkadah ke langit lalu tepedaka Tekura terebai.

‘Apu! Nama nya tak Tekura terebai,’ ku anak mensia. ‘Tentu Raja Tekura. Enti Tekura ngapa dini nemu terebai.’

Ninga jaku kelangkung anak mensia munyi nya tudah Tekura tak berasai besai mua. Ngambika anak mensia amat ngumbai iya nya tadi Raja Tekura, dia iya berunding deka madahka diri amat Raja Tekura.

Iya lalu bejaku. ‘Amat aku tu mih Raja Tekura,’ ku iya.

Tekala nya iya meranggapka mulut diri bejaku lalu tebelengka ari papung kayu ti diketup iya nya. Nama agi dih, lalu labuh ke baruh mih tudah tuai lalu redak mih iya tedampar ninggang gerugu batu galang.

‘Sayau bendar Raja Tekura nya labuh dih apai,’ pia ku anak mensia.

‘Kemaya kitai kala ninga tekura ngeluluka diri terebai? Tekura langkung nya anak ditabanka Itit terebai,’ ku Apai Anak Mensia.

Nyadi Itit dua iku nya tadi lalu lapu-lapu terebai ke menua bukai. Terebai nginda mih seduai baka lang, seduai mega bisi sayap. Nyau sangkai ba menua bukai. Dia mih seduai lantang senang begulai enggau sida bukai.