Alu Tikus Belanda Alah Baru

(i)

Jerita tu ukai deka ngenyaika sapa-sapa, lalu pia mega kelebih agi ngagai kaban belayan tikus belanda. Chukup mih semina diambi nyadika teladan, nyadika chuan, iya ti keruh asuh kitai sama-sama chiru, iya ti jai asuh kitai manah ngambika tau nyadika peduman.

Baka ke ditusi niang aki aku suba, lumba tikus belanda  enggau tekura tu nyadi seratus taun kelia menya maya mayuh ari kitai bedau ada di dunya. Asal utai tu nyadi ari ulah enggau perangai tikus belanda ke sumbung ketegal ke sigi laju lalu ngumbai diri ulih ngalahka semua jelu. Ketegal nya mega iya minta mai tekura berumpak sama laban maya nya bedau bisi perais tauka tanda pengingat udah diberi. Tikus belanda arap enggau nya iya nyadi jelu ke keterubah diberi pingat tauka midul dalam puak kampung jerung nya. Agi mega tekura endang jelu ke lubah sereta kelalu beati-ati dalam pengawa. Nya mih tikus belanda ngembuan pengarap ti tinggi senentang pengulih iya.

Tang pia mega tekura nyangka pemaiada iya ngembuan pengarap ti besai ke pengulih diri empu. Taja pan pejalai iya bisi jampat mimit enti dibanding enggau tekuyung tang iya bisi pengarap ti besai ke peluang iya menang. Nya mih kebuah iya nerima peminta tikus belanda ke mai iya belumba belanda.

Nya alai ba endur enggau maya ti udah ditentuka berengkah mih pekit berumpak entara tikus belanda enggau tekura ke sampai kemaya hari tu agi nyadi legenda jerita bala anak mensia.

(ii)

Udah lumba ke balat ngemaluka nya tembu bisi mega pekit lumba bukai diaturka bala kaban belayan tikus belanda ngelaban sepisis jelu bukai dikena sida meresika nama enggau imej sida sekaban. Nitihka ripot nyau deka semua nya alah magang semina siti dua aja ti enda. Semina lumba nya enda tentu mayuh ditemu bala bukai balat empas ari lumba ti keterubah nya ke balat dikeingatka bala jelu. Nya alai ketegal nya lumba nya mega majak enda tentu dikeingatka bala. Engka amat ku jaku sema orang, ketegal ai tusu setitik lalu jai tusu seperiuk. Semua pemantas, pemanah sereta pengidup bepengerai ti dikemeranka bala sida tikus belanda enda tentu dikemuningka jelu bukai ketegal ke kala alah lumba ti keterubah suba. Nya pan ketegal sida tikus belanda nya sumbung, renjan amat jaku.

Betaun-taun udah nya sida kaban belayan tikus belanda idup dalam pemalu, idup malu mati enggai. Bekau lumba nya mega, jarang amat bala anak tikus belanda bisi dipeda bemain sebelah kampung. Bala ke tuai pan enda temu maya dipeda pansut ngiga pemakai. Sida nyau majak baka pendiau pengidup bunsu bubut – idup kediri-diri sekaban belayan. Nyau kelama sengian nadai memunyi, lenyau bansa tikus belanda ari kampung jerung nya. Entah baka ni chara nadai mih kitai nemu.

Bisi berita ke madah sida nya udah pindah bebala mayuh ngagai nengeri, tama ngagai pasar sereta bandar raya alai bala anak mensia. Dia mih sida bekelala enggau anak mensia. Ketegal ke balat rinduka bala tikus belanda mayuh mih bala tikus belanda ditangkap lalu nyadika pinan anak mensia. Bisi mega berita selebebu ngapa ti madahka ketegal pemanah sereta pengerai bala tikus belanda, bala mensia nyau nunda chara pemakai sida tikus belanda ti semina bepakaika sayur aja.

Bisi mega berita bukai ke madah bala sida tikus belanda tu udah pindah ke kampung puang ti nadai bisi diuan jelu bukai. Kenu ku cherita, siang malam sida iya baum ngiga chara ngemulaika imej sida ke manah suba ke udah rajai dikemainka bala komuniti jelu bukai.

Cherita-cherita tu enda temu betul tauka enda. Nadai siku ulih ngamatka cherita tu enda baka berita pekit lumba entara tikus belanda enggau tekura kelia.

(iii)

Bepuluh-puluh taun bala sida tikus belanda lalu enda pulai ke kampung. Nya ti ngujungka bala jelu bukai udah seratus peratus enda ingatka sida tu agi. Bisi sekali, seraban kaban belayan tikus belanda ke nyampau lapan pintu datai baru pulai ke kampung lama sida lalu ngentapka pendiau diri dia baru. Nyau tekenyit amat bala jelu bukai med penatai sida tikus belanda sampaika bala orang utan enggau nyumbuh enda badu-badu ngaruka pala meratika sida ari puchuk kayu.

Taja pan bala komuniti jelu nyau nadai agi besebutka pekit ke ngalahka tikus belanda tang raban tikus belanda agi berasai malu sereta agi kurang begaul enggau bala jelu bukai. Sida semina ngulai kaban belayan sida sama sida aja. Enda baka jelu bukai ke ngembuan kaul ke rapit entara pangan diri lalu seruran besaup mantu pangan diri lebuh maya lantang enggau tusah.

Bisi sekali enda nemu nama mimpi tak enda mukai-mukai sida kaban belayan tikus belanda bisi nganjung pengari enggau aum ninting bulan bala jelu ba kampung nya.

‘Kami deka ngaturka lumba. Kami deka meresika imej kami ke udah lama dibalut kamah ngambika bebau rengut, bebau angi laban ngelama tu udah lama bebau but, bebau jukut.’

Nyau tegepang tekenyit ati bala jelu bukai ninga tuduh penemu pengari tikus belanda nya. Iya bala agi ngenyitka ati sida jelu bukai nya, lumba ti deka diatur nya ukai semina ungkup tekura aja tang mega nyengkaum sepisis jelu bukai. Tiap-tiap pengari jelu enda tau enda nganjung pengari dalam pekit lumba nya ngambika pekit nya bisi agi stindit sereta beprestij ku pengari tikus belanda nya.

Mayuh komen, bantah enggau sapi penemu dikenataika bala ke ngulu aum nya. Bisi ke nyukung penemu nya lalu enda kurang mega bala ke mantah, mejah, enda besetuju enggau tuduh penemu nya kelebih agi bala jelu ke udah lanjut umur. Sida tu balat bendar enda besetuju enggau penemu nya laban irauka sejarah kelia betandu  baru lalu tau ngujungka kaul entara diri sama diri tau putus baru, retai baka kena ujan enggau pansa. Nambahka nya mega, pekit sekali tu nyengkaum semua jelu. Nama penyadi enti bisi nyadi sampai bemunsuh enggau pangan diri?  Tentu nya mih ke ngerugika semua komuniti jelu!

Tang udah ke diumbuk sereta diterangka pengari tikus belanda enggau manah-manah dia semua pengari jelu bukai besetuju enggau penemu nya. Pengari  tikus belanda minta semua jelu nganggap pekit tu ‘pekit entara diri sekaban’ lalu siti ari chara dikena bala kaban belayan tikus belanda ngerapitka pulai kaul sida enggau jelu bukai.

Nya alai diputuska dalam aum nya mega maya pekit tu deka dipejalaika, iya nya tiga minggu ari maya sida ke bebaum nya. Penyauh lumba nya enda jauh iya nya semina sepemanjai pun kayu tapang ke udah rebah munyi ku jaku tuai datai tikau rampang pinang. Dikena nentuka penyampau ke enggau masuk pekit nya enda bangat mayuh dia siku bansa jelu aja dipinta ngarika kaban belayan diri.

Kenyau ari sehari nya, belatih ngiraika diri mih bala sida. Tawas malam mih bala pengari jelu ti bisi udah ngantung nama enggau masuk pekit lumba belanda nya.

(iv)

Baka nya mega bala kaban belayan tikus belanda. Munyi ke bula nusi, nyau deka tiap-tiap iku pintu pengari kaban belayan sida tikus nya ke belatih enggau bebendar dikena ngangkatka tikas cergas fizikal sida. Tiap-tiap pintu bilik sida ngembuan juluk ati ke deka nyadi pemenang laban sama-sama deka meresika nama diri sebilik sereta imej peturun tikus belanda.

Bisi tikus belanda ke belatih maya pagi, bisi ke belatih maya lemai, bisi mega ke belatih belalai maya malam. Bisi ke belanda ba madang babas, bisi mega ba tebing sungai enggau mayuh strategi latih ke bukai.

Kadang-kadang bisi ga maya bala indai tikus belanda betalat enggau pangan diri madahka pengelandik sereta pemanah anak diri sereta patut nyadi pengari meresika nama enggau imej peturun tikus belanda.

Beberepa hari sebedau pekit nya nyadi, lalu baum mih sida diri sebilik lapan pintu nya milih pengari sida ke pekit lumba belanda nya. Tang pedis amat deka selubang penemu laban sama-sama ngetanka pengering diri, sama bela kih, sama bela bingking, chungkin. Nama mih penyadi, pengujung iya lalu tangguh mih aum sida nadai milih sapa-sapa bagi pengari laban nadai sepintu bilik pan sanggup ngalahka diri.

Pekit ke sekali tu amat berat ba imej peturun sida tikus belanda ke dulu suba enggau kemaya hari tu laban semua sida ngarapka diri dikenang nyadika penyelamat dalam sejarah peturun tikus belanda. Tiap-tiap iku sida baka ke manjung ba pala wong, nyau beguai ngangau di kaki rantau, nganggapka diri endang menang laban ba runding sida nadai jelu bukai ulih tealahka sida dalam pemantas belanda.

Nya mih tusah enti udah bisi runding baka nya. Sumbung taja pan pengulih ke bendar nya enda datai dia.

(v)

Pejam enchelak, pejam enchelak, matahari beganti bulan, hari enggau minggu. Hari ke dianti-anti pan datai. Pun kayu tapang pan udah ga ditebang nengah chara begutung-ruyung. Nyau besun-sun bala jelu tumu pagi udah nurun ngagai padang alai pekit, nyau betambit pintu bekaling alu bala jelu sampal diri sebilik deka meda pengerami ti pengabis iya tebilang ba kampung nya, iya nya ‘lumba entara kaban’. Lumba ti dikumbai sida pengabis glamer ke tau nyadika sejarah kampung nya.

Tiap-tiap jelu udah besemaya enda bemunsuh enggau sapa-sapa ke menang dalam pekit lumba nya lagi. Besedia mih tiap-tiap iku pengari jelu ba tempat alai berengkah. Siku jelu ziraf udah dituduh mekuh pengawa nyadi penanda maya berengkah laban medaka diri iya nya tinggi jejetam lalu mudah dipeda kenaya iya ari jauh. Bediri mih tudah ziraf ba tanah lapang. Lebuh ayas ziraf udah nadai dipeda agi nya mih tudah gajah lalu nyadaka nyawa iya enggau naka penyarih nandaka lumba nya udah berengkah.

Taja pia, naka mih penyinu ngenang bala sida tikus belanda laban sida lalu bedau teputuska sapa ke patut ngarika sida. Lebuh gajah munyika terumpit nandaka pekit nya udah berengkah, dia bala tikus belanda ke agi nembiak redak sereta ngembuan semengat kering agi betulak asur, betarit-tarit sereta beju-ju ngerebahka pangan diri laban ke berebut deka nyadi pengari.

Lebuh tedingaka munyi auh sereta tempik jari bala jelu bukai ba selepak bandir  sereta ke nganti ba adan, ujung pun tapang baru sida tikus belanda nya baka orang ke baru dani tinduk. Lebuh nya baru sida nemu, betalat pan nadai mih guna, asi udah nyadi bubur, udah tepantup baru nengkadah. Nyumbuh ke belanda-landa sambil begaruka tubuh pan udah datai. Manuk ke mantuk belut pan udah mega datai. Kijang, kerebau, rimau, pelanduk,tupai, kambin kera ke benung mangkil pisang sereta enggau tekura ke bejalai gupai-gupai pan udah sama bela datai ba adan. Disimpulka semua jelu ke enggau udah datai di adan memagang. Kiraka alah baru mih sida tikus belanda.

Laban ke tekelalu malu ketegal ke alah dalam pekit lumba ke pengabis besai nya dia semua bala kaban belayan tikus belanda mupuk ninggalka kampung nya. Nya alai nyentukka sehari tu kitai tusah deka tetemuka tikus belanda ba dalam kampung. Mayuh ari sida tu udah rindu agi diau ba kandang, sangkar sereta rumah ke digaga mensia.

(vi)

‘Nya tadi baka jerita tikus belanda ke alah baru, ukai ketegal nadai pengering, ukai ketegal enda kuat tang ketegal ke beserekang penemu enggau pangan diri ke ngujungka sida nyau terit batang rekung ngelaban pangan diri. tu ngujungka pengering sida bebali lemi. Cherita jarang bendar didinga kemaya hari tu kelebih agi sida ke rebak baru laban bebasaka peminta ari kaban belayan tikus belanda nya empu. ‘

‘Jadi sapa mih ke menang pekit lumba nya dih?’

‘Entah. Laban cherita tu enda ditusi ari mulut ke mulut mayuh bala jelu udah enda ingatka cherita tu agi. Nya alai nadai ditemu sapa ke menang lumba nya suba. Bisi ke madah rimau. Bisi mega madahka kuda. Mayuh agi simpul bukai senentang pemenang pekit tu. Tang utai ke nyadi nyata nya semua jelu bukai udah nganggapka pekit lumba tu siti chara ngerapatka kaul entara jelu. Nya alai, sapa pemenang iya enda tentu dikemeratka.’

‘Au pia iya ney. Eh deka kini nuan dih?’

‘Eh aku deka pulai. Udah tembu jerita aku ngagai bala mensia. Aku arapka bala mensia tau ngambika jerita tu nyadika teladan chuan sida, iya ke keruh nya asuh chiru lalu asuh nyadika peduman.’