Engkejuang enggau Entimuk

Engkejuang enggau Entimuk nyai dua iku dara ke diau begulai ba langkau sebuah. Taja pan seduai begulai ba langkau sebuah tang utai tupi baka babi, manuk enggau pengawa umai seduai sama nengali.

Nyadi sekali tumu pagi, Engkejuang mai Entimuk mansai. Nurun mih seduai mansai ba sungai semak langkau seduai. Nyau tengah hari seduai pan sama bulih ga mansai lalu bebai pulai. Engkejuang enggau Entimuk sama-sama bulih keli siku. Datai di rumah seduai sama mela ikan diri empu. Enggi Engkejuang dibela iya magang tang Entimuk ninggalka ikan keli. Ikan keli nya enda dibunuh iya tang ditupi iya dalam tempayang ai.

Taun maya nya maya mantun nya alai seduai sama-sama nurun mantun ke umai. Umai seduai bedandang. Nyadi umai Entimuk muak ari penatai lalu umai Engkejuang ke ujung jalai. Lebuh pulai lemai, Engkejuang nyung Entimuk. Peda iya Entimuk bulih bendar mantun sehari nya. Ngelama tu enda mega Entimuk ngeyampat nya mantun.

‘Bulih endar nuan mantun sehari tu wai. Sapa orang nulung nuan,’ ku 

‘Badu enda bulih mih wai, ga ikan keli bisi enggau aku turun,’ ku saut Entimuk.

‘Nemu ga iya enggau nuan mantun wai?’ ku Engkejuang agi irau ati.

‘Nemu wai, ga diajar aku. Rumput pantap padi tinggalka, ku aku nganu iya,’ ku terang Entimuk.

‘Enti munyi nya ka aku nginjau ikan keli nuan nya ila, nulung aku mantun,’ ku Engkejuang.

‘Enggai aku nyali nuan. Ila dibunuh nuan,’ ku Entimuk.

‘Enda aku munuh iya dih,’ ku Engkejuang.

‘Au, ila mih nuan mai iya nganti aku empu udah tembu mantun,’ ku saut Entimuk.

Hari siti turun baru ga Entimuk enggau ikan keli. Engkejuang pan turun ngagai umai iya empu. Lebuh pulai lemai dia Engkejuang udah tembu bantun.

‘Pagila nginjau ikan keli nuan aku wai. Bai aku mantun,’ ku Engkejuang.

Nadai jaku ga tudah Entimuk. Nya alai dibai Engkejuang mih ikan keli iya hari siti. Datai di umai Engkejuang lalu ngajar ikan keli.

‘Padi pantap rumput tinggal,’ ku Engkejuang. Nunda nya ga ikan keli. Padi dipantap iya lalu rumput ditejuka iya. Meda baka nya Engkejuang lalu mantap ikan keli nya lalu diambi iya ke lauk tengah hari nya. Tulang keli nya tadi lalu diselitka Engkejuang ba mata tusuk atap.

‘Ni ikan keli aku dih wai?’ ku tanya Entimuk.

‘Udah dibunuh aku, ga iya mantap padi aku,’ ku Engkejuang. ‘Tulang iya bisi diselitka aku ba mata tusuk atap langkau umai aku din,’ ku iya nyaut Entimuk.

Udah nya Entimuk lalu beguai-guai belanda enggau sabak-sabak mansang ke umai ngambi tulang keli iya ba langkau umai Engkejuang. Tulang keli nya lalu diambi Entimuk ke sugu.

‘Asuh tumbuh, asuh mayuh, asuh panjai, irit bejalai buk aku tu ikan keli,’ ku sampi Entimuk lebuh iya besugu ngena tulang keli iya. Peda buk Entimuk mansang panjai tiap-tiap hari.

‘Nama utai dikena nuan nupi buk nuan ngemanjai nya wai?’ ku Engkejuang nanya Entimuk.

‘Sugu aku enggau tulang keli aku suba,’ ku Entimuk.

‘Aku nginjau wai,’ ku Engkejuang. Diambi Engkejuang tulang keli ari Entimuk lalu besugu sambil besampi.

‘Nya ikan keli, enti nuan amat tau ajih, asuh luchuk asuh puguk buk aku tu,’ ku Engkejuang.

Nama dih lalu gugur mih buk Engkejuang, luchuk sereta puguk. Ensepi buk diri digaga tulang keli baka nya enda manah baka enggi Entimuk, lalu diambi Engkejuang tulang keli nya lalu ditunu iya ba dapur. Angus mih tudah tulang keli tu tadi nadai agi berampang. Udah iya nunu baru iya madah ngagai Entimuk. Entimuk lalu nyabak rauh-rauh sayauka tulang keli iya nya.

Udah nya Engkejuang pan udah ga tembu mantun, nya alai seduai pan bebai ngiga bemban enggau lemba. Datai seduai ba madang bemban peda seduai bemban agi mekang. Barang ke tuai nya nyau kelalu engka ke puda bedau ga tau dipantap. Enda ga seduai bulih bemban tang Entimuk lalu mantap sumbuk bemban sekayu lalu dibai iya pulai ke perau seduai. Udah seduai lalu ngiga lemba. Datai ba madang lemba baka nya ga. Iya ke tuai nyau enda tau diguna agi lalu barang ke agi puda nya nyau agi begulung. Dientun Entimuk sumbuk lemba siti lalu dibai iya pulai. Datai ba perau lalu ditanchangka iya ba sengkar begulai enggau sumbuk bemban.

Meda bemban enggau lemba sama agi mekang-mekang, seduai lalu mulai ke diri. bekayuh seduai mulaika diri. entimuk ngemudi lalu Engkejuang luan. Kira setanjung agi ari pengkalan dinga tak memunyi mih burung jeruit.

‘Jeruit, jeruit, iya ke ngemudi nya panjai buk, iya ke luan nya puguk.’

‘Besilih tua wai. Nama burung nya tak ngerara tua,’ ku Engkejuang. Besilih ga seduai. Engkejuang ngemudi Entimuk ga luan. Enda lama udah nya dinga munyi ga burung nya baru. 

‘Jeruit, jeruit, iya ke luan panjai buk, iya ke ngemudi luchuk puguk. Besilih ga seduai baru. Puas-puas seduai besilih baka nya seduai lalu karam. Seduai sempat bepegai ba timbau perau. Dia mih seduai ditabanka rarat bepegai ba perau ti udah tungkup. Nyau lemai hari seduai lalu tepanggai ba pengkalan orang. 

‘Sekalika rumah antu tauka rumah jelu ditiki tua mih lagi,’ ku Entimuk bejaku enggau Engkejuang.

Peda Entimuk, agi ga sumbuk bemban enggau sumbuk lemba iya meruan betanchang ba sengkar perau. Diambi iya sumbuk bemban enggau sumbuk lemba. Udah nya seduai lalu sama niki nengah jalai pengkalan orang. Malik seduai ke atas peda seduai bisi rumah sebuah sepintu selawang-lawang. Datai ba kaki tangga seduai lalu ngangau.

‘Jadi rumah kita ditu?’ ku seduai. Nadai ga orang nyaut. Ngangau ga seduai baru. Nadai ga orang nyaut. Hari nyau lemai selemai. Ninga orang nadai nyaut seduai lalu niki. Peda seduai bisi orang tuai siku dugau-dugau nunga ke belakang.

‘Nama gaga nuan ini?’ ku seduai. Enda ga ini tuai nya nyaut. Ditanya seduai baru, enda ga ini tuai nya nyaut. Meda ini tuai nya tak enda ibuhka seduai, Entimuk lalu numbuk pending kanan ini tuai nya ngena sumbuk bemban. Peda tak pansut renyuan nabanka idang. Lalu ditumbuk Entimuk pending kiba iya enggau sumbuk lemba, peda tak pansut sawa muka kelingkang. Udah nya baru ini tuai nya malik lalu tepedaka dua iku nya udah niki rumah iya. Lalu beguai tudah tuai beranchauka tikai sereta lalu mantaika baku sarang pinang.

Malam nya seduai bemalam ba rumah ini tuai nya. Semalam-malam nya sida tiga berandau. Ini tuai nya nanyaka pejalai seduai tak rembus ba iya dia. Seduai lalau nusi semua berita alai seduai tak rembus ba menua iya dia.

‘Tu mih baka pendiau aku. Nyadi aku tu dikumbai orang Ini Manang,’ ku ini tuai nya madahka seduai. Tengah malam nya baru Ini Manang mai seduai tinduk. Sebedau tinduk Ini Manang nelai seduai. ‘Enti seduai ninga utai nyelai munyi lagi uchu seduai anang ngelara,’ ku Ini Manang. 

Sida tiga lalu belatur tinduk. Entimuk seduai Engkejuang diasuh Ini Manang tinduk ba sadau lalu iya empu tinduk di baruh. Kira dini hari mabu, dia Entimuk seduai Engkejuang ninga utai bemunyi di baruh.

‘Siang nyadi orang malam nyadi antu. Kang kebembang,’ ku utai didinga seduai.

‘Nama utai bemunyi?’ ku Engkejuang.

‘Enda nuan ingat, ini enda ngasuh tua mayuh utai lara?’ ku Entimuk nelai Engkejuang. Engkejuang pan enda bemunyi agi. Seduai enggai agi tinduk nyentuk ke hari tawas. Pagi nya seduai madahka diri deka pulai.

‘Enti seduai pulai uchu, nama seduai datai ba pendai aku lalu pejamka mata. Lalu pia mega enti seduai enchelak lagi seduai rembus ba seberang pendai seduai empu. Lalu dia lagi seduai bisi meda pun limau sekayu. Ambi seduai daun puda lalu tikau seduai ke belakang,’ ku Ini Manang ngajar seduai.

Udah tembu ajar Ini Manang, seduai lalu mupuk. Datai ba pendai Ini Manang; ‘Nyah Pejamka mata tua wai,’ku Entimuk. Enchelak Entimuk nemu Enkejuang nadai. Entimuk tu tadi lalu rembus ba seberai pendai seduai di menua.

‘Engka agi dudi Engkejuang tu,’ ku ati Entimuk. Malik Entimuk ke tisi jalai peda iya amat bisi ga pun limau munyi ke dipadahka Ini manang. Dipatahka iya daun limau ke agi puda lalu ditikau iya ke belakang. Mupuk mih Entimuk niti jalai pendai pulai ke langkau seduai. Dinga tak bisi orang bejalai nunda udi iya. Enda ga iya malik laban iya naga nya Engkejuang. Dinga iya nerakan orang tak munyi terakan lelaki. Malik iya ke belakang peda iya lelaki siku bejalai nunda udi iya. Iya ga sigat , besai sereta tinggi.

‘Kini tuju pejalai nuan dih unggal?’ ku tanya Entimuk.

‘Nadai pejalai bukai unggal. Nuan ga ngangauka aku ngena daun limau. Nya alai aku datai deka bebini enggau nuan,’ku saut lelaki nya. Lalu jadi enggau Entimuk mih lelaki nya.

Tu nyau ngenangka tudah Engkejuang ke nadai datai seretai Entimuk. Nyadi lebuh seduai iya ke datai ba pendai Ini Manang, iya enda pejam mata lebuh Entimuk mai iya mejamka mata. Sekali iya meda Entimuk lesap. Meda Entimuk udah lesap nya baru Engkejuang mejamka mata. Enchelak iya, agi ga iya meruan bediri ba pendai Ini Manang. Suah iya nguji lalu enda ga mindah ari pendai Ini Manang. Meda baka nya, Engkejuang lalu nikal ke rumah Ini Manang.

Lebuh tinduk malam nya, Ini Manang nangkanka baru enda ngasuh mayu utai lara enti iya bisi tedingaka utai nyelai. Iya mih maya hari mabu, Engkejuang ninga utai bemunyi; ‘Kang kebembang. Siang nyadi orang malam nyadi antu.’

‘Nama gaga nuan dia Ini Antu?’ ku Engkejuang.

Enda lama udah nya dinga Engkejuang tak setuk-setuk tungkat orang niki tangga sadau. Engkejuang belabuh takut laban iya ngadang diri mati dibunuh antu nya lagi. Iya mih antu nya datai ba setengan tangga sadau, manuk lalu engkukuk. Dinga Engkejuang nadai utai bemunyi agi. Malam lalu belabuh sunyi baru kelimpah ari kukuk manuk ke bejarit agi madahka hari teringkas tawas. Hari tawas Engkejuang lalu nurun ari sadau lalu madahka diri ngagai Ini Manang iya deka pulai.

‘Nama nuan datai ba pendai aku dia lagi pejamka mata nuan uchu lalu enti nuan meda pun limau sekayu ba seberai pendai din lagi, ambi nuan daun puda. Tikau nuan ke belakang, uchu,’ ku Ini Manang madah ngagai Engkejuang.

Engkejuang lalu mupuk ngejangka rumah Ini Manang. Datai ba pendai Ini Manang, Engkejuang lalu mejamka mata iya. Lebuh iya enchelak baru, iya nemu diri udah datai ba seberai pendai seduai iya Entimuk. Peda iya ba tisi jalai nya bisi pun limau. Peda iya bisi daun limau ke udah tuai lalu betebuk-tebuk.

‘Nadai aku ka nitihka jaku Ini Manang. Iya mih antu, ukai iya mensia,’ ku runding Engkejuang lalu nyengkau daun limau ke udah tuai betebuk-tebuk nya tadi lalu ditikau iya ke belakang. Iya lalu nurun ke pendai. Datai ba pendai peda iya Entimuk bisi mandi. Peda iya bisi lelaki siku baru pansut nyelam ari ai. Nyau tegepang ati Engkejuang meda penyigat gamal lelaki nya.

‘Baru datai nuan wai? Nama nuan tak enda seretai aku kemari dih?’ aram mih sama mandi,’ ku Entimuk.

Engkejuang lalu sama mandi enggau Entimuk seduai laki iya. Benung sida tiga agi mandi dinga tak redup-redup orang datai ari seberai. Datai dia peda sida iya aki tuai orang. Iya ga nyau rukuk-rukuk, kaki ga untut, tubuh ga dibalut kurap.

‘Lalu unggal sama mandi enggau kami ditu,’ ku Laki Entimuk.

‘Au unggal, keba maju endang ngambu lalu,’ ku aki tuai nya. Iya lalu ngetu sama mandi dia. Nya mih Engkejuang endang tak selalu jeluak ensium bau aki tuai orang nya. Entimuk seduai laki iya beperening pangan diri. Sida empat lalu sama-sama pulai ke langkau. Datai di langkau, laki Entimuk lalu berandau enggau orang tuai nya tadi. Pengelama ke berandau, laki Entimuk lalu nanyaka pejalai orang tuai nya meda tak rembus dia.

‘Nadai utai ditanyaka pejalai aku tu unggal. Nunda pejalai nuan ga aku. Udah dikangauka Engkejuang ngena daun limau. Napat iya ke bini mih aku tu,’ ku orang tuai nya.

‘Nya munyi jaku iya wai. Datai napatka nuan iya tu,’ ku Entimuk.

‘Nadai aku nemu belaki enggau orang ngenuai nya. Asuh pulai iya nya dia,’ ku Engkejuang.

‘Nadai nemu jalai pulai. Mati idup jadi enggau nuan mih aku Engkejuang, kera nuan udah ngangau aku,’ pia ku orang tuai nya.

‘Nya mih orang enggai enda ningaka jaku orang bukai. Nya enggi aku nya ulih aku ngangau ngena daun limau mih, tang ga aku nitihka ajar Ini Manang,’ ku Entimuk nganu Engkejuang.

Nadai mih nya alahka enggai. Pengujung iya jadi mih tudah Engkejuang enggau orang tuai nya tadi. Nya ulih kitai matang ati laban enggai mendingka ajar orang, ku orang madahka orang. Engkejuang nya endang selalu melintang penemu orang.