Kena Tangkap Antu Kara

Assan seduai bini iya gaga bendar ati meda diri bisi anak lelaki siku ke sigat sereta sikar dalam semua main enggau pengawa. Seduai iya meri nama anak seduai iya Salau. Nya alai endang kenyau ari mit iya arapka Salau tau nyadi orang ke menyana nganti iya nampung bilik penaik sereta nyaga reta tengkira, enti lebuh nyau datai ba maya seduai bini udah nadai agi jemah ila.

Nyadu lebuh maya Salau nyau udah bujang, iya selalu belajarka semua pengawa ti tau pulai ke pengidup ti menyana kena ngidupka diri empu. Salau tu anembiak ke rajin bendar sereta liat ati ngereja pengawa ti mar sereta pedis dikereja.

Nyadi sekali lebuh hari agi tumu pagi, dia Assan nurun bejalai ngagai tembawai buah tuai ti enda berapa jauh ari rumah sida empu. Nyau puas iya ke malik kiba malik ke kanan merening sereta nengkadah puchuk buah, dia iya bisi tepedaka manyi inggap sereta nepan ba puchuk kara. Puchuk kara nya enda berapa tinggi iga, tang rakah bendar dan. Assan lalu besindang pun kara enggaika bisi orang bukai deka ngambi manyi nya. Udah tembu iya ke besindang pun kara iya lalu mulaika diri ke rumah. Datai di rumah iya lalu madahka diri deka mai Salau muar manyi lemai nya ngagai bini iya.

Nyadi lebuh maya hari nyau penumbas iya alai nurun, seduai iya lalu mupuk mega bejalai, mansang deka muar manyi nya tadi. Datai seduai ba pun kara, dia Salau lalu begagaka tangga antu. Salau pan lalu berengkah maji enggau natuk batang kara. Iya pan lalu manggai ba pun dan, udah nya Salau lalu nurun ke baruh baru. Semua utai enggau perengka ti deka dikena muar manyi baka tali panjai, rintung enggau semilu endang udah disediaka magang. Baka nya mega sempun kulit engkajang ti endang udah rangkai pan nyau udah rembun-rembun ditungkunka apai iya Assan.

Udah tembu ngeruku indah, dia Salu pan lalu mupuk niki. Dia iya ngambi tali enggau semua utai bukai ti dikena, lalu ditanchangka iya ba punggung iya magang. Udah nya iya lalu mansang bejalai gadai-gadai sereta ngeradayau niki ngagai dan ti endur manyi nepan ba puchuk kara.

Lebuh iya ke berengkah niki,  malam endang udah jauh, lalu panchar bulan pan enda berapa terang, laban bulan baru deka tumbuh, tambah agi laban bisi mua hari, ujan bisi beberis sereta mesi-mesi mimit. Nya kebuah sempun Salau enda berapa mayuh bara lalu enggai merumum.

Lebuh iya baru datai ba pun kara ke alai manyi nya nepan, dinga iya daun kara nyau gerisih. Puchuk kara lalu berenyang tiga kali. Meda utai baka nya, dia bulu iya lalu tumbuh, bulu pegu lalu nyeregu, tapak kaki lalu begeremai asai sepi iya, laban kelalu takut. Iya lalu enda engkebut,  engketut ba pun dan kara,  nganti utai ti ngasuh puchuk kara nya berenyang ayan.

Nyau kelama udah Salau ke ngetu baka puyu mabuk ambuh, ngenung baka empelekung mabuk keruh, enda mukai-mukai, Antu Kara pan lalu ayan lalu nangkap Salau. Nadai daya mih tudah Salu tu tadi, laban ba puchuk kayu nadai jalai tudah tuai ngelaban. Antu kara tu tadi lalu nelan iya segala-gala. Semina pah iya sepiak agi digalau antu nya. Pah Salau sepiak nya tadi lalu disimpan Antu Kara ke dalam rintung, sereta lalu diulur iya ka baruh.

Meda rintung bisi diulur bakanya, dia Assan lalu gaga, nyangka Salau udah tembu muar manyi ba puchuk kara. Nyau kelama rintung ke begitang kating-kating lama agi baruh agi ga rintung peda iya dalam petang. Enda mukai-mukai lebuh datai di baruh, dia Assan tepedaka utai dalam rintung baka pah mensia dalam nya. Lebuh rintung nyau ulih ditilik iya nya baru Assan nyau ngelala nya pah Salau dalam rintung nya. Pedis ati ke anak ti pemadu di kesayauka iya digaga Antu baka nya, Assan lau narit tali rintung nya enggau pengabis tulang iya. Dinga iya lalu semerap sereta lalu meredup labuh ari puchuk kara, tak mereding ninggang tanah.

Udah nya Assan lalu bejalai belubah-lubah nuju ngagai endur utai ti labuh. Datai dia, iya lalu tepedaka bangkai antu nyau abis tepambur untak kiba kanan, pala pechah tepangka sebelah bandir kara enggau kayu bukai ti nyaruk batang kara nya.

Enda berapa lama udah nya, dia Assan lalu bisi ninga nyawa orang munyi tu, “Isa antu kara.”

Suah bendar nyawa orang nya didinga Assan, tang tubuh nadai dipeda iya. Iya pan berasai takut  lalu beguai-guai ngambi pah Salau, lalu ditabanka iya pulai ke rumah sida. Dia dih Assan seduai bini enda nemu utai nusah nya ngenang anak ti dikerindu seduai nadai enggau begulai sejalai agi. Ngutuk diri mih tudah Assan laban ti udah mai anak iya muar manyi, laban enti enda dibai iya muar manyi tentu enda ga anak teulihka badi enggau penusah ke baka nya.

Pah anak iya nya tadi lalu dikuburka seduai ba pendam sida serumah. Assan seduai bini lama ngulit ngenang penusah tinggal anak parai ditangkap sereta dipakai Antu Kara.