Kangkik

Lebuh dunya tu empai diuan mayuh mensia, lebuh menua tu agi siga, lebuh kampung agi jerung, dia dih kenu ke cherita, antu, jelu, burung enggau mensia endang begulai sejalai magang. Nyadi rambau nya kelia bisi apai tuai kera siku nyadi manang.

Malam siti Manang Kera nya diambi orang belian. Lebuh pulai pagi, iya diberi orang upah. Kelimpah ari duku, chapak enggau kebuk, iya mega diberi orang upah manuk. Udah badu besuaka upah, manang lalu mulaika diri.

Hari siti ensepi diri nadai lauk, Manang Kera lalu ngasuh anak iya benama Kangkik munuh manuk ke ulih iya belian. Udah dibunuh, bangkai manuk nya lalu dibai Kangkik ke pendai ngulihka nyamai alai iya mela. Benung Kangkik meruti perut manuk dia dih mansa orang ngena perau.

‘Nama gaga nuan Kangkik?’ ku bala orang ke merau.

‘Meruti perut manuk, ulih apai belian malam ensana,’ ku Kangkik. Ngelebus perau keteruba, mansa ga perau tuai rumah.

‘Nama gaga nuan Kangkik?’ ku tuai rumah.

‘Meruti perut manuk, ulih apai belian malam ensana,’ ku Kangkik ga nyaut.

Kira dua tanjung perau dua buah nya udah ngelebus alai mansa dih perau penghulu.

‘Nama pengawa nuan dia Kangkik?’ ku penghulu nanya.

‘Eh! Nundi aku kita nya,’ ku Kangkik, ‘meruti apai perut kita,’ ku iya.

Ninga saut Kangkik munyi nya, pedis dih ati penghulu. ‘Tangkap enggau Kangkik nya. Ila kitai munuh iya,’ ku penghulu. Kangkik lalu ditangkap bala penghulu sereta dibai sida pulai ke rumah penghulu.

Meda Kangkik lalu nadai pulai irau dih ati apai iya. Nurun iya ngagai pengkalan tang nadai ga tepedaka Kangkik. Peda iya manuk udah ditetak dalam baka ba atas batu kerangan. Peda iya perut manuk agi memekang empai abis diperuti.

‘Kini tunga Kangkik tu? Engka iya udah ditabanka munsuh,’ ku apai iya bejaku dalam ati. Pulai apai Kangki lalu nusi ngagai indai Kangkik madahka iya nadai ba pengkalan. Ninga munyi nya indai Kangkik lalu nyerarat nyabak. Belabuh ari sehari nya seduai melaki-bini lalu ngulit.

Tu nyau ngenangka cherita Kangkik ke ditaban bala penghulu. Datai ba pengkalan sida, Kangkik lalu dibai orang niki ke rumah. Datai di rumah lalu disimpan orang dalam bubung besi. Lebuh hari nyau malam, dia sida penghulu lalu betanya enggau pangan diri.

‘Dini alai engkah Kangkik malam tu?’

‘Kapa enda iya diengkahka ba baruh rumah,’ ku jaku bala mayuh. Sida lalu nganjung Kangkik ke baruh rumah. Dia mih tudah Kangkik tinduk semalam nya. Dani pagi penghulu nanya Kangkik.

‘Nama mimpi nuan demalam Kangkik?’

‘Nama mimpi? Tinduk dih aku enda, abis dipantang nyamuk, digigit kerengit. Ni bisi mimpi,’ ku Kangkik nyaut pengulu. Malam siti berunding baru ga bala sida penghulu.

‘Dini endur Kangkik tu patut tinduk malam tu? Demalam tak nadai mimpi iya tu,’ ku penghulu minta penemu bala mayuh.

‘Asuh tinduk ba tanju iya malam tu,’ ku jaku bala sekeda sida serumah.

Malam nya ba tanju mih tudah Kangkik tinduk. Dia iya pan abis diempa nyamuk, iya ga chelap. Deka iya rari enda ga iya ulih muka bubung besi ke alai orang ngurung iya. Dani pagi tanyaka penghulu ga mimpi Kangkik.

‘Nama ditanyaka mimpi. Nadai ulih tinduk aku demalam,’ ku Kangkik.

‘Manah Kangkik tinduk ba panggau ai malam tu. Nyangka ukur iya bisi mimpi,’ ku runding penghulu malam siti. Lalu ba panggau ai mih Kangkik tinduk malam nya.

‘Bisi mimpi nuan demalam Kangkik? Ku penghulu dani pagi siti nanya Kangkik.

‘Mimpi genuk, mimpi periuk mih aku,’ ku Kangkik nimbal.

‘Kati nuan tak lalu nadai mimpi manah Kangkik? Malam lagi tinduk ba panggau nuan Kangkik,’ ku penghulu. Malam nya Kangkik diasuh penghulu tinduk ba panggau. Pagi siti Kangkik dani lalu nusi mimpi diri ngagai penghulu.

‘Manaeh endar mimpi aku demalam penghulu. Mimpi sibau lebat enda benung mansau. Dua iti tanjung mih ari rumah kita tu,’ ku Kangkik.

Ninga mimpi Kangkik munyi nya penghulu lalu nesau sida serumah mai nurun ngembuah. Sampal endar sida serumah enggau nurun ngembuah sehari nya. Bisi sepuluh buah perau bala sida serumah. Semina sida indu ke beranak mit enggau sida ke enda dapat mindah agi tinggal.

Bekayuh mih sida serumah sepagi-pagi nya. Ngelebus siti tanjung sida lalu nanya Kangkik.

‘Agi jauh alai buah tu Kangkik?’ ku sida nanya.

‘Engka ba tanjung di ili nyin agi,’ ku Kangkik. Bekayuh ga sida baru lalu mansa pengkalan sida Kangkik. Ari ili pengakalan sida Kangkik nya bisi siti ga tanjung.

‘Nyin tanjung ke dipeda ari tu, dia alai buah sibau ke diambi aku mimpi,’ ku Kangkik madahka bala penghulu. Datai ba tanjung ke ku Kangkik bala lalu ngetu. Ransing bendar mih sida serumah betanchang dia magang.

‘Nuan tinggal Kangkik, ngibun perau,’ ku jaku bala mayuh. Bejalai mih bala penghulu ngiga pun sibau ke ku Kangkik. Lama ga sida udah bejalai tang lalu nadai ga tetemuka pun sibau.

‘Udah kitai tu diakalka Kangkik. Legi asai dek Kangkik, pama kitai datai di ai legi alu sepuoh enggau Kangkik nya awakka parai. Jerai asai iya legi,’ ku penghulu. Sida lalu nikal baru nuju perau. Datai dia lalu ditangkap sida Kangkik lalu dibuai ke ai. Kangkik lalu enselur pulai ke ulu. Datai ba lubuk ari ili pengkalan Kangkik lalu pansut ari dalam ai. Niki Kangkik ke tebing lalu niki puchuk bansu ke tumbuh ari atas lubuk.

Pulai baru mih bala penghulu mai ati ringat. Tang sida bisi gaga mimit laban Kangkik udah mati. Iya mih perau ke terubah mansa lubuk ke ari ili pengkalan sida Kangkik sida lalu ngetu.

‘Nama nyin tak Kangkik agi rising-rising dalam ai nyin dih?’ ku sida bejaku enggau pangan diri lebuh meda Kangkik dalam ai din. Angkat siku lalu terejun senentang ayuk Kangkik nya. Peda perebubuk lalu nadai agi pansut.

‘Alah punggal nya tadi berekak ngelaban Kangkik,’ ku sida bejaku enggau pangan diri. Terejun siku peda lalu nadai agi pansut. Semua perau sepuluh buah nya ngetu dia magang lalu tetiap iku sida terejun laban deka ngerekak Kangkik. Nyau abis mih bala penghulu dalam perau sepuluh buah nya lemas.

Kangkik lalu pulai ngagai apai seduai indai iya. Gaga bendar mih seduai melaki bini laban anak ke disangka mati nya pulai idup baru. Seduai pan badu agi ngulit.