Awang Jerenih

Nyau pengelama ke begulai belaki-bini dia dih bini Awang Jerenih, Dayang Fatimah lalu betubuh bisi. Ari Dayang Fatimah ke lega lalu nyentuk ngagai kandung iya tiga bulan, iya endang enda makai seleka asi, semina beridupka buah masam enggau ai. Masuk keempat bulan Dayang udah ngandung, baru iya bisi berasai deka makai asi lalu bisi tetengukka utai bukai. Lemai siti iya madahka nyawa iya bisi utai diketenguk tang mar alai ngiga.

‘Nama utai deka diempa nuan dih Dayang? Ila aku ngigaka nuan,’ ku Awang Jerenih.

‘Nyelai utai diketengukka aku tu, Awang,’ ku iya, ‘tak tetenguk deka makai kapir langit.’

Awang Jerenih tusah ati laban iya nemu sera bini iya nya nadai alai ngiga. Pagi siti iya nyediaka diri deka bejalai. Iya mai bekal mayuh laban ngadang diri jauh pejalai. Sebedau iya mupuk Dayang Fatimah bejaku.

‘Enti nuan bedau bulih sera aku anang guai pulai nuan ila.’

Bejalai kenu Awang Jerenih ninggalka rumah. Lembau bendar iya ninggalka bini iya kediri. Iya ga nadai orang semak enggau begulai, iya ga benung ribat. Udah iya ingatka jaku bini iya ke enda ngasuh iya pulai puang, dia dih Awang Jerenih lalu ngebuka diri bejalai tegar. Nyau kelama Awang Jerenih udah bejalai neresa kampung puang lalu ga nadai tetemuka utai ke diketengukka bini iya.

Nyadai ngenang Dayang Fatimah ke tinggal kediri ba kampung din, ketuju lemai laki iya udah ninggalka iya, iya bisi ninga utai tak nyelai maya hari tumbuh lambur. Iya ninga nyawa orang bejaku datai ari jalai pendai.

‘Sapa empu jalai tu?’ ku nyawa orang nya. Dayang Fatimah tu bedau berani nyaut. Ketiga kali iya ngangau baru Dayang Fatimah nyaut.

‘Nya jalai Awang Jerenih.’

‘Tau ditengah jalai tu?’ ku nyawa nya tadi.

‘Tau, tau. Enti kita ukai orang jai,’ ku Dayang Fatimah.

Dia Dayang Fatimah ensepi tanah nyau berenyang alai orang nya bejalai. Datai ba kaki tangga, nanya baru ga orang nya.

‘Tau ditiki tangga tu?’

‘Tau, tau. Nya ga tangga Awang Jerenih,’ ku Dayang Fatimah ga nyaut ari dalam langkau.

Datai ba mua pintu, orang nya nanya baru.

‘Tau dibuka pintu Awang Jerenih tu?’

‘Tau, lalu mih, tama,’ ku saut Dayang Fatimah.

Malik dih Dayang Fatimah, iya lalu tedandang meda pemesai gamal orang nya. Gamal iya tiga kali besai ari mensia. Iya lalu nanyaka orang enggau Dayang Fatimah begulai. Dayang Fatimah madahka laki iya udah ngiga sera. Nyadi lelaki ke datai nya tadi madahka diri Antu Petan. Ninga laki Dayang Fatimah nadai dia, Antu Petan lalu mai Dayang Fatimah jadi. Laban kelalu takut, Dayang Fatimah pan nyanggup ga. Jadi mih Antu Petan enggau Dayang Fatimah. 

Nama pagi, Antu Petan lalu nurun. Muakka lemai iya mulaika diri ngagai langkau Dayang Fatimah. Nadai utai dibai iya pulai, semina pulai tubuh murus. Tiap-tiap hari iya baka nya. Nyau chukup semilan bulan semilan hari, Dayang Fatimah lalu beranak. Antu Petan nya mih ngintu Dayang Fatimah tu beranak. Diambi seduai anak, diengkah dalam supit lalu dipelunggangka ngagai sepiak mua penyawan. Temuni nembiak nya disimpan dalam supit lalu disalai atas para.

Kira enam bulan Awang Jerenih tu udah belelang ngiga sera bini iya tang nadai bulih. Hari siti iya berunding ati pulai. Iya ingatka bini iya ke ribat tinggal kediri. Tujuh hari tujuh malam iya endang bejalai nadai ngetu alai iya datai ba rumah seduai iya. Datai ba rumah, hari benung tengah hari nampun.

Meda iya datai, bini iya lalu beguai berapi. Ati bini iya bisi reringat meda laki iya nadai bulih sera. Udah mansau asi enggau lauk seduai melaki-bini lalu berenah makai. Benung seduai makai di dih anak mit tak bisi nyabak.

‘Sapa empu anak nyabak?’ tanya Awang Jerenih.

‘Anak aku,’ ku saut Dayang Fatimah. Lalu diambi iya anak ari sepiak penyawan lalu ditusuka iya.

‘Sapa ngintu nuan beranak dih?’ ku laki iya ga nanya baru.

‘Antu Petan. Aku takut iya munuh aku. Nya alai aku lalu jadi enggau iya,’ ku saut Dayang Fatimah.

‘Kinika iya dih?’ ku Awang Jerenih majak nanya bini iya.

‘Kira ngalih hari lagi pulai mih iya turun,’ ku Dayang Fatimah.

Lama Awang Jerenih enda bemunyi laban pedis ati. Badu makai tengah hari nya, Awang Jerenih lalu ngansah sangkuh iya. Penajam sangkuh nya ngenjing bepupu mata, endang nadai tau inggap lalat. Kira tengan turun mata panas, sepi tak berenyang tanah. 

Dayang Fatimah lalu madahka Awang Jerenih, Antu Petan udah datai. Awang Jerenih lalu besedia enggau sangkuh iya nganti ba mua pintu. Baru deka nyingkang temetung Antu Petan, alai Awang Jerenih lalu ngentum iya ngena sangkuh. Labuh Antu Petan ari tangga lalu enda benyawa agi. Bangkai Antu Petan lalu ditumbakka seduai melaki-bini ba baruh dapur.

Lemai nya benung Dayang Fatimah berapi dia iya ingatka Awang Jerenih ke enda bulih sera ke iya. Dia ati ringat iya pansut. Diambi iya temuni anak iya ke disalai lalu dipanduk iya ke lauk. Awang Jerenih bulih bendar makai lemai nya. Pia iya makai, pia iya muji bini iya pandai manduk lauk.

Udah makai iya lalu duduk ba pugu tanju. Kelama duduk dia, dia iya tak berasai angat. Jauh agi lemai, angat agi ga sepi iya.

‘Oh sulu, nama main aku tu makin lemai makin angat?’ ku Awang Jerenih nanya bini iya.

‘Endang asai kitai udah makai dagin diri empu,’ ku bini iya nyaut.

Kelama udah duduk ba pugu tanju, dia dih kaki Awang Jerenih tak tumbuh bulu baka bulu burung. Udah tumbuh bulu kaki, nya ngasuh iya angat agi. Nyau enda tan agi, Awang Jerenih lalu duduk ba puchuk perabung. Peda tubuh iya tak abis tumbuh bulu. Awang Jerenih lalu bebali nyadi burung. Malam maya nya nyau tengah malam. Ensepi diri asai nya, iya lalu ngangauka bini iya.

‘Uh Dayang, aku enda ulih begulai enggau seduai menyanak agi. Aku ga nyau nyadi burung geruna. Ila enti kita bisi ninga bala kami terebai, dia kita bejaku “kujuk buk, kujuk buk”. Buk kita lalu tudungka ba pala anak kita,’ ku iya ngajar bini iya. Abis jaku nya ila lalu ngejangka rumah sida menyanak.

Nya alai nyentukka sehari tu, bala Iban agi meruan ngengkahka buk ba kujuk anak mit dikena nyaga ari kachau burung geruna ke terebai maya malam hari.