Anang Renjan Jaku

Lebuh Tekuyung bejalai ngiga pemakai ba atas siti gerugu batu galang ti besai semak tebing sungai, enda mukai-mukai Pelanduk ti bejalai gining-gining nengkadah puchuk buan, lalu tepedaka tekuyung benung nilat-nilat batu.

“Oi! Sambi Tekuyung,” ku Pelanduk ngangau. “Nama gaga nuan tak dedugau ngapa lalu enda nginsit?”

“Eh! Nadai Sambi, nilat-nilat batu aku tu, ngumpul lunik babi tu,” ku Tekuyung nyaut iya. Pelanduk tu tadi lalu ketawa rakah-rakah. Udu amat Pelanduk ketawaka Tekuyung. Nyau pegari kemi iya ke ketawa.

“Nama utai diketawaka nuan ngemendar nya Sambi?” ku tanya Tekuyung. 

Pelanduk enda nyaut semina majakka diri ti ketawaka tudah Tekuyung. Tekuyung pan nyau bisi berasai malu ga diketawaka Pelanduk.

Udah nya baru Tekuyung lalu bejaku enggau Pelanduk. “Nadai nya diketawaka nuan bangat ngemendar nya dih Sambi. Pagila nuan madahka semua jelu asuh datai kitu, laban aku malu bendar udah diketawaka nuan,” ku iya. “Nya alai nambahka nya, seminggu udah tu, aku mai nuan berumpak belanda, ngambika nemu bagi sapa ke tegar agi enggau enda.”

Nama agi dih, Pelanduk gaga bendar ati ninga jaku Tekuyung mai iya berumpak belanda, laban iya endang ngadang diri menang. Nyadi adan seduai iya berengkah ari kaki bukit ke endur seduai berandau, lalu ngagai batu ti semak tebing tasik.

Mupuk mih tudah Pelanduk madahka sekeda bala jelu sebelah kampung dia. Tudah Tekuyung mega mupuk nesau sida sekaban, pasal utai ti udah nyadi entara seduai iya Pelanduk. Dia Tekuyung madah ngagai semua sida sekaban pasal Pelanduk ti udah ketawaka iya. 

Ari nya iya tak enda berasai lalu mai Pelanduk berumpak belanda. Laban Tekuyung nemu diri enda tealahka Pelanduk, ari nya iya nanyaka runding ngagai semua sida sekaban ti bisi datai dia. 

Tang kaban iya ti bisi datai kia, nadai nyaut, laban sida mega endang nemu Pelanduk tegar belanda.

“Nama kebuah nuan enda berunding dulu sebedau nuan nyebut jaku nya dih?” ku bala kaban mayuh nganu Tekuyung. “Kami nadai nemu runding. Nya-alai ba penemu kami, manah agi nuan anang ngelaban Pelanduk berumpak belanda,” ku sida nganu iya.

“Enti kita aya, kita apai, kita menyadi nadai runding,” ku Tekuyung, “deka enggai pan, runding aku empu ga dikena kitai,” ku iya. “Nyadi runding aku baka tu,” ku iya. “Nuan apai diasuh nganti ba batu ti ba tebing tasik, nuan aya diasuh duduk ba tengan adan, nuan aki nganti ba pun kayu ke besai enda jauh ari pun adan. Semua kita diasuh ngangauka Pelanduk, ti iya bisi mansa kita, ngambika iya nyangka sida nya aku empu ke enggau iya berumpak. Nyadi aku empu lalu berintai enggau Pelanduk ba pun adan.”

Udah apus seminggu udah nya, tumu pagi siti Tekuyung seduai Pelanduk, sereta enggau sekeda jelu bukai ke bisi dia, ngatur diri deka berengkah berumpak belanda. Pelanduk seduai Tekuyung sama setuju ngasuh Badak niapka seduai. Udah nya Badak pan lalu berengkah ga niap. “Sa! Dua! Tiga, belanda seduai!” ku Badak.

Nyah! Pelanduk seduai Tekuyung pan lalu nyau tabun-tabun belanda enggau naka penegar tulang seduai. Udah nya Pelanduk nyau nadai dipeda iya agi laban udah jauh ninggalka iya. Dia Tekuyung lalu maringka diri ba madang rumput repa.

Pelanduk tu tadi nama agi dih tudah tuai ke belanda. Semaka nyau baka leka sumpit peneras iya ti belanda tak laju baka peluru leka senapang. Tak nadai meda Tekuyung bisi mansa ngelih ari mua iya. Tang dih, lebuh iya datai ba endur Aki Tekuyung, iya lalu tepedaka Aki Tekuyung endang udah dugau-dugau duduk nyangak ba batu nganti iya. “Apu!” ku ati Pelanduk meda Tekuyung udah dulu datai ari iya, “Laju bendar iya tu! Lagi mih, bedau nemu penegar aku iya tu,” ku iya dia.

Udah nya bebendar agi ga iya belanda. Tang lebuh iya datai ba tengan adan, Tekuyung siku ga udah nganti iya, iya nya Aya Tekuyung, endang sigi dikumbai iya Tekuyung ti enggau iya berumpak belanda.

Meda Tekuyung dua kali udah nganti iya, dia Pelanduk naka ulih belanda, laban adan seduai iya nyau enda tentu jauh agi. Dia iya belanda ngabiska tulang, enggau naka penegar tudah tuai, kejang deka ngenataika diri ba adan. Tang tak enda mukai-mukai, lebuh Pelanduk nuntung ba adan, dia iya meda Tekuyung udah dugau-dugau duduk ba batu adan. Pelanduk enda nemu nya Apai Tekuyung.

Nama agi tudah Pelanduk tak nyau seput-seput jarang. Peluh iya nyau nelusur batang idung. Utai dipeda nyau mega ensabi. Kaki nyau gitik-gitik laban kelalu lelak. “Apu! Alah mih aku tu laban Tekuyung,” ku iya bejaku bediri muchau nengali.

Enda lama udah nya baru Apai Tekuyung ngangauka Pelanduk. “Ho! Sambi!” ku iya. Iga nuan ngelubah nya belanda. Nyau puas aku udah nganti nuan datai ba adan tu,”ku Apai Tekuyung. Apai Tekuyung semina naka tak tuchum-tuchum tekuyung aja, laban iya nemu Pelanduk udah kena akal sida. Nya penulah kitai ketawaka orang enggau nadai tentu kebuah. “Enti baka tu alah mih nuan laban aku, Sambi,” ku Tekuyung. “Alah mih tu, Sambi nadai nemu enggau ga jara,” ku saut Pelanduk. Enda tentu nyamai tudah tuai ke nyaut munyi nya, “Tak Malu Pelanduk.”

“Enti udah ngaku diri alah manah mih nya,” ku Tekuyung, “dudi hari ila, anang sumbung, anang renjan jaku enggau orang. Anang ensepi diri tak kering, lalu ketawaka orang sepeneka ati. Laban kitai enda nemu bulu orang, enda nemu pemintar enggau pengering orang,” ku Apai Tekuyung nganu Pelanduk. Pelanduk enda berani merening mua Tekuyung laban berasai bendar malu ke diri.

Udah tembu lumba nya tadi, semua sida sama bela mulaika diri magang. Belabuh ari sehari nya Pelanduk pan lalu badu agi ketawa ke Tekuyung.